Yarmiyāh 37
misr sidaqiyāh kī madad nahīṅ kar saktā
1yahūdāh ke bādshāh yahūyākīn [a] ibrānī meṅ yahūyākīn kā mutrādif kūniyāh mustāmal hai. bin yahūyaqīm ko taḵẖt se utārne ke bād shāh-e-bābal nabūkadnazzar ne sidaqiyāh bin yūsiyāh ko taḵẖt par biṭhā diyā. 2lekin na sidaqiyāh, na us ke afsaroṅ yā avām ne un paiġāmāt par dhyān diyā jo rabb ne yaramiyāh nabī kī mārifat farmāe the.
3ek din sidaqiyāh bādshāh ne yahūkal bin salamiyāh aur imām safaniyāh bin māsiyāh ko yaramiyāh ke pās bhejā tāki vah guzārish kareṅ, “meharbānī karke rabb hamāre ḵẖudā se hamārī shafāat kareṅ.”
4yaramiyāh ko ab tak qaid meṅ ḍālā nahīṅ gayā thā, is liye vah āzādī se logoṅ meṅ chal phir saktā thā. 5us vaqt firaaun kī fauj misr se nikal kar isrāīl kī taraf baṛh rahī thī. jab yarūshalam kā muhāsarā karne vālī bābal kī fauj ko yah ḵẖabar milī to vah vahāṅ se pīchhe haṭ gaī. 6tab rabb yaramiyāh nabī se hamkalām huā,
7“rabb isrāīl kā ḵẖudā farmātā hai ki shāh-e-yahūdāh ne tumheṅ merī marzī darayāft karne bhejā hai. use javāb do ki firaaun kī jo fauj tumhārī madad karne ke liye nikal āī hai vah apne mulk vāpas lauṭne ko hai. 8phir bābal ke faujī vāpas ā kar yarūshalam par hamlā kareṅge. vah ise apne qabze meṅ le kar nazar-e-ātish kar deṅge. 9kyūṅki rabb farmātā hai ki yah soch kar dhokā mat khāo ki bābal kī fauj zarūr hameṅ chhoṛ kar chalī jāegī. aisā kabhī nahīṅ hogā! 10ḵẖwāh tum hamlāāvar pūrī bāblī fauj ko shikast kyūṅ na dete aur sirf zaḵẖmī ādmī bache rahate to bhī tum nākām rahate, to bhī yah bāz ek ādmī apne ḵẖaimoṅ meṅ se nikal kar yarūshalam ko nazar-e-ātish karte.”
yaramiyāh ko qaid meṅ ḍālā jātā hai
11jab firaaun kī fauj isrāīl kī taraf baṛhne lagī to bābal ke faujī yarūshalam ko chhoṛ kar pīchhe haṭ gae. 12un dinoṅ meṅ yaramiyāh binyamīn ke qabāilī ilāqe ke liye ravānā huā, kyūṅki vah apne rishtedāroṅ ke sāth koī maurūsī milkiyat taqsīm karnā chāhatā thā. lekin jab vah shahar se nikalte hue 13binyamīn ke darvāze tak pahuṅch gayā to paharedāroṅ kā ek afsar use pakaṛ kar kahane lagā, “tum bhagoṛe ho! tum bābal kī fauj ke pās jānā chāhate ho!” afsar kā nām iriyāh bin salamiyāh bin hananiyāh thā. 14yaramiyāh ne etirāz kiyā, “yah jhūṭ hai, maiṅ bhagoṛā nahīṅ hūṅ! maiṅ bābal kī fauj ke pās nahīṅ jā rahā.” lekin iriyāh na mānā balki use giriftār karke sarkārī afsaroṅ ke pās le gayā. 15use dekh kar unheṅ yaramiyāh par ġussā āyā, aur vah us kī piṭāī karā kar use shāhī muharrir yūntan ke ghar meṅ lāe jise unhoṅ ne qaidḵẖānā banāyā thā. 16vahāṅ use ek zamīnadoz kamre meṅ ḍāl diyā gayā jo pahale hauz thā aur jis kī chhat meharābdār thī. vah mut’addid din us meṅ band rahā.
17ek din sidaqiyāh ne use mahal meṅ bulāyā. vahāṅ alāhidagī meṅ us se pūchhā, “kyā rabb kī taraf se mere liye koī paiġām hai?” yaramiyāh ne javāb diyā, “jī hāṅ. āp ko shāh-e-bābal ke havāle kiyā jāegā.” 18tab yaramiyāh ne sidaqiyāh bādshāh se apnī bāt jārī rakh kar kahā, “mujh se kyā jurm huā hai? maiṅ ne āp ke afsaroṅ aur avām ke ḵẖilāf kyā qusūr kiyā hai ki mujhe jel meṅ ḍalvā diyā? 19āp ke vah nabī kahāṅ haiṅ jinhoṅ ne āp ko peshgoī sunāī ki shāh-e-bābal na āp par, na is mulk par hamlā karegā? 20ai mere mālik aur bādshāh, meharbānī karke merī bāt suneṅ, merī guzārish pūrī kareṅ! mujhe yūntan muharrir ke ghar meṅ vāpas na bhejeṅ, varnā maiṅ mar jāūṅgā.”
21tab sidaqiyāh bādshāh ne hukm diyā ki yaramiyāh ko shāhī muhāfizoṅ ke sahan meṅ rakhā jāe. us ne yah hidāyat bhī dī ki jab tak shahar meṅ roṭī dastayāb ho yaramiyāh ko nānbāī-galī se har roz ek roṭī miltī rahe. chunāṅche yaramiyāh muhāfizoṅ ke sahan meṅ rahane lagā.