Yarmiyāh 45
bārūk ke liye tasallī kā paiġām
1yahūdāh ke bādshāh yahūyaqīm bin yūsiyāh kī hukūmat ke chauthe sāl meṅ yaramiyāh nabī ko bārūk bin nairiyāh ke liye rabb kā paiġām milā. us vaqt yaramiyāh bārūk se vah tamām bāteṅ likhvā rahā thā jo us par nāzil huī thīṅ. yaramiyāh ne kahā, 2“ai bārūk, rabb isrāīl kā ḵẖudā tere bāre meṅ farmātā hai 3ki tū kahatā hai, ‘hāy, mujh par afsos! rabb ne mere dard meṅ izāfā kar diyā hai, ab mujhe raṅj-o-alam bhī sahanā paṛtā hai. maiṅ karāhate karāhate thak gayā hūṅ. kahīṅ bhī ārām-o-sukūn nahīṅ miltā.’
4ai bārūk, rabb javāb meṅ farmātā hai ki jo kuchh maiṅ ne ḵẖud tāmīr kiyā use maiṅ girā dūṅgā, jo paudā maiṅ ne ḵẖud lagāyā use jaṛ se ukhāṛ dūṅgā. pūre mulk ke sāth aisā hī sulūk karūṅgā. 5to phir tū apne liye kyūṅ baṛī kāmyābī hāsil karne kā ārzūmand hai? aisā ḵẖayāl chhoṛ de, kyūṅki maiṅ tamām insānoṅ par āfat lā rahā hūṅ. yah rabb kā farmān hai. lekin jahāṅ bhī tū jāe vahāṅ maiṅ hone dūṅgā ki terī jān chhūṭ jāe [a] lafzī tarjumā : maiṅ tujhe terī jān ġanīmat ke taur par baḵẖsh dūṅgā. .”