Yāqūb 2

tāssub se ḵẖabardār

¹mere bhāiyo, lāzim hai ki āp jo hamāre jalālī ḵẖudāvand īsā masīh par īmān rakhte haiṅ jānibdārī na dikhāeṅ. ²farz kareṅ ki ek ādmī sone kī aṅgūṭhī aur shāndār kapṛe pahane hue āp kī jamāat meṅ ā jāe aur sāth sāth ek ġarīb ādmī bhī maile-kuchaile kapṛe pahane hue andar āe. ³aur āp shāndār kapṛe pahane hue ādmī par ḵẖās dhyān de kar us se kaheṅ, “yahāṅ is acchhī kursī par tashrīf rakheṅ,” lekin ġarīb ādmī ko kaheṅ, “vahāṅ khaṛā ho jā” yā “ā, mere pāoṅ ke pās farsh par baiṭh jā.” ⁴kyā āp aisā karne se mujrimānā ḵẖayālāt vāle munsif nahīṅ sābit hue? kyūṅki āp ne logoṅ meṅ nārvā farq kiyā hai.

⁵mere azīz bhāiyo, suneṅ! kyā allāh ne unheṅ nahīṅ chunā jo duniyā kī nazar meṅ ġarīb haiṅ tāki vah īmān meṅ daulatmand ho jāeṅ? yahī log vah bādshāhī mīrās meṅ pāeṅge jis kā vādā allāh ne un se kiyā hai jo use piyār karte haiṅ. ⁶lekin āp ne zarūratmandoṅ kī beizzatī kī hai. zarā soch leṅ, vah kaun haiṅ jo āp ko dabāte aur adālat meṅ ghasīṭ kar le jāte haiṅ? kyā yah daulatmand hī nahīṅ haiṅ? ⁷vahī to īsā par kufr bakte haiṅ, us azīm nām par jis ke pairokār āp ban gae haiṅ.

⁸allāh chāhatā hai ki āp kalām-e-muqaddas meṅ mazkūr shāhī sharīat pūrī kareṅ, “apne paṛosī se vaisī muhabbat rakhnā jaisī tū apne āp se rakhtā hai.” ⁹chunāṅche jab āp jānibdārī dikhāte haiṅ to gunāh karte haiṅ aur sharīat āp ko mujrim ṭhaharātī hai. ¹⁰mat bhūlnā ki jis ne sharīat kā sirf ek hukm toṛā hai vah pūrī sharīat kā qusūrvār ṭhahartā hai. ¹¹kyūṅki jis ne farmāyā, “zinā na karnā” us ne yah bhī kahā, “qatl na karnā.” ho saktā hai ki āp ne zinā to na kiyā ho, lekin kisī ko qatl kiyā ho. to bhī āp us ek jurm kī vajah se pūrī sharīat toṛne ke mujrim ban gae haiṅ. ¹²chunāṅche jo kuchh bhī āp kahate aur karte haiṅ yād rakheṅ ki āzād karne vālī sharīat āp kī adālat karegī. ¹³kyūṅki allāh adālat karte vaqt us par raham nahīṅ karegā jis ne ḵẖud raham nahīṅ dikhāyā. lekin raham adālat par ġālib ā jātā hai. jab āp raham kareṅge to allāh āp par raham karegā.

īmān nek kāmoṅ ke baġair murdā hai

¹⁴mere bhāiyo, agar koī īmān rakhne kā dāvā kare, lekin us ke mutābiq zindagī na guzāre to us kā kyā fāidā hai? kyā aisā īmān use najāt dilā saktā hai? ¹⁵farz kareṅ ki koī bhāī yā bahan kapṛoṅ aur rozmarrā roṭī kī zarūratmand ho. ¹⁶yah dekh kar āp meṅ se koī us se kahe, “acchhā jī, ḵẖudā hāfiz. garm kapṛe pahano aur jī bhar kar khānā khāo.” lekin vah ḵẖud yah zarūriyāt pūrī karne meṅ madad na kare. kyā is kā koī fāidā hai? ¹⁷ġaraz, mahaz īmān kāfī nahīṅ. agar vah nek kāmoṅ se amal meṅ na lāyā jāe to vah murdā hai.

¹⁸ho saktā hai koī etirāz kare, “ek shaḵẖs ke pās to īmān hotā hai, dūsre ke pās nek kām.” āeṅ, mujhe dikhāeṅ ki āp nek kāmoṅ ke baġair kis tarah īmān rakh sakte haiṅ. yah to nāmumkin hai. lekin maiṅ zarūr āp ko apne nek kāmoṅ se dikhā saktā hūṅ ki maiṅ īmān rakhtā hūṅ. ¹⁹acchhā, āp kahate haiṅ, “ham īmān rakhte haiṅ ki ek hī ḵẖudā hai.” shābāsh, yah bilkul sahīh hai. shayātīn bhī yah īmān rakhte haiṅ, go vah yah jān kar ḵẖauf ke māre thartharāte haiṅ. ²⁰hosh meṅ āeṅ! kyā āp nahīṅ samajhte ki nek āmāl ke baġair īmān bekār hai? ²¹hamāre bāp ibrāhīm par ġaur kareṅ. vah to isī vajah se rāstbāz ṭhaharāyā gayā ki us ne apne beṭe ishāq ko qurbāngāh par pesh kiyā. ²²āp ḵẖud dekh sakte haiṅ ki us kā īmān aur nek kām mil kar amal kar rahe the. us kā īmān to us se mukammal huā jo kuchh us ne kiyā ²³aur is tarah hī kalām-e-muqaddas kī yah bāt pūrī huī, “ibrāhīm ne allāh par bharosā rakhā. is binā par allāh ne use rāstbāz qarār diyā.” isī vajah se vah “allāh kā dost” kahalāyā. ²⁴yūṅ āp ḵẖud dekh sakte haiṅ ki insān apne nek āmāl kī binā par rāstbāz qarār diyā jātā hai, na ki sirf īmān rakhne kī vajah se.

²⁵rāhab fāhishā kī misāl bhī leṅ. use bhī apne kāmoṅ kī binā par rāstbāz qarār diyā gayā jab us ne isrāīlī jāsūsoṅ kī mehamān-navāzī kī aur unheṅ shahar se nikalne kā dūsrā rāstā dikhā kar bachāyā.

²⁶ġaraz, jis tarah badan rūh ke baġair murdā hai usī tarah īmān bhī nek āmāl ke baġair murdā hai.