Yarmiyāh 41
ismāīl jidaliyāh gavarnar ko qatl kartā hai
1ismāīl bin nataniyāh bin ilīsmā shāhī nasal kā thā aur pahale shāh-e-yahūdāh kā ālā afsar thā. sātveṅ mahīne [a] sitambar tā aktūbar. meṅ vah das ādmiyoṅ ko apne sāth le kar misfāh meṅ jidaliyāh se milne āyā. jab vah mil kar khānā khā rahe the 2to ismāīl aur us ke das ādmī achānak uṭhe aur apnī talvāroṅ ko khaiṅch kar jidaliyāh ko mār ḍālā. yūṅ ismāīl ne us ādmī ko qatl kiyā jise bābal ke bādshāh ne sūbā yahūdāh par muqarrar kiyā thā. 3us ne misfāh meṅ jidaliyāh ke sāth rahane vāle tamām hamvatanoṅ ko bhī qatl kiyā aur vahāṅ ṭhaharne vāle bābal ke faujiyoṅ ko bhī.
4agle din jab kisī ko mālūm nahīṅ thā ki jidaliyāh ko qatl kiyā gayā hai 5to 80 ādmī vahāṅ pahuṅche jo sikam, sailā aur sāmriyā se ā kar rabb ke tabāhashudā ghar meṅ us kī parastish karne jā rahe the. un ke pās ġallā aur baḵẖūr kī qurbāniyāṅ thīṅ, aur unhoṅ ne ġam ke māre apnī dāṛhiyāṅ muṅḍvā kar apne kapṛe phāṛ liye aur apnī jild ko zaḵẖmī kar diyā thā. 6ismāīl rote rote misfāh se nikal kar un se milne āyā. jab vah un ke pās pahuṅchā to kahane lagā, “jidaliyāh bin aḵẖīqām ke pās āo aur dekho ki kyā huā hai!”
7jūṅ hī vah shahar meṅ dāḵẖil hue to ismāīl aur us ke sāthiyoṅ ne unheṅ qatl karke ek hauz meṅ phaiṅk diyā. 8sirf das ādmī bach gae jab unhoṅ ne ismāīl se kahā, “hameṅ mat qatl karnā, kyūṅki hamāre pās gandum, jau aur shahad ke zaḵẖīre haiṅ jo ham ne khule maidān meṅ kahīṅ chhupā rakhe haiṅ.” yah sun kar us ne unheṅ dūsroṅ kī tarah na mārā balki zindā chhoṛā.
9jis hauz meṅ ismāīl ne mazkūrā ādmiyoṅ kī lāsheṅ phaiṅk dīṅ vah bahut baṛā thā. yahūdāh ke bādshāh āsā ne use us vaqt banvāyā thā jab isrāīlī bādshāh bāshā se jaṅg thī aur vah misfāh ko mazbūt banā rahā thā. ismāīl ne isī hauz ko maqtūloṅ se bhar diyā thā. 10misfāh ke bāqī logoṅ ko us ne qaidī banā liyā. un meṅ yahūdāh ke bādshāh kī beṭiyāṅ aur bāqī vah tamām log shāmil the jin par shāhī muhāfizoṅ ke sardār nabūzarādān ne jidaliyāh bin aḵẖīqām ko muqarrar kiyā thā. phir ismāīl un sab ko apne sāth le kar mulk-e-ammon ke liye ravānā huā.
11lekin yūhanān bin qarīh aur us ke sāthī afsaroṅ ko ittilā dī gaī ki ismāīl se kyā jurm huā hai. 12tab vah apne tamām faujiyoṅ ko jamā karke ismāīl se laṛne ke liye nikle aur us kā tāqqub karte karte use jibaūn ke johaṛ ke pās jā liyā. 13jūṅ hī ismāīl ke qaidiyoṅ ne yūhanān aur us ke afsaroṅ ko dekhā to vah ḵẖush hue. 14sab ne ismāīl ko chhoṛ diyā aur muṛ kar yūhanān ke pās bhāg āe. 15ismāīl āṭh sāthiyoṅ samet farār huā aur yūhanān ke hāth se bach kar mulk-e-ammon meṅ chalā gayā.
16yūṅ misfāh ke bache hue tamām log jibaūn meṅ yūhanān aur us ke sāthī afsaroṅ ke zer-e-nigrānī āe. un meṅ vah tamām faujī, ḵẖavātīn, bacche aur darbārī shāmil the jinheṅ ismāīl ne jidaliyāh ko qatl karne ke bād qaidī banāyā thā. 17lekin vah misfāh vāpas na gae balki āge chalte chalte bait-laham ke qarīb ke gāoṅ banām sarāy-kimhām meṅ ruk gae. vahāṅ vah misr ke liye ravānā hone kī tayyāriyāṅ karne lage, 18kyūṅki vah bābal ke intiqām se ḍarte the, is liye ki jidaliyāh bin aḵẖīqām ko qatl karne se ismāīl bin nataniyāh ne us ādmī ko maut ke ghāṭ utārā thā jise shāh-e-bābal ne yahūdāh kā gavarnar muqarrar kiyā thā.