Yāqūb 3

zabān

¹mere bhāiyo, āp meṅ se ziyādā ustād na baneṅ. āp ko mālūm hai ki ham ustādoṅ kī ziyādā saḵẖtī se adālat kī jāegī. ²ham sab se to kaī tarah kī ġaltiyāṅ sarzad hotī haiṅ. lekin jis shaḵẖs se bolne meṅ kabhī ġaltī nahīṅ hotī vah kāmil hai aur apne pūre badan ko qābū meṅ rakhne ke qābil hai. ³ham ghoṛe ke muṅh meṅ lagām kā dahānā rakh dete haiṅ tāki vah hamāre hukm par chale, aur is tarah ham apnī marzī se us kā pūrā jism chalā lete haiṅ. ⁴yā bādbānī jahāz ko misāl leṅ. jitnā bhī baṛā vah ho aur jitnī bhī tez havā chaltī ho nāḵẖudā ek chhoṭī sī patvār ke zarīe us kā ruḵẖ ṭhīk rakhtā hai. yūṅ hī vah use apnī marzī se chalā letā hai. ⁵isī tarah zabān ek chhoṭā sā uzv hai, lekin vah baṛī baṛī bāteṅ kartī hai.

dekheṅ, ek baṛe jaṅgal ko bhasm karne ke liye ek hī chiṅgārī kāfī hotī hai. ⁶zabān bhī āg kī mānind hai. badan ke dīgar āzā ke darmiyān rah kar us meṅ nārāstī kī pūrī duniyā pāī jātī hai. vah pūre badan ko ālūdā kar detī hai, hāṅ insān kī pūrī zindagī ko āg lagā detī hai, kyūṅki vah ḵẖud jahannum kī āg se sulgāī gaī hai. ⁷dekheṅ, insān har qism ke jānvaroṅ par qābū pā letā hai aur us ne aisā kiyā bhī hai, ḵẖwāh jaṅglī jānvar hoṅ yā parinde, reṅgne vāle hoṅ yā samundarī jānvar. ⁸lekin zabān par koī qābū nahīṅ pā saktā, is betāb aur sharīr chīz par jo muhalak zahar se labālab bharī hai. ⁹zabān se ham apne ḵẖudāvand aur bāp kī sitāish bhī karte haiṅ aur dūsroṅ par lānat bhī bhejte haiṅ, jinheṅ allāh kī sūrat par banāyā gayā hai. ¹⁰ek hī muṅh se sitāish aur lānat nikaltī hai. mere bhāiyo, aisā nahīṅ honā chāhie. ¹¹yah kaise ho saktā hai ki ek hī chashme se mīṭhā aur kaṛvā pānī phūṭ nikle. ¹²mere bhāiyo, kyā anjīr ke daraḵẖt par zaitūn lag sakte haiṅ yā aṅgūr kī bel par anjīr? hargiz nahīṅ! isī tarah namkīn chashme se mīṭhā pānī nahīṅ nikal saktā.

āsmān se hikmat

¹³kyā āp meṅ se koī dānā aur samajhdār hai? vah yah bāt apne acchhe chāl-chalan se zāhir kare, hikmat se paidā hone vālī halīmī ke nek kāmoṅ se. ¹⁴lekin ḵẖabardār! agar āp dil meṅ hasad kī kaṛavāhaṭ aur ḵẖudġarzī pāl rahe haiṅ to is par sheḵẖī mat mārnā, na sacchāī ke ḵẖilāf jhūṭ boleṅ. ¹⁵aisā faḵẖar āsmān kī taraf se nahīṅ hai, balki duniyāvī, ġairruhānī aur iblīs se hai. ¹⁶kyūṅki jahāṅ hasad aur ḵẖudġarzī hai vahāṅ fasād aur har sharīr kām pāyā jātā hai. ¹⁷āsmān kī hikmat farq hai. avval to vah pāk aur muqaddas hai. nīz vah amnapasand, narmdil, faramāṁbardār, raham aur acchhe phal se bharī huī, ġairjānibdār aur ḵẖulūsdil hai. ¹⁸aur jo sulah karāte haiṅ un ke liye rāstbāzī kā phal salāmatī se boyā jātā hai.