Yarmiyāh 15

sazā zarūr āegī, kyūṅki der ho gaī hai

¹phir rabb mujh se hamkalām huā, “ab se merā dil is qaum kī taraf māil nahīṅ hogā, ḵẖwāh mūsā aur samūel mere sāmne ā kar un kī shafāat kyūṅ na kareṅ. unheṅ mere huzūr se nikāl de, vah chale jāeṅ! ²agar vah tujh se pūchheṅ, ‘ham kidhar jāeṅ?’ to unheṅ javāb de, ‘rabb farmātā hai ki jise marnā hai vah mare, jise talvār kī zad meṅ ānā hai vah talvār kā luqmā bane, jise bhūkoṅ marnā hai vah bhūkoṅ mare, jise qaid meṅ jānā hai vah qaid ho jāe’.” ³rabb farmātā hai, “maiṅ unheṅ chār qism kī sazā dūṅgā. ek, talvār unheṅ qatl karegī. dūsre, kutte un kī lāsheṅ ghasīṭ kar le jāeṅge. tīsre aur chauthe, parinde aur darinde unheṅ khā khā kar ḵẖatm kar deṅge. ⁴jab maiṅ apnī qaum se nipaṭ lūṅgā to duniyā ke tamām mamālik us kī hālat dekh kar kāṁp uṭheṅge. un ke roṅgṭe khaṛe ho jāeṅge jab vah yahūdāh ke bādshāh manassī bin hizaqiyāh kī un sharīr harkatoṅ kā anjām dekheṅge jo us ne yarūshalam meṅ kī haiṅ.

⁵ai yarūshalam, kaun tujh par taras khāegā, kaun hamdardī kā izhār karegā? kaun tere ghar ā kar terā hāl pūchhegā?” ⁶rabb farmātā hai, “tū ne mujhe radd kiyā, apnā muṅh mujh se pher liyā hai. ab maiṅ apnā hāth tere ḵẖilāf baṛhā kar tujhe tabāh kar dūṅgā. kyūṅki maiṅ hamdardī dikhāte dikhāte taṅg ā gayā hūṅ.

⁷jis tarah gandum ko havā meṅ uchhāl kar bhūse se alag kiyā jātā hai usī tarah maiṅ unheṅ mulk ke darvāzoṅ ke sāmne phaṭkūṅgā. chūṅki merī qaum ne apne ġalat rāstoṅ ko tark na kiyā is liye maiṅ use beaulād banā kar barbād kar dūṅgā. ⁸us kī bevāeṅ samundar kī ret jaisī beshumār hoṅgī. dopahar ke vaqt hī maiṅ naujvānoṅ kī māoṅ par tabāhī nāzil karūṅgā, achānak hī un par pech-o-tāb aur dahshat chhā jāegī. ⁹sāt bacchoṅ kī māṅ niḍhāl ho kar jān se hāth dho baiṭhegī. din ke vaqt hī us kā sūraj ḍūb jāegā, us kā faḵẖar aur izzat jātī rahegī. jo log bach jāeṅge unheṅ maiṅ dushman ke āge āge talvār se mār ḍālūṅgā.” yah rabb kā farmān hai.

yaramiyāh rabb se shikāyat kartā hai

¹⁰ai merī māṅ, mujh par afsos! afsos ki tū ne mujh jaise shaḵẖs ko janm diyā jis ke sāth pūrā mulk jhagaṛtā aur laṛtā hai. go maiṅ ne na udhār diyā na liyā to bhī sab mujh par lānat karte haiṅ. ¹¹rabb ne javāb diyā, “yaqīnan maiṅ tujhe mazbūt karke apnā acchhā maqsad pūrā karūṅgā. yaqīnan maiṅ hone dūṅgā ki musībat ke vaqt dushman tujh se minnat kare.

¹²kyūṅki koī us lohe ko toṛ nahīṅ sakegā jo shimāl se āegā, hāṅ lohe aur pītal kā vah sariyā toṛā nahīṅ jāegā. ¹³maiṅ tere ḵẖazāne dushman ko muft meṅ dūṅgā. tujhe tamām gunāhoṅ kā ajr milegā jab vah pūre mulk meṅ terī daulat lūṭne āegā. ¹⁴tab maiṅ tujhe dushman ke zarīe ek mulk meṅ pahuṅchā dūṅgā jis se tū nāvāqif hai. kyūṅki mere ġazab kī bhaṛaktī āg tujhe bhasm kar degī.”

¹⁵ai rabb, tū sab kuchh jāntā hai. mujhe yād kar, merā ḵẖayāl kar, tāqqub karne vāloṅ se merā intiqām le! unheṅ yahāṅ tak bardāsht na kar ki āḵẖirkār merā safāyā ho jāe. ise dhyān meṅ rakh ki merī rusvāī terī hī ḵẖātir ho rahī hai. ¹⁶ai rabb, lashkaroṅ ke ḵẖudā, jab bhī terā kalām mujh par nāzil huā to maiṅ ne use hazam kiyā, aur merā dil us se ḵẖush-o-ḵẖurram huā. kyūṅki mujh par tere hī nām kā ṭhappā lagā hai. ¹⁷jab dīgar log raṅgraliyoṅ meṅ apne dil bahalāte the to maiṅ kabhī un ke sāth na baiṭhā, kabhī un kī bātoṅ se lutf’andoz na huā. nahīṅ, terā hāth mujh par thā, is liye maiṅ dūsroṅ se dūr hī baiṭhā rahā. kyūṅki tū ne mere dil ko qaum par qahar se bhar diyā thā. ¹⁸kyā vajah hai ki merā dard kabhī ḵẖatm nahīṅ hotā, ki merā zaḵẖm lāilāj hai aur kabhī nahīṅ bhartā? tū mere liye farebdih chashmā ban gayā hai, aisī nadī jis ke pānī par etimād nahīṅ kiyā jā saktā.

¹⁹rabb javāb meṅ farmātā hai, “agar tū mere pās vāpas āe to maiṅ tujhe vāpas āne dūṅgā, aur tū dubārā mere sāmne hāzir ho sakegā. aur agar tū fuzūl bāteṅ na kare balki mere lāiq alfāz bole to merā tarjumān hogā. lāzim hai ki log terī taraf rujū kareṅ, lekin ḵẖabardār, kabhī un kī taraf rujū na kar!” ²⁰rabb farmātā hai, “maiṅ tujhe pītal kī mazbūt dīvār banā dūṅgā tāki tū is qaum kā sāmnā kar sake. yah tujh se laṛeṅge lekin tujh par ġālib nahīṅ āeṅge, kyūṅki maiṅ tere sāth hūṅ, maiṅ terī madad karke tujhe bachāe rakhūṅgā. ²¹maiṅ tujhe bedīnoṅ ke hāth se bachāūṅgā aur fidyā de kar zālimoṅ kī girift se chhuṛāūṅgā.”