Yūhannā 20
ḵẖālī qabr
1hafte kā din guzar gayā to itwār ko mariyam magdalīnī subah-savere qabr ke pās āī. abhī aṅdherā thā. vahāṅ pahuṅch kar us ne dekhā ki qabr ke muṅh par kā patthar ek taraf haṭāyā gayā hai. 2mariyam dauṛ kar shamāūn patras aur īsā ko piyāre shāgird ke pās āī. us ne ittilā dī, “vah ḵẖudāvand ko qabr se le gae haiṅ, aur hameṅ mālūm nahīṅ ki unhoṅ ne use kahāṅ rakh diyā hai.”
3tab patras dūsre shāgird samet qabr kī taraf chal paṛā. 4donoṅ dauṛ rahe the, lekin dūsrā shāgird ziyādā tezraftār thā. vah pahale qabr par pahuṅch gayā. 5us ne jhuk kar andar jhāṅkā to kafan kī paṭṭiyāṅ vahāṅ paṛī nazar āīṅ. lekin vah andar na gayā. 6phir shamāūn patras us ke pīchhe pahuṅch kar qabr meṅ dāḵẖil huā. us ne bhī dekhā ki kafan kī paṭṭiyāṅ vahāṅ paṛī haiṅ 7aur sāth vah kapṛā bhī jis meṅ īsā kā sar lipṭā huā thā. yah kapṛā tah kiyā gayā thā aur paṭṭiyoṅ se alag paṛā thā. 8phir dūsrā shāgird jo pahale pahuṅch gayā thā, vah bhī dāḵẖil huā. jab us ne yah dekhā to vah īmān lāyā. 9(lekin ab bhī vah kalām-e-muqaddas kī yah peshgoī nahīṅ samajhte the ki use murdoṅ meṅ se jī uṭhnā hai.) 10phir donoṅ shāgird ghar vāpas chale gae.
īsā mariyam magdalīnī par zāhir hotā hai
11lekin mariyam ro ro kar qabr ke sāmne khaṛī rahī. aur rote hue us ne jhuk kar qabr meṅ jhāṅkā 12to kyā dekhtī hai ki do farishte safed libās pahane hue vahāṅ baiṭhe haiṅ jahāṅ pahale īsā kī lāsh paṛī thī, ek us ke sirahāne aur dūsrā vahāṅ jahāṅ pahale us ke pāoṅ the. 13unhoṅ ne mariyam se pūchhā, “ai ḵẖātūn, tū kyūṅ ro rahī hai?”
us ne kahā, “vah mere ḵẖudāvand ko le gae haiṅ, aur mālūm nahīṅ ki unhoṅ ne use kahāṅ rakh diyā hai.”
14phir us ne pīchhe muṛ kar īsā ko vahāṅ khaṛe dekhā, lekin us ne use na pahachānā. 15īsā ne pūchhā, “ai ḵẖātūn, tū kyūṅ ro rahī hai, kis ko ḍhūṅḍ rahī hai?”
yah soch kar ki vah mālī hai us ne kahā, “janāb, agar āp use le gae haiṅ to mujhe batā deṅ ki use kahāṅ rakh diyā hai tāki use le jāūṅ.”
16īsā ne us se kahā, “mariyam!”
vah us kī taraf muṛī aur bol uṭhī, “rabbbūnī!” (is kā matlab arāmī zabān meṅ ustād hai.)
17īsā ne kahā, “mere sāth chimṭī na rah, kyūṅki abhī maiṅ ūpar, bāp ke pās nahīṅ gayā. lekin bhāiyoṅ ke pās jā aur unheṅ batā, ‘meṅ apne bāp aur tumhāre bāp ke pās vāpas jā rahā hūṅ, apne ḵẖudā aur tumhāre ḵẖudā ke pās’.”
18chunāṅche mariyam magdalīnī shāgirdoṅ ke pās gaī aur unheṅ ittilā dī, “maiṅ ne ḵẖudāvand ko dekhā hai aur us ne mujh se yah bāteṅ kahīṅ.”
īsā apne shāgirdoṅ par zāhir hotā hai
19us itwār kī shām ko shāgird jamā the. unhoṅ ne darvāzoṅ par tāle lagā die the kyūṅki vah yahūdiyoṅ se ḍarte the. achānak īsā un ke darmiyān ā khaṛā huā aur kahā, “tumhārī salāmatī ho,” 20aur unheṅ apne hāthoṅ aur pahalū ko dikhāyā. ḵẖudāvand ko dekh kar vah nihāyat ḵẖush hue. 21īsā ne dubārā kahā, “tumhārī salāmatī ho! jis tarah bāp ne mujhe bhejā usī tarah maiṅ tum ko bhej rahā hūṅ.” 22phir un par phūṅk kar us ne farmāyā, “rūh-ul-quds ko pā lo. 23agar tum kisī ke gunāhoṅ ko muāf karo to vah muāf kie jāeṅge. aur agar tum unheṅ muāf na karo to vah muāf nahīṅ kie jāeṅge.”
tomā shak kartā hai
24bārah shāgirdoṅ meṅ se tomā jis kā laqab juṛvāṅ thā īsā ke āne par maujūd na thā. 25chunāṅche dūsre shāgirdoṅ ne use batāyā, “ham ne ḵẖudāvand ko dekhā hai!” lekin tomā ne kahā, “mujhe yaqīn nahīṅ ātā. pahale mujhe us ke hāthoṅ meṅ kīloṅ ke nishān nazar āeṅ aur maiṅ un meṅ apnī uṅglī ḍālūṅ, pahale maiṅ apne hāth ko us ke pahalū ke zaḵẖm meṅ ḍālūṅ. phir hī mujhe yaqīn āegā.”
26ek haftā guzar gayā. shāgird dubārā makān meṅ jamā the. is martabā tomā bhī sāth thā. agarchi darvāzoṅ par tāle lage the phir bhī īsā un ke darmiyān ā kar khaṛā huā. us ne kahā, “tumhārī salāmatī ho!” 27phir vah tomā se muḵẖātib huā, “apnī uṅglī ko mere hāthoṅ aur apne hāth ko mere pahalū ke zaḵẖm meṅ ḍāl aur be-etiqād na ho balki īmān rakh.”
28tomā ne javāb meṅ us se kahā, “ai mere ḵẖudāvand! ai mere ḵẖudā!”
29phir īsā ne use batāyā, “kyā tū is liye īmān lāyā hai ki tū ne mujhe dekhā hai? mubārak haiṅ vah jo mujhe dekhe baġair mujh par īmān lāte haiṅ.”
is kitāb kā maqsad
30īsā ne apne shāgirdoṅ kī maujūdgī meṅ mazīd bahut se aise ilāhī nishān dikhāe jo is kitāb meṅ darj nahīṅ haiṅ. 31lekin jitne darj haiṅ un kā maqsad yah hai ki āp īmān lāeṅ ki īsā hī masīh yānī allāh kā farzand hai aur āp ko is īmān ke vasīle se us ke nām se zindagī hāsil ho.