Yūhannā 16

¹maiṅ ne tum ko yah is liye batāyā hai tāki tum gumrāh na ho jāo. ²vah tum ko yahūdī jamāatoṅ se nikāl deṅge, balki vah vaqt bhī āne vālā hai ki jo bhī tum ko mār ḍālegā vah samjhegā, ‘maiṅ ne allāh kī ḵẖidmat kī hai.’ ³vah is qism kī harkateṅ is liye kareṅge ki unhoṅ ne na bāp ko jānā hai, na mujhe. ⁴maiṅ ne tum ko yah bāteṅ is liye batāī haiṅ ki jab un kā vaqt ā jāe to tum ko yād āe ki maiṅ ne tumheṅ āgāh kar diyā thā.

rūh-ul-quds kī ḵẖidmat

maiṅ ne ab tak tum ko yah nahīṅ batāyā kyūṅki maiṅ tumhāre sāth thā. ⁵lekin ab maiṅ us ke pās jā rahā hūṅ jis ne mujhe bhejā hai. to bhī tum meṅ se koī mujh se nahīṅ pūchhtā, ‘āp kahāṅ jā rahe haiṅ?’ ⁶is ke bajāy tumhāre dil ġamzadā haiṅ ki maiṅ ne tum ko aisī bāteṅ batāī haiṅ. ⁷lekin maiṅ tum ko sacch batātā hūṅ ki tumhāre liye fāidāmand hai ki maiṅ jā rahā hūṅ. agar maiṅ na jāūṅ to madadgār tumhāre pās nahīṅ āegā. lekin agar maiṅ jāūṅ to maiṅ use tumhāre pās bhej dūṅgā. ⁸aur jab vah āegā to gunāh, rāstbāzī aur adālat ke bāre meṅ duniyā kī ġaltī ko beniqāb karke yah zāhir karegā : ⁹gunāh ke bāre meṅ yah ki log mujh par īmān nahīṅ rakhte, ¹⁰rāstbāzī ke bāre meṅ yah ki maiṅ bāp ke pās jā rahā hūṅ aur tum mujhe ab se nahīṅ dekhoge, ¹¹aur adālat ke bāre meṅ yah ki is duniyā ke hukmarān kī adālat ho chukī hai.

¹²mujhe tum ko mazīd bahut kuchh batānā hai, lekin is vaqt tum use bardāsht nahīṅ kar sakte. ¹³jab sacchāī kā rūh āegā to vah pūrī sacchāī kī taraf tumhārī rāhanumāī karegā. vah apnī marzī se bāt nahīṅ karegā balki sirf vahī kuchh kahegā jo vah ḵẖud sunegā. vahī tum ko mustaqbil ke bāre meṅ bhī batāegā. ¹⁴aur vah is meṅ mujhe jalāl degā ki vah tum ko vahī kuchh sunāegā jo use mujh se milā hogā. ¹⁵jo kuchh bhī bāp kā hai vah merā hai. is liye maiṅ ne kahā, ‘rūh tum ko vahī kuchh sunāegā jo use mujh se milā hogā.’

ab dukh phir sukh

¹⁶thoṛī der ke bād tum mujhe nahīṅ dekhoge. phir thoṛī der ke bād tum mujhe dubārā dekh loge.”

¹⁷us ke kuchh shāgird āpas meṅ bāt karne lage, “īsā ke yah kahane se kyā murād hai ki ‘thoṛī der ke bād tum mujhe nahīṅ dekhoge, phir thoṛī der ke bād mujhe dubārā dekh loge’? aur is kā kyā matlab hai, ‘maiṅ bāp ke pās jā rahā hūṅ’?” ¹⁸aur vah sochte rahe, “yah kis qism kī ‘thoṛī der’ hai jis kā zikr vah kar rahe haiṅ? ham un kī bāt nahīṅ samajhte.”

¹⁹īsā ne jān liyā ki vah mujh se is ke bāre meṅ savāl karnā chāhate haiṅ. is liye us ne kahā, “kyā tum ek dūsre se pūchh rahe ho ki merī is bāt kā kyā matlab hai ki ‘thoṛī der ke bād tum mujhe nahīṅ dekhoge, phir thoṛī der ke bād mujhe dubārā dekh loge’? ²⁰maiṅ tum ko sacch batātā hūṅ ki tum ro ro kar mātam karoge jabki duniyā ḵẖush hogī. tum ġam karoge, lekin tumhārā ġam ḵẖushī meṅ badal jāegā. ²¹jab kisī aurat ke bacchā paidā hone vālā hotā hai to use ġam aur taklīf hotī hai kyūṅki us kā vaqt ā gayā hai. lekin jūṅ hī bacchā paidā ho jātā hai to māṅ ḵẖushī ke māre ki ek insān duniyā meṅ ā gayā hai apnī tamām musībat bhūl jātī hai. ²²yahī tumhārī hālat hai. kyūṅki ab tum ġamzadā ho, lekin maiṅ tum se dubārā milūṅgā. us vaqt tum ko ḵẖushī hogī, aisī ḵẖushī jo tum se koī chhīn na legā.

²³us din tum mujh se kuchh nahīṅ pūchhoge. maiṅ tum ko sacch batātā hūṅ ki jo kuchh tum mere nām meṅ bāp se māṅgoge vah tum ko degā. ²⁴ab tak tum ne mere nām meṅ kuchh nahīṅ māṅgā. māṅgo to tum ko milegā. phir tumhārī ḵẖushī pūrī ho jāegī.

duniyā par fatah

²⁵maiṅ ne tum ko yah tamsīloṅ meṅ batāyā hai. lekin ek din āegā jab maiṅ aisā nahīṅ karūṅgā. us vaqt maiṅ tamsīloṅ meṅ bāt nahīṅ karūṅgā balki tum ko bāp ke bāre meṅ sāf sāf batā dūṅgā. ²⁶us din tum merā nām le kar māṅgoge. mere kahane kā matlab yah nahīṅ ki maiṅ hī tumhārī ḵẖātir bāp se daraḵẖwāst karūṅgā. ²⁷kyūṅki bāp ḵẖud tum ko piyār kartā hai, is liye ki tum ne mujhe piyār kiyā hai aur īmān lāe ho ki maiṅ allāh meṅ se nikal āyā hūṅ. ²⁸maiṅ bāp meṅ se nikal kar duniyā meṅ āyā hūṅ. aur ab maiṅ duniyā ko chhoṛ kar bāp ke pās vāpas jātā hūṅ.”

²⁹is par us ke shāgirdoṅ ne kahā, “ab āp tamsīloṅ meṅ nahīṅ balki sāf sāf bāt kar rahe haiṅ. ³⁰ab hameṅ samajh āī hai ki āp sab kuchh jānte haiṅ aur ki is kī zarūrat nahīṅ ki koī āp kī pūchhgichh kare. is liye ham īmān rakhte haiṅ ki āp allāh meṅ se nikal kar āe haiṅ.”

³¹īsā ne javāb diyā, “ab tum īmān rakhte ho? ³²dekho, vah vaqt ā rahā hai balki ā chukā hai jab tum tittar-bittar ho jāoge. mujhe akelā chhoṛ kar har ek apne ghar chalā jāegā. to bhī maiṅ akelā nahīṅ hūṅgā kyūṅki bāp mere sāth hai. ³³maiṅ ne tum ko is liye yah bāt batāī tāki tum mujh meṅ salāmatī pāo. duniyā meṅ tum musībat meṅ phaṅse rahate ho. lekin hauslā rakho, maiṅ duniyā par ġālib āyā hūṅ.”