Yashāyāh 40

allāh kī qaum ko tasallī

¹tumhārā rabb farmātā hai, “tasallī do, merī qaum ko tasallī do! ²narmī se yarūshalam se bāt karo, buland āvāz se use batāo ki terī ġulāmī ke din pūre ho gae haiṅ, terā qusūr muāf ho gayā hai. kyūṅki tujhe rabb ke hāth se tamām gunāhoṅ kī dugnī sazā mil gaī hai.”

³ek āvāz pukār rahī hai, “registān meṅ rabb kī rāh tayyār karo! biyābān meṅ hamāre ḵẖudā kā rāstā sīdhā banāo. ⁴lāzim hai ki har vādī bhar dī jāe, zarūrī hai ki har pahāṛ aur buland jagah maidān ban jāe. jo ṭeṛhā hai use sīdhā kiyā jāe, jo nāhamvār hai use hamvār kiyā jāe. ⁵tab allāh kā jalāl zāhir ho jāegā, aur tamām insān mil kar use dekheṅge. yah rabb ke apne muṅh kā farmān hai.”

⁶ek āvāz ne kahā, “zor se āvāz de!” maiṅ ne pūchhā, “maiṅ kyā kahūṅ?” “yah ki tamām insān ghās hī haiṅ, un kī tamām shān-o-shaukat jaṅglī phūl kī mānind hai. ⁷jab rabb kā sāṅs un par se guzre to ghās murjhā jātī aur phūl gir jātā hai, kyūṅki insān ghās hī hai. ⁸ghās to murjhā jātī aur phūl gir jātā hai, lekin hamāre ḵẖudā kā kalām abad tak qāim rahatā hai.”

⁹ai siyyūn, ai ḵẖushḵẖabarī ke paiġambar, bulandiyoṅ par chaṛh jā! ai yarūshalam, ai ḵẖushḵẖabarī ke paiġambar, zor se āvāz de! pukār kar kah aur ḵẖauf mat khā. yahūdāh ke shaharoṅ ko batā, “vah dekho, tumhārā ḵẖudā!”

¹⁰dekho, rabb qādir-e-mutlaq baṛī qudrat ke sāth ā rahā hai, vah baṛī tāqat ke sāth hukūmat karegā. dekho, us kā ajr us ke pās hai, aur us kā in’ām us ke āge āge chaltā hai. ¹¹vah charvāhe kī tarah apne galle kī gallābānī karegā. vah bheṛ ke bacchoṅ ko apne bāzūoṅ meṅ mahfūz rakh kar sīne ke sāth lagāe phiregā aur un kī māoṅ ko baṛe dhyān se apne sāth le chalegā.

allāh kī nāqābil-e-bayān azmat

¹²kis ne apne hāth se duniyā kā pānī nāp liyā hai? kis ne apne hāth se āsmān kī paimāish kī hai? kis ne zamīn kī miṭṭī kī miqdār mālūm kī yā tarāzū se pahāṛoṅ kā kul vazan mut’ayyin kiyā hai? ¹³kis ne rabb ke rūh kī tahqīq kar pāī? kyā us kā koī mushīr hai jo use tālīm de? ¹⁴kyā use kisī se mashvrā lene kī zarūrat hai tāki use samajh ā kar rāst rāh kī tālīm mil jāe? hargiz nahīṅ! kyā kisī ne kabhī use ilm-o-irfān yā samajhdār zindagī guzārne kā fan sikhāyā hai? hargiz nahīṅ!

¹⁵yaqīnan tamām aqvām rabb ke nazdīk bālṭī ke ek qatre yā tarāzū meṅ gard kī mānind haiṅ. jazīroṅ ko vah ret ke zarroṅ kī tarah uṭhā letā hai. ¹⁶ḵẖwāh lubnān ke tamām daraḵẖt aur jānvar rabb ke liye qurbān kyūṅ na hote to bhī munāsib qurbānī ke liye kāfī na hote. ¹⁷us ke sāmne tamām aqvām kuchh bhī nahīṅ haiṅ. us kī nazar meṅ vah hech aur nāchīz haiṅ.

¹⁸allāh kā muvāznā kis se ho saktā hai? us kā muqāblā kis tasvīr yā mujassme se ho saktā hai? ¹⁹but to yūṅ bantā hai ki pahale dastakār use ḍhāl detā hai, phir sunār us par sonā chaṛhā kar use chāṅdī kī zanjīroṅ se sajā detā hai. ²⁰jo ġurbat ke bāis yah nahīṅ karvā saktā vah kam az kam koī aisī lakṛī chun letā hai jo gal saṛ nahīṅ jātī. phir vah kisī māhir dastakār se but ko yūṅ banvātā hai ki vah apnī jagah se na hile.

²¹kyā tum ko mālūm nahīṅ? kyā tum ne bāt nahīṅ sunī? kyā tumheṅ ibtidā se sunāyā nahīṅ gayā? kyā tumheṅ duniyā ke qiyām se le kar āj tak samajh nahīṅ āī? ²²rabb rū-e-zamīn ke ūpar bulandiyoṅ par taḵẖtnashīn hai jahāṅ se insān ṭiḍḍiyoṅ jaise lagte haiṅ. vah āsmān ko parde kī tarah tān kar aur har taraf khaiṅch kar rahane ke qābil ḵẖaimā banā detā hai. ²³vah sardāroṅ ko nāchīz aur duniyā ke qāziyoṅ ko hech banā detā hai. ²⁴vah nae paudoṅ kī mānind haiṅ jin kī panīrī abhī abhī lagī hai, bīj abhī abhī boe gae haiṅ, paudoṅ ne abhī abhī jaṛ pakṛī hai ki rabb un par phūṅk mārtā hai aur vah murjhā jāte haiṅ. tab āṅdhī unheṅ bhūse kī tarah uṛā le jātī hai.

²⁵quddūs ḵẖudā farmātā hai, “tum merā muvāznā kis se karnā chāhate ho? kaun mere barābar hai?” ²⁶apnī nazar uṭhā kar āsmān kī taraf dekho. kis ne yah sab kuchh ḵẖalaq kiyā? vah jo āsmānī lashkar kī pūrī tādād bāhar lā kar har ek ko nām le kar bulātā hai. us kī qudrat aur zabardast tāqat itnī azīm hai ki ek bhī dūr nahīṅ rahatā.

²⁷ai yāqūb kī qaum, tū kyūṅ kahatī hai ki merī rāh rabb kī nazar se chhupī rahatī hai? ai isrāīl, tū kyūṅ shikāyat kartā hai ki merā muāmalā mere ḵẖudā ke ilm meṅ nahīṅ ātā?

²⁸kyā tujhe mālūm nahīṅ, kyā tū ne nahīṅ sunā ki rabb lāzvāl ḵẖudā aur duniyā kī intihā tak kā ḵẖāliq hai? vah kabhī nahīṅ thaktā, kabhī niḍhāl nahīṅ hotā. koī bhī us kī samajh kī gaharāiyoṅ tak nahīṅ pahuṅch saktā. ²⁹vah thakemāndoṅ ko tāzgī aur bebasoṅ ko taqviyat detā hai. ³⁰go naujavān thak kar niḍhāl ho jāeṅ aur javān ādmī ṭhokar khā kar gir jāeṅ, ³¹lekin rabb se ummīd rakhne vāle naī tāqat pāeṅge aur uqāb ke se par phailā kar bulandiyoṅ tak uṛeṅge. na vah dauṛte hue thakeṅge, na chalte hue niḍhāl ho jāeṅge.