Yashua 14

kan’ān kī taqsīm

¹isrāīl ke bāqī sāḍhe nau qabīloṅ ko daryā-e-yardan ke maġrib meṅ yānī mulk-e-kan’ān meṅ zamīn mil gaī. is ke liye ilīazar imām, yashūa bin nūn aur qabīloṅ ke ābāī gharānoṅ ke sarbarāhoṅ ne ²qur’ā ḍāl kar muqarrar kiyā ki har qabīle ko kaun kaun sā ilāqā mil jāe. yūṅ vaisā hī huā jis tarah rabb ne mūsā ko hukm diyā thā. ^3-4 mūsā aṛhāī qabīloṅ ko un kī maurūsī zamīn daryā-e-yardan ke mashriq meṅ de chukā thā, kyūṅki yūsuf kī aulād ke do qabīle manassī aur ifrāīm vujūd meṅ āe the. lekin lāviyoṅ ko un ke darmiyān zamīn na mil gaī. isrāīliyoṅ ne lāviyoṅ ko zamīn na dī balki unheṅ sirf rihāish ke liye shahar aur revṛoṅ ke liye charāgāheṅ dīṅ. ⁵yūṅ unhoṅ ne zamīn ko un hī hidāyāt ke mutābiq taqsīm kiyā jo rabb ne mūsā ko dī thīṅ.

kālib habrūn pāne kī guzārish kartā hai

⁶jiljāl meṅ yahūdāh ke qabīle ke mard yashūa ke pās āe. yafunnā qanizzī kā beṭā kālib bhī un ke sāth thā. us ne yashūa se kahā, “āp ko yād hai ki rabb ne mard-e-ḵẖudā mūsā se āp ke aur mere bāre meṅ kyā kuchh kahā jab ham qādis-barnīa meṅ the. ⁷maiṅ 40 sāl kā thā jab rabb ke ḵẖādim mūsā ne mujhe mulk-e-kan’ān kā jāizā lene ke liye qādis-barnīa se bhej diyā. jab vāpas āyā to maiṅ ne mūsā ko diyānatdārī se sab kuchh batāyā jo dekhā thā. ⁸afsos ki jo bhāī mere sāth gae the unhoṅ ne logoṅ ko ḍarāyā. lekin maiṅ rabb apne ḵẖudā kā vafādār rahā. ⁹us din mūsā ne qasam khā kar mujh se vādā kiyā, ‘jis zamīn par tere pāoṅ chale haiṅ vah hameshā tak terī aur terī aulād kī virāsat meṅ rahegī. kyūṅki tū rabb mere ḵẖudā kā vafādār rahā hai.’ ¹⁰aur ab aisā hī huā hai jis tarah rabb ne vādā kiyā thā. us ne mujhe ab tak zindā rahane diyā hai. rabb ko mūsā se yah bāt kie 45 sāl guzar gae haiṅ. us sāre arse meṅ ham registān meṅ ghūmte phirte rahe haiṅ. āj maiṅ 85 sāl kā hūṅ, ¹¹aur ab tak utnā hī tāqatvar hūṅ jitnā ki us vaqt thā jab maiṅ jāsūs thā. ab tak merī bāhar nikalne aur jaṅg karne kī vahī quvvat qāim hai. ¹²ab mujhe vah pahāṛī ilāqā de deṅ jis kā vādā rabb ne us din mujh se kiyā thā. āp ne ḵẖud sunā hai ki anāqī vahāṅ baṛe qil’āband shaharoṅ meṅ baste haiṅ. lekin shāyad rabb mere sāth ho aur maiṅ unheṅ nikāl dūṅ jis tarah us ne farmāyā hai.”

¹³tab yashūa ne kālib bin yafunnā ko barkat de kar use virāsat meṅ habrūn de diyā. ^14-15 pahale habrūn qiryat-arbā yānī arbā kā shahar kahalātā thā. arbā anāqiyoṅ kā sab se baṛā ādmī thā. āj tak yah shahar kālib kī aulād kī milkiyat rahī hai. vajah yah hai ki kālib rabb isrāīl ke ḵẖudā kā vafādār rahā. phir jaṅg ḵẖatm huī, aur mulk meṅ amn-o-amān qāim ho gayā.