Yāqūb 4
duniyā se dostī
1yah laṛāiyāṅ aur jhagṛe jo āp ke darmiyān haiṅ kahāṅ se āte haiṅ? kyā in kā sarchashmā vah burī ḵẖwāhishāt nahīṅ jo āp ke āzā meṅ laṛtī rahatī haiṅ? 2āp kisī chīz kī ḵẖwāhish rakhte haiṅ, lekin use hāsil nahīṅ kar sakte. āp qatl aur hasad karte haiṅ, lekin jo kuchh āp chāhate haiṅ vah pā nahīṅ sakte. āp jhagaṛte aur laṛte haiṅ. to bhī āp ke pās kuchh nahīṅ hai, kyūṅki āp allāh se māṅgte nahīṅ. 3aur jab āp māṅgte haiṅ to āp ko kuchh nahīṅ miltā. vajah yah hai ki āp ġalat nīyat se māṅgte haiṅ. āp is se apnī ḵẖudġaraz ḵẖwāhishāt pūrī karnā chāhate haiṅ. 4bevafā logo! kyā āp ko nahīṅ mālūm ki duniyā kā dost allāh kā dushman hotā hai? jo duniyā kā dost bannā chāhatā hai vah allāh kā dushman ban jātā hai. 5yā kyā āp samajhte haiṅ ki kalām-e-muqaddas kī yah bāt betukī sī hai ki allāh ġairat se us rūh kā ārzūmand hai jis ko us ne hamāre andar sukūnat karne diyā? 6lekin vah hameṅ is se kahīṅ ziyādā fazl baḵẖshtā hai. kalām-e-muqaddas yūṅ farmātā hai, “allāh maġrūroṅ kā muqāblā kartā lekin farotanoṅ par meharbānī kartā hai.”
7ġaraz, allāh ke tābe ho jāeṅ. iblīs kā muqāblā kareṅ to vah bhāg jāegā. 8allāh ke qarīb ā jāeṅ to vah āp ke qarīb āegā. gunāhagāro, apne hāthoṅ ko pāk-sāf kareṅ. dodilo, apne diloṅ ko maḵẖsūs-o-muqaddas kareṅ. 9afsos kareṅ, mātam kareṅ, ḵẖūb roeṅ. āp kī haṅsī mātam meṅ badal jāe aur āp kī ḵẖushī māyūsī meṅ. 10apne āp ko ḵẖudāvand ke sāmne nīchā kareṅ to vah āp ko sarfarāz karegā.
ek dūsre kā munsif mat bannā
11bhāiyo, ek dūsre par tuhamat mat lagānā. jo apne bhāī par tuhamat lagātā yā use mujrim ṭharrātā hai vah sharīat par tuhamat lagātā hai aur sharīat ko mujrim ṭhaharātā hai. aur jab āp sharīat par tuhamat lagāte haiṅ to āp us ke pairokār nahīṅ rahate balki us ke munsif ban gae haiṅ. 12sharīat dene vālā aur munsif sirf ek hī hai aur vah hai allāh jo najāt dene aur halāk karne ke qābil hai. to phir āp kaun haiṅ jo apne āp ko munsif samajh kar apne paṛosī ko mujrim ṭhaharā rahe haiṅ!
sheḵẖī mat mārnā
13aur ab merī bāt suneṅ, āp jo kahate haiṅ, “āj yā kal ham fulāṅ fulāṅ shahar meṅ jāeṅge. vahāṅ ham ek sāl ṭhahar kar kārobār karke paise kamāeṅge.” 14dekheṅ, āp yah bhī nahīṅ jānte ki kal kyā hogā. āp kī zindagī chīz hī kiyā hai! āp bhāp hī haiṅ jo thoṛī der ke liye nazar ātī, phir ġāib ho jātī hai. 15balki āp ko yah kahanā chāhie, “agar ḵẖudāvand kī marzī huī to ham jieṅge aur yah yā vah kareṅge.” 16lekin filahāl āp sheḵẖī mār kar apne ġarūr kā izhār karte haiṅ. is qism kī tamām sheḵẖībāzī burī hai.
17chunāṅche jo jāntā hai ki use kyā kyā nek kām karnā hai, lekin phir bhī kuchh nahīṅ kartā vah gunāh kartā hai.