Yashāyāh 48

rabb apne nām kī ḵẖātir isrāīl ko bachāegā

¹ai yāqūb ke gharāne, suno! tum jo isrāīl kahalāte aur yahūdāh ke qabīle ke ho, dhyān do! tum jo rabb ke nām kī qasam khā kar isrāīl ke ḵẖudā ko yād karte ho, agarchi tumhārī bāt na sacchāī, na insāf par mabnī hai, ġaur karo! ²hāṅ tavajjuh do, tum jo muqaddas shahar ke log kahalāte aur isrāīl ke ḵẖudā par etimād karte ho, suno ki allāh jis kā nām rabb-ul-afwāj hai kyā farmātā hai.

³jo kuchh pesh āyā hai us kā elān maiṅ ne baṛī der pahale kiyā. mere hī muṅh se us kī peshgoī sādir huī, maiṅ hī ne us kī ittilā dī. phir achānak hī maiṅ use amal meṅ lāyā aur vah vuqūpzīr huā. ⁴maiṅ jāntā thā ki tū kitnā ziddī hai. tere gale kī naseṅ lohe jaisī belachak aur terī peshānī pītal jaisī saḵẖt hai. ⁵yah jān kar maiṅ ne baṛī der pahale in bātoṅ kī peshgoī kī. un ke pesh āne se pahale maiṅ ne tujhe un kī ḵẖabar dī tāki tū dāvā na kar sake, ‘mere but ne yah kuchh kiyā, mere tarāshe aur ḍhāle gae devtā ne is kā hukm diyā.’ ⁶ab jab tū ne yah sun liyā hai to sab kuchh par ġaur kar. tū kyūṅ in bātoṅ ko mānne ke liye tayyār nahīṅ?

ab se maiṅ tujhe naī naī bāteṅ batāūṅgā, aisī poshīdā bāteṅ jo tujhe ab tak mālūm na thīṅ. ⁷yah kisī qadīm zamāne meṅ vujūd meṅ nahīṅ āīṅ balki abhī abhī āj hī tere ilm meṅ āī haiṅ. kyūṅki maiṅ nahīṅ chāhatā thā ki tū kahe, ‘mujhe pahale se is kā ilm thā.’ ⁸chunāṅche na yah bāteṅ tere kān tak pahuṅchī haiṅ, na tū in kā ilm rakhtā hai, balki qadīm zamāne se hī terā kān yah sun nahīṅ saktā thā. kyūṅki maiṅ jāntā thā ki tū sarāsar bevafā hai, ki paidāish se hī namakaharām kahalātā hai. ⁹to bhī maiṅ apne nām kī ḵẖātir apnā ġazab nāzil karne se bāz rahatā, apnī tamjīd kī ḵẖātir apne āp ko tujhe nest-o-nābūd karne se roke rakhtā hūṅ. ¹⁰dekh, maiṅ ne tujhe pāk-sāf kar diyā hai, lekin chāṅdī ko sāf karne kī kuṭhālī meṅ nahīṅ balki musībat kī bhaṭṭī meṅ. usī meṅ maiṅ ne tujhe āzmāyā hai. ¹¹apnī ḵẖātir, hāṅ apnī hī ḵẖātir maiṅ yah sab kuchh kartā hūṅ, aisā na ho ki mere nām kī behuramtī ho jāe. kyūṅki maiṅ ijāzat nahīṅ dūṅgā ki kisī aur ko vah jalāl diyā jāe jis kā sirf maiṅ haqdār hūṅ.

rabb isrāīl kā najātadihandā hai

¹²ai yāqūb kī aulād, merī sun! ai mere barguzīdā isrāīl, dhyān de! maiṅ hī vahī hūṅ. maiṅ hī avval-o-āḵẖir hūṅ. ¹³mere hī hāth ne zamīn kī bunyād rakhī, mere hī dahane hāth ne āsmān ko ḵẖaime kī tarah tān liyā. jab maiṅ āvāz detā hūṅ to sab mil kar khaṛe ho jāte haiṅ. ¹⁴āo, sab jamā ho kar suno! butoṅ meṅ se kis ne is kī peshgoī kī? kisī ne nahīṅ! jis ādmī ko rabb piyār kartā hai vah bābal ke ḵẖilāf us kī marzī pūrī karegā, bābliyoṅ par us kī quvvat kā izhār karegā. ¹⁵maiṅ, hāṅ maiṅ hī ne yah farmāyā. maiṅ hī use bulā kar yahāṅ lāyā hūṅ, is liye vah zarūr kāmyāb hogā. ¹⁶mere qarīb ā kar suno! shurū se maiṅ ne alāniyā bāt kī, jab se yah pesh āyā maiṅ hāzir hūṅ.”

aur ab rabb qādir-e-mutlaq aur us ke rūh ne mujhe bhejā hai.

¹⁷rabb jo terā chhuṛāne vālā aur isrāīl kā quddūs hai farmātā hai, “maiṅ rabb terā ḵẖudā hūṅ. maiṅ tujhe vah kuchh sikhātā hūṅ jo mufīd hai aur tujhe un rāhoṅ par chalne detā hūṅ jin par tujhe chalnā hai. ¹⁸kāsh tū mere ahkām par dhyān detā! tab terī salāmatī bahate daryā jaisī aur terī rāstbāzī samundar kī maujoṅ jaisī hotī. ¹⁹terī aulād ret kī mānind hotī, tere peṭ kā phal ret ke zarroṅ jaisā anaginat hotā. is kā imkān hī na hotā ki terā nām-o-nishān mere sāmne se miṭ jāe.”

²⁰bābal se nikal jāo! bābliyoṅ ke bīch meṅ se hijrat karo! ḵẖushī ke nāre lagā lagā kar elān karo, duniyā kī intihā tak ḵẖushḵẖabarī phailāte jāo ki rabb ne ivzānā de kar apne ḵẖādim yāqūb ko chhuṛāyā hai. ²¹unheṅ piyās na lagī jab us ne unheṅ registān meṅ se guzarne diyā. us ke hukm par patthar meṅ se pānī bah niklā. jab us ne chaṭān ko chīr ḍālā to pānī phūṭ niklā.

²²lekin rabb farmātā hai ki bedīn salāmatī nahīṅ pāeṅge.