Hohā 5

¹ai rabb, yād kar ki hamāre sāth kyā kuchh huā! ġaur kar ki hamārī kaisī rusvāī huī hai.

²hamārī maurūsī milkiyat pardesiyoṅ ke havāle kī gaī, hamāre ghar ajnabiyoṅ ke hāth meṅ ā gae haiṅ.

³ham vālidoṅ se maharūm ho kar yatīm ho gae haiṅ, hamārī māeṅ bevāoṅ kī tarah ġairmahfūz haiṅ.

⁴ḵẖwāh pīne kā pānī ho yā lakṛī, har chīz kī pūrī qīmat adā karnī paṛtī hai, hālāṅki yah hamārī apnī hī chīzeṅ thīṅ.

⁵hamārā tāqqub karne vāle hamāre sar par chaṛh āe haiṅ, aur ham thak gae haiṅ. kahīṅ bhī sukūn nahīṅ miltā.

⁶ham ne apne āp ko misr aur asūr ke havāle kar diyā tāki roṭī mil jāe aur bhūkoṅ na mareṅ.

⁷hamāre bāpdādā ne gunāh kiyā, lekin vah kūch kar gae haiṅ. ab ham hī un kī sazā bhugat rahe haiṅ.

⁸ġulām ham par hukūmat karte haiṅ, aur koī nahīṅ hai jo hameṅ un ke hāth se bachāe.

⁹ham apnī jān ko ḵẖatre meṅ ḍāl kar rozī kamāte haiṅ, kyūṅki biyābān meṅ talvār hamārī tāk meṅ baiṭhī rahatī hai.

¹⁰bhūk ke māre hamārī jild tanūr jaisī garm ho kar churmur ho gaī hai.

¹¹siyyūn meṅ aurtoṅ kī ismatdarī, yahūdāh ke shaharoṅ meṅ kuṅvāriyoṅ kī behuramtī huī hai.

¹²dushman ne raīsoṅ ko phāṅsī de kar buzurgoṅ kī beizzatī kī hai.

¹³naujvānoṅ ko chakkī kā pāṭ uṭhāe phirnā hai, laṛke lakṛī ke bojh tale ḍagamgā kar gir jāte haiṅ.

¹⁴ab buzurg shahar ke darvāze se aur javān apne sāzoṅ se bāz rahate haiṅ.

¹⁵ḵẖushī hamāre diloṅ se jātī rahī hai, hamārā loknāch āh-o-zārī meṅ badal gayā hai.

¹⁶tāj hamāre sar par se gir gayā hai. ham par afsos, ham se gunāh sarzad huā hai.

¹⁷isī liye hamārā dil niḍhāl ho gayā, hamārī nazar dhundalā gaī hai.

¹⁸kyūṅki koh-e-siyyūn tabāh huā hai, lomṛiyāṅ us kī galiyoṅ meṅ phirtī haiṅ.

¹⁹ai rabb, terā rāj abdī hai, terā taḵẖt pusht-dar-pusht qāim rahatā hai.

²⁰tū hameṅ hameshā tak kyūṅ bhūlnā chāhatā hai? tū ne hameṅ itnī der tak kyūṅ tark kie rakhā hai?

²¹ai rabb, hameṅ apne pās vāpas lā tāki ham vāpas ā sakeṅ. hameṅ bahāl kar tāki hamārā hāl pahale kī tarah ho.

²²yā kyā tū ne hameṅ hatmī taur par mustarad kar diyā hai? kyā terā ham par ġussā hadd se ziyādā baṛh gayā hai?.