Yashāyāh 34

adom par adālat kā elān

¹ai qaumo, qarīb ā kar sun lo! ai ummato, dhyān do! duniyā aur jo bhī us meṅ hai kān lagāe, zamīn aur jo kuchh us meṅ se phūṭ niklā hai tavajjuh de! ²kyūṅki rabb ko tamām ummatoṅ par ġussā ā gayā hai, aur us kā ġazab un ke tamām lashkaroṅ par nāzil ho rahā hai. vah unheṅ mukammal taur par tabāh karegā, inheṅ saffāk ke havāle karegā. ³un ke maqtūloṅ ko bāhar phaiṅkā jāegā, aur lāshoṅ kī badbū chāroṅ taraf phailegī. pahāṛ un ke ḵẖūn se sharābor hoṅge. ⁴tamām sitāre gal jāeṅge, aur āsmān ko tūmār kī tarah lapeṭā jāegā. sitāroṅ kā pūrā lashkar aṅgūr ke murjhāe hue pattoṅ kī tarah jhaṛ jāegā, vah anjīr ke daraḵẖt kī sūkhī hariyālī kī tarah gir jāegā.

⁵kyūṅki āsmān par merī talvār ḵẖūn pī pī kar mast ho gaī hai. dekho, ab vah adom par nāzil ho rahī hai tāki us kī adālat kare, us qaum kī jis kī mukammal tabāhī kā faislā maiṅ kar chukā hūṅ. ⁶rabb kī talvār ḵẖūn’ālūdā ho gaī hai, aur us se charbī ṭapaktī hai. bheṛ-bakriyoṅ kā ḵẖūn aur meṅḍhoṅ ke gurdoṅ kī charbī us par lagī hai, kyūṅki rabb busrā shahar meṅ qurbānī kī īd aur mulk-e-adom meṅ qatl-e-ām kā tahavār manāegā. ⁷us vaqt jaṅglī bail un ke sāth gir jāeṅge, aur bachhṛe tāqatvar sāṅḍoṅ samet ḵẖatm ho jāeṅge. un kī zamīn ḵẖūn se mast aur ḵẖāk charbī se sharābor hogī.

⁸kyūṅki vah din ā gayā hai jab rabb badlā legā, vah sāl jab vah adom se isrāīl kā intiqām legā. ⁹adom kī nadiyoṅ meṅ tārkol hī bahegā, aur gaṅdhak zamīn ko ḍhāṁpegī. mulk bhaṛaktī huī rāl se bhar jāegā, ¹⁰jis kī āg na din aur na rāt bujhegī balki hameshā tak dhuāṅ chhoṛtī rahegī. mulk nasal-dar-nasal vīrān-o-sunsān rahegā, yahāṅ tak ki musāfir bhī hameshā tak us meṅ se guzarne se gurez kareṅge. ¹¹dashtī ullū aur ḵẖārapusht us par qabzā kareṅge, chiṅghāṛane vāle ullū aur kavve us meṅ baserā kareṅge. kyūṅki rabb fīte aur sāhūl se adom kā pūrā mulk nāp nāp kar ujāṛ aur vīrānī ke havāle karegā. ¹²us ke shurfā kā nām-o-nishān tak nahīṅ rahegā. kuchh nahīṅ rahegā jo bādshāhī kahalāe, mulk ke tamām raīs jāte raheṅge. ¹³kāṅṭedār paude us ke mahaloṅ par chhā jāeṅge, ḵẖudrau paude aur ūṅṭkaṭāre us ke qil’āband shaharoṅ meṅ phail jāeṅge. mulk gīdaṛ aur uqābī ullū kā ghar banegā. ¹⁴vahāṅ registān ke jānvar jaṅglī kuttoṅ se mileṅge, aur bakrānumā jin ek dūsre se mulāqāt kareṅge. līlīt nāmī āseb bhī us meṅ ṭhaharegā, vahāṅ use bhī ārāmgāh milegī. ¹⁵mādā sāṁp us ke sāy meṅ bil banā kar us meṅ apne aṅḍe degī aur unheṅ se kar pālegī. shikārī parinde bhī do do ho kar vahāṅ jamā hoṅge.

¹⁶rabb kī kitāb meṅ paṛh kar is kī tahqīq karo! adom meṅ yah tamām chīzeṅ mil jāeṅgī. mulk ek se bhī maharūm nahīṅ rahegā balki sab mil kar us meṅ pāī jāeṅgī. kyūṅki rabb hī ke muṅh ne is kā hukm diyā hai, aur usī kā rūh inheṅ ikaṭṭhā karegā. ¹⁷vahī sārī zamīn kī paimāish karegā aur phir qur’ā ḍāl kar mazkūrā jāndāroṅ meṅ taqsīm karegā. tab mulk abad tak un kī milkiyat meṅ āegā, aur vah nasal-dar-nasal us meṅ ābād hoṅge.