Yashāyāh 8
jald hī lūṭ-khasūṭ
1rabb mujh se hamkalām huā, “ek baṛā taḵẖtā le kar us par sāf alfāz meṅ likh de, ‘jald hī lūṭ-khasūṭ, sur’at se ġāratagarī’.” 2maiṅ ne ūriyāh imām aur zakariyāh bin yabarakiyāh kī maujūdgī meṅ aisā hī likh diyā, kyūṅki donoṅ motbar gavāh the.
3us vaqt jab maiṅ apnī bīvī nabiyā ke pās gayā to vah ummīd se huī. beṭā paidā huā, aur rabb ne mujhe hukm diyā, “is kā nām ‘jald hī lūṭ-khasūṭ, sur’at se ġāratagarī’ rakh. 4kyūṅki is se pahale ki laṛkā ‘abbū’ yā ‘ammī’ kah sake damishq kī daulat aur sāmriyā kā māl-o-asbāb chhīn liyā gayā hogā, asūr ke bādshāh ne sab kuchh lūṭ liyā hogā.”
shiloḵẖ kā pānī radd karne kā burā anjām
5ek bār phir rabb mujh se hamkalām huā, 6“yah log yarūshalam meṅ ārām se bahane vāle shiloḵẖ nāle kā pānī mustarad karke razīn aur fiqah bin ramaliyāh se ḵẖush haiṅ. 7is liye rabb un par daryā-e-furāt kā zabardast sailāb lāegā, asūr kā bādshāh apnī tamām shān-o-shaukat ke sāth un par ṭūṭ paṛegā. us kī tamām daryāī shāḵẖeṅ apne kināroṅ se nikal kar 8sailāb kī sūrat meṅ yahūdāh par se guzareṅgī. ai immānūel, pānī parinde kī tarah apne paroṅ ko phailā kar tere pūre mulk ko ḍhāṁp legā, aur log gale tak us meṅ ḍūb jāeṅge.”
9ai qaumo, beshak jaṅg ke nāre lagāo. tum phir bhī chiknā-chūr ho jāogī. ai dūrdarāz mamālik ke tamām bāshindo, dhyān do! beshak jaṅg ke liye tayyāriyāṅ karo. tum phir bhī pāsh pāsh ho jāoge. kyūṅki jaṅg ke liye tayyāriyāṅ karne ke bāvujūd bhī tumheṅ kuchlā jāegā. 10jo bhī mansūbā tum bāndho, bāt nahīṅ banegī. āpas meṅ jo bhī faislā karo, tum nākām ho jāoge, kyūṅki allāh hamāre sāth hai [a] ibrānī meṅ immānūel likhā hai, dekhie 7:14 kā fuṭnoṭ. .
rabb nabī ko qaum ke bāre meṅ āgāh kartā hai
11jis vaqt rabb ne mujhe mazbūtī se pakaṛ liyā us vaqt us ne mujhe is qaum kī rāhoṅ par chalne se ḵẖabardār kiyā. us ne farmāyā, 12“har bāt ko sāzish mat samajhnā jo yah qaum sāzish samajhtī hai. jis se yah log ḍarte haiṅ us se na ḍarnā, na dahshat khānā 13balki rabb-ul-afwāj se ḍaro. usī se dahshat khāo aur usī ko quddūs māno. 14tab vah isrāīl aur yahūdāh kā maqdis hogā, ek aisā patthar jo ṭhokar kā bāis banegā, ek chaṭān jo ṭhes lagne kā sabab hogī. yarūshalam ke bāshinde us ke phaṅde aur jāl meṅ ulajh jāeṅge. 15un meṅ se bahut sāre ṭhokar khāeṅge. vah gir kar pāsh pāsh ho jāeṅge aur phaṅde meṅ phaṅs kar pakṛe jāeṅge.”
rabb kā kalām shāgirdoṅ ke havāle karnā hai
16mujhe mukāshfe ko liphāphe meṅ ḍāl kar mahfūz rakhnā hai, apne shāgirdoṅ ke darmiyān hī allāh kī hidāyat par muhar lagānī hai. 17maiṅ ḵẖud rabb ke intizār meṅ rahūṅgā jis ne apne chihare ko yāqūb ke gharāne se chhupā liyā hai. usī se maiṅ ummīd rakhūṅgā.
18ab maiṅ hāzir hūṅ, maiṅ aur vah bacche jo allāh ne mujhe die haiṅ, ham isrāīl meṅ ilāhī aur mojizānā nishān haiṅ jin se rabb-ul-afwāj jo koh-e-siyyūn par sukūnat kartā hai logoṅ ko āgāh kar rahā hai.
19log tumheṅ mashvrā dete haiṅ, “jāo, murdoṅ se rābitā karne vāloṅ aur qismat kā hāl batāne vāloṅ se patā karo, un se jo bārīk āvāzeṅ nikālte aur buṛabuṛāte hue javāb dete haiṅ.” lekin un se kaho, “kyā munāsib nahīṅ ki qaum apne ḵẖudā se mashvrā kare? ham zindoṅ kī ḵẖātir mardoṅ se bāt kyūṅ kareṅ?”
20allāh kī hidāyat aur mukāshfā kī taraf rujū karo! jo inkār kare us par subah kī raushnī kabhī nahīṅ chamkegī. 21aise log māyūs aur fāqākash hālat meṅ mulk meṅ māre māre phireṅge. aur jab bhūkoṅ marne ko hoṅge to jhuṅjhlā kar apne bādshāh aur apne ḵẖudā par lānat kareṅge. vah ūpar āsmān 22aur nīche zamīn kī taraf dekheṅge, lekin jahāṅ bhī nazar paṛe vahāṅ musībat, aṅdherā aur haulnāk tārīkī hī dikhāī degī. unheṅ tārīkī hī tārīkī meṅ ḍāl diyā jāegā.