Yashāyāh 2

yarūshalam abdī amn-o-amān kā markaz hogā

¹yasāyāh bin āmūs ne yahūdāh aur yarūshalam ke bāre meṅ zail kī royā dekhī,

²āḵẖirī ayyām meṅ rabb ke ghar kā pahāṛ mazbūtī se qāim hogā. sab se baṛā yah pahāṛ dīgar tamām bulandiyoṅ se kahīṅ ziyādā sarfarāz hogā. tab tamām qaumeṅ jauq-dar-jauq us ke pās pahuṅcheṅgī, ³aur beshumār ummateṅ ā kar kaheṅgī, “āo, ham rabb ke pahāṛ par chaṛh kar yāqūb ke ḵẖudā ke ghar ke pās jāeṅ tāki vah hameṅ apnī marzī kī tālīm de aur ham us kī rāhoṅ par chaleṅ.”

kyūṅki siyyūn pahāṛ se rabb kī hidāyat niklegī, aur yarūshalam se us kā kalām sādir hogā. ⁴rabb bain-ul-aqvāmī jhagṛoṅ ko nipaṭāegā aur beshumār qaumoṅ kā insāf karegā. tab vah apnī talvāroṅ ko kūṭ kar phāle banāeṅgī aur apne nezoṅ ko kāṅṭ-chhāṅṭ ke auzār meṅ tabdīl kareṅgī. ab se na ek qaum dūsrī par hamlā karegī, na log jaṅg karne kī tarbiyat hāsil kareṅge.

⁵ai yāqūb ke gharāne, āo ham rabb ke nūr meṅ chaleṅ!

allāh kī haibtanāk adālat

⁶ai allāh, tū ne apnī qaum, yāqūb ke gharāne ko tark kar diyā hai. aur kyā ajab! kyūṅki vah mashriqī jādūgrī se bhar gae haiṅ. filistiyoṅ kī tarah hamāre log bhī qismat kā hāl pūchhte haiṅ, vah pardesiyoṅ ke sāth baġalgīr rahate haiṅ. ⁷isrāīl sone-chāṅdī se bhar gayā hai, us ke ḵẖazānoṅ kī hadd hī nahīṅ rahī. har taraf ghoṛe hī ghoṛe nazar āte haiṅ, aur un ke rath gine nahīṅ jā sakte. ⁸lekin sāth sāth un kā mulk butoṅ se bhī bhar gayā hai. jo chīzeṅ un ke hāthoṅ ne banāīṅ un ke sāmne vah jhuk jāte haiṅ, jo kuchh un kī uṅgaliyoṅ ne tashkīl diyā use vah sijdā karte haiṅ. ⁹chunāṅche ab unheṅ ḵẖud jhukāyā jāegā, unheṅ past kiyā jāegā. ai rabb, unheṅ muāf na kar!

¹⁰chaṭānoṅ meṅ ghus jāo! ḵẖāk meṅ chhup jāo! kyūṅki rabb kā dahshat’aṅgez aur shāndār jalāl āne ko hai. ¹¹tab insān kī maġrūr āṅkhoṅ ko nīchā kiyā jāegā, mardoṅ kā takabbur ḵẖāk meṅ milāyā jāegā. us din sirf rabb hī sarfarāz hogā. ¹²kyūṅki rabb-ul-afwāj ne ek ḵẖās din ṭhaharāyā hai jis meṅ sab kuchh jo maġrūr, buland yā sarfarāz ho zer kiyā jāegā. ¹³lubnān meṅ deodār ke tamām buland-o-bālā daraḵẖt, basan ke kul balūt, ¹⁴tamām ālī pahāṛ aur ūṅchī pahāṛiyāṅ, ¹⁵har azīm burj aur qil’āband dīvār, ¹⁶samundar kā har azīm tijārtī aur shāndār jahāz zer ho jāegā. ¹⁷chunāṅche insān kā ġarūr ḵẖāk meṅ milāyā jāegā aur mardoṅ kā takabbur nīchā kar diyā jāegā. us din sirf rabb hī sarfarāz hogā, ¹⁸aur but sab ke sab fanā ho jāeṅge.

¹⁹jab rabb zamīn ko dahshatzadā karne ke liye uṭh khaṛā hogā to log miṭṭī ke gaṛhoṅ meṅ khisak jāeṅge. rabb kī mahīb aur shāndār tajallī ko dekh kar vah chaṭānoṅ ke ġāroṅ meṅ chhup jāeṅge. ²⁰us din insān sone-chāṅdī ke un butoṅ ko phaiṅk degā jinheṅ us ne sijdā karne ke liye banā liyā thā. unheṅ chūhoṅ aur chamagādaṛoṅ ke āge phaiṅk kar ²¹vah chaṭānoṅ ke shigāfoṅ aur darāṛoṅ meṅ ghus jāeṅge tāki rabb kī mahīb aur shāndār tajallī se bach jāeṅ jab vah zamīn ko dahshatzadā karne ke liye uṭh khaṛā hogā. ²²chunāṅche insān par etimād karne se bāz āo jis kī zindagī dam bhar kī hai. us kī qadar hī kyā hai