Yāqūb 1
1yah ḵẖat allāh aur ḵẖudāvand īsā masīh ke ḵẖādim yāqūb kī taraf se hai.
ġairyahūdī qaumoṅ meṅ bikhre hue bārah isrāīlī qabīloṅ ko salām.
īmān aur hikmat
2mere bhāiyo, jab āp ko tarah tarah kī āzmāishoṅ kā sāmnā karnā paṛe to apne āp ko ḵẖushqismat samjheṅ, 3kyūṅki āp jānte haiṅ ki āp ke īmān ke āzmāe jāne se sābitqadmī paidā hotī hai. 4chunāṅche sābitqadmī ko baṛhne deṅ, kyūṅki jab vah takmīl tak pahuṅchegī to āp bāliġ aur kāmil ban jāeṅge, aur āp meṅ koī bhī kamī nahīṅ pāī jāegī. 5lekin agar āp meṅ se kisī meṅ hikmat kī kamī ho to allāh se māṅge jo sab ko fayyāzī se aur baġair jhiṛkī die detā hai. vah zarūr āp ko hikmat degā. 6lekin apnī guzārish īmān ke sāth pesh kareṅ aur shak na kareṅ, kyūṅki shak karne vālā samundar kī mauj kī mānind hotā hai jo havā se idhar udhar uchhaltī bahatī jātī hai. 7aisā shaḵẖs na samjhe ki mujhe ḵẖudāvand se kuchh milegā, 8kyūṅki vah dodilā aur apne har kām meṅ ġairmustaqilamizāj hai.
ġurbat aur daulat
9pastahāl bhāī masīh meṅ apne ūṅche martbe par faḵẖar kare 10jabki daulatmand shaḵẖs apne adnā martbe par faḵẖar kare, kyūṅki vah jaṅglī phūl kī tarah jald hī jātā rahegā. 11jab sūraj tulū hotā hai to us kī jhulsā dene vālī dhūp meṅ paudā murjhā jātā, us kā phūl gir jātā aur us kī tamām ḵẖūbsūrtī ḵẖatm ho jātī hai. us tarah daulatmand shaḵẖs bhī kām karte karte murjhā jāegā.
āzmāish
12mubārak hai vah jo āzmāish ke vaqt sābitqadam rahatā hai, kyūṅki qāim rahane par use zindagī kā vah tāj milegā jis kā vādā allāh ne un se kiyā hai jo us se muhabbat rakhte haiṅ. 13āzmāish ke vaqt koī na kahe ki allāh mujhe āzmāish meṅ phaṅsā rahā hai. na to allāh ko burāī se āzmāish meṅ phaṅsāyā jā saktā hai, na vah kisī ko phaṅsātā hai. 14balki har ek kī apnī burī ḵẖwāhishāt use khaiṅch kar aur uksā kar āzmāish meṅ phaṅsā detī haiṅ. 15phir yah ḵẖwāhishāt hāmilā ho kar gunāh ko janm detī haiṅ aur gunāh bāliġ ho kar maut ko janm detā hai.
16mere azīz bhāiyo, fareb mat khānā! 17har acchhī nemat aur har acchhā tuhfā āsmān se nāzil hotā hai, nūroṅ ke bāp se, jis meṅ na kabhī tabdīlī ātī hai, na badalte hue sāiyoṅ kī sī hālat pāī jātī hai. 18usī ne apnī marzī se hameṅ sacchāī ke kalām ke vasīle se paidā kiyā. yūṅ ham ek tarah se us kī tamām maḵẖlūqāt kā pahalā phal haiṅ.
sunnā kāfī nahīṅ hai
19mere azīz bhāiyo, is kā ḵẖayāl rakhnā, har shaḵẖs sunne meṅ tez ho, lekin bolne aur ġussā karne meṅ dhīmā. 20kyūṅki insān kā ġussā vah rāstbāzī paidā nahīṅ kartā jo allāh chāhatā hai. 21chunāṅche apnī zindagī kī gandī ādateṅ aur sharīr chāl-chalan dūr karke halīmī se kalām-e-muqaddas kā vah bīj qabūl kareṅ jo āp ke andar boyā gayā hai, kyūṅki yahī āp ko najāt de saktā hai.
22kalām-e-muqaddas ko na sirf suneṅ balki us par amal bhī kareṅ, varnā āp apne āp ko fareb deṅge. 23jo kalām ko sun kar us par amal nahīṅ kartā vah us ādmī kī mānind hai jo āīne meṅ apne chihare par nazar ḍāltā hai. 24apne āp ko dekh kar vah chalā jātā hai aur fauran bhūl jātā hai ki maiṅ ne kiyā kuchh dekhā. 25us kī nisbat vah mubārak hai jo āzād karne vālī kāmil sharīat meṅ ġaur se nazar ḍāl kar us meṅ qāim rahatā hai aur use sunne ke bād nahīṅ bhūltā balki us par amal kartā hai.
26kyā āp apne āp ko dīndār samajhte haiṅ? agar āp apnī zabān par qābū nahīṅ rakh sakte to āp apne āp ko fareb dete haiṅ. phir āp kī dīndārī kā izhār bekār hai. 27ḵẖudā bāp kī nazar meṅ dīndārī kā pāk aur bedāġ izhār yah hai, yatīmoṅ aur bevāoṅ kī dekh-bhāl karnā jab vah musībat meṅ hoṅ aur apne āp ko duniyā kī ālūdgī se bachāe rakhnā.