Hohā 3
musībat meṅ rabb kī meharbānī par ummīd
1hāy, mujhe kitnā dukh uṭhānā paṛā! aur yah sab kuchh is liye ho rahā hai ki rabb kā ġazab mujh par nāzil huā hai, usī kī lāṭhī mujhe tarbiyat de rahī hai.
2us ne mujhe hāṅk hāṅk kar tārīkī meṅ chalne diyā, kahīṅ bhī raushnī nazar nahīṅ āī.
3rozānā vah bār bār apnā hāth mere ḵẖilāf uṭhātā rahatā hai.
4us ne mere jism aur jild ko saṛne diyā, merī haḍḍiyoṅ ko toṛ ḍālā.
5mujhe gher kar us ne zahar aur saḵẖt musībat kī dīvār mere ird-gird khaṛī kar dī.
6us ne mujhe tārīkī meṅ basāyā. ab maiṅ un kī mānind hūṅ jo baṛī der se qabr meṅ paṛe haiṅ.
7us ne mujhe pītal kī bhārī zanjīroṅ meṅ jakaṛ kar mere ird-gird aisī dīvāreṅ khaṛī kīṅ jin se maiṅ nikal nahīṅ saktā.
8ḵẖwāh maiṅ madad ke liye kitnī chīḵẖeṅ kyūṅ na mārūṅ vah merī iltijāeṅ apne huzūr pahuṅchne nahīṅ detā.
9jahāṅ bhī maiṅ chalnā chāhūṅ vahāṅ us ne tarāshe pattharoṅ kī mazbūt dīvār se mujhe rok liyā. mere tamām rāste bhūlabhulayyāṅ ban gae haiṅ.
10allāh rīchh kī tarah merī ghāt meṅ baiṭh gayā, sherbabar kī tarah merī tāk lagāe chhup gayā.
11us ne mujhe sahīh rāste se bhaṭkā diyā, phir mujhe phāṛ kar besahārā chhoṛ diyā.
12apnī kamān ko tān kar us ne mujhe apne tīroṅ kā nishānā banāyā.
13us ke tīroṅ ne mere gurdoṅ ko chīr ḍālā.
14maiṅ apnī pūrī qaum ke liye mazāq kā nishānā ban gayā hūṅ. vah pūre din apne gītoṅ meṅ mujhe lān-tān karte haiṅ.
15allāh ne mujhe kaṛve zahar se ser kiyā, mujhe nāgvār talḵẖī kā piyālā pilāyā.
16us ne mere dāṅtoṅ ko bajrī chabāne dī, mujhe kuchal kar ḵẖāk meṅ milā diyā.
17merī jān se sukūn chhīn liyā gayā, ab maiṅ ḵẖushhālī kā mazā bhūl hī gayā hūṅ.
18chunāṅche maiṅ bolā, “merī shān aur rabb par se merī ummīd jātī rahī hai.”
19merī taklīfdih aur bevatan hālat kā ḵẖayāl kaṛve zahar kī mānind hai.
20to bhī merī jān ko us kī yād ātī rahatī hai, sochte sochte vah mere andar dab jātī hai.
21lekin mujhe ek bāt kī ummīd rahī hai, aur yahī maiṅ bār bār zahan meṅ lātā hūṅ,
22rabb kī meharbānī hai ki ham nest-o-nābūd nahīṅ hue. kyūṅki us kī shafqat kabhī ḵẖatm nahīṅ hotī
23balki har subah az sar-e-nau ham par chamak uṭhtī hai. ai mere āqā, terī vafādārī azīm hai.
24merī jān kahatī hai, “rabb merā maurūsī hissā hai, is liye maiṅ us ke intizār meṅ rahūṅgī.”
25kyūṅki rabb un par meharbān hai jo us par ummīd rakh kar us ke tālib rahate haiṅ.
26chunāṅche acchhā hai ki ham ḵẖāmoshī se rabb kī najāt ke intizār meṅ raheṅ.
27acchhā hai ki insān javānī meṅ allāh kā jūā uṭhāe phire.
28jab jūā us kī gardan par rakhā jāe to vah chupke se tanhāī meṅ baiṭh jāe.
29vah ḵẖāk meṅ auṅdhe muṅh ho jāe, shāyad abhī tak ummīd ho.
30vah mārne vāle ko apnā gāl pesh kare, chupke se har tarah kī rusvāī bardāsht kare.
31kyūṅki rabb insān ko hameshā tak radd nahīṅ kartā.
32us kī shafqat itnī azīm hai ki go vah kabhī insān ko dukh pahuṅchāe to bhī vah āḵẖirkār us par dubārā raham kartā hai.
33kyūṅki vah insān ko dabāne aur ġam pahuṅchāne meṅ ḵẖushī mahsūs nahīṅ kartā.
34mulk meṅ tamām qaidiyoṅ ko pāoṅ tale kuchlā jā rahā hai.
35allāh t’ālā ke dekhte dekhte insān kī haqatalfī kī jā rahī hai,
36adālat meṅ logoṅ kā haq mārā jā rahā hai. lekin rabb ko yah sab kuchh nazar ātā hai.
37kaun kuchh karvā saktā hai agar rabb ne is kā hukm na diyā ho?
38āfteṅ aur acchhī chīzeṅ donoṅ allāh t’ālā ke farmān par vujūd meṅ ātī haiṅ.
39to phir insānoṅ meṅ se kaun apne gunāhoṅ kī sazā pāne par shikāyat kare?
40āo, ham apne chāl-chalan kā jāizā leṅ, use acchhī tarah jāṅch kar rabb ke pās vāpas āeṅ.
41ham apne dil ko hāthoṅ samet āsmān kī taraf māil kareṅ jahāṅ allāh hai.
42ham iqrār kareṅ, “ham bevafā ho kar sarkash ho gae haiṅ, aur tū ne hameṅ muāf nahīṅ kiyā.
43tū apne qahar ke parde ke pīchhe chhup kar hamārā tāqqub karne lagā, berahamī se hameṅ mārtā gayā.
44tū bādal meṅ yūṅ chhup gayā hai ki koī bhī duā tujh tak nahīṅ pahuṅch saktī.
45tū ne hameṅ aqvām ke darmiyān kūṛā-karkaṭ banā diyā.
46hamāre tamām dushman hameṅ tāne dete haiṅ.
47dahshat aur gaṛhe hamāre nasīb meṅ haiṅ, ham dhaṛām se gir kar tabāh ho gae haiṅ.”
48āṅsū merī āṅkhoṅ se ṭapak ṭapak kar nadiyāṅ ban gae haiṅ, maiṅ is liye ro rahā hūṅ ki merī qaum tabāh ho gaī hai.
49mere āṅsū ruk nahīṅ sakte balki us vaqt tak jārī raheṅge
50jab tak rabb āsmān se jhāṅk kar mujh par dhyān na de.
51apne shahar kī aurtoṅ se dushman kā sulūk dekh kar merā dil chhalnī ho rahā hai.
52jo bilāvajah mere dushman haiṅ unhoṅ ne parinde kī tarah merā shikār kiyā.
53unhoṅ ne mujhe jān se mārne ke liye gaṛhe meṅ ḍāl kar mujh par patthar phaiṅk die.
54sailāb mujh par āyā, aur merā sar pānī meṅ ḍūb gayā. maiṅ bolā, “merī zindagī kā dhāgā kaṭ gayā hai.”
55ai rabb, jab maiṅ gaṛhe kī gaharāiyoṅ meṅ thā to maiṅ ne tere nām ko pukārā.
56maiṅ ne iltijā kī, “apnā kān band na rakh balki merī āheṅ aur chīḵẖeṅ sun!” aur tū ne merī sunī.
57jab maiṅ ne tujhe pukārā to tū ne qarīb ā kar farmāyā, “ḵẖauf na khā.”
58ai rabb, tū adālat meṅ mere haq meṅ muqaddmā laṛā, balki tū ne merī jān kā ivzānā bhī diyā.
59ai rabb, jo zulm mujh par huā vah tujhe sāf nazar ātā hai. ab merā insāf kar!
60tū ne un kī tamām kīnāparvarī par tavajjuh dī hai. jitnī bhī sāzisheṅ unhoṅ ne mere ḵẖilāf kī haiṅ un se tū vāqif hai.
61ai rabb, un kī lān-tān, un ke mere ḵẖilāf tamām mansūbe tere kān tak pahuṅch gae haiṅ.
62jo kuchh mere muḵẖālif pūrā din mere ḵẖilāf phusaphusāte aur buṛabuṛāte haiṅ us se tū ḵẖūb āshnā hai.
63dekh ki yah kyā karte haiṅ! ḵẖwāh baiṭhe yā khaṛe hoṅ, har vaqt vah apne gītoṅ meṅ mujhe apne mazāq kā nishānā banāte haiṅ.
64ai rabb, unheṅ un kī harkatoṅ kā munāsib ajr de!
65un ke zahanoṅ ko kund kar, terī lānat un par ā paṛe!
66un par apnā pūrā ġazab nāzil kar! jab tak vah tere āsmān ke nīche se ġāib na ho jāeṅ un kā tāqqub kartā rah