Yashāyāh 13
bābal ke ḵẖilāf elān
1darj-e-zail bābal ke bāre meṅ vah elān hai jo yasāyāh bin āmūs ne royā meṅ dekhā.
2naṅge pahāṛ par jhaṅḍā gāṛ do. unheṅ buland āvāz do, hāth hilā kar unheṅ shurfā ke darvāzoṅ meṅ dāḵẖil hone kā hukm do. 3maiṅ ne apne muqaddasīn ko kām par lagā diyā hai, maiṅ ne apne sūrmāoṅ ko jo merī azmat kī ḵẖushī manāte haiṅ bulā liyā hai tāki mere ġazab kā ālā-e-kār baneṅ.
4suno! pahāṛoṅ par baṛe hujūm kā shor mach rahā hai. suno! mut’addid mamālik aur jamā hone vālī qaumoṅ kā ġul-ġapāṛā sunāī de rahā hai. rabb-ul-afwāj jaṅg ke liye fauj jamā kar rahā hai. 5us ke faujī dūrdarāz ilāqoṅ balki āsmān kī intihā se ā rahe haiṅ. kyūṅki rabb apne ġazab ke ālāt ke sāth ā rahā hai tāki tamām mulk ko barbād kar de.
6vāvailā karo, kyūṅki rabb kā din qarīb hī hai, vah din jab qādir-e-mutlaq kī taraf se tabāhī machegī. 7tab tamām hāth behiss-o-harkat ho jāeṅge, aur har ek kā dil himmat hār degā. 8dahshat un par chhā jāegī, aur vah jānaknī aur dard-e-zah kī sī girift meṅ ā kar janm dene vālī aurat kī tarah taṛpeṅge. ek dūsre ko ḍar ke māre ghūr ghūr kar un ke chihare āg kī tarah tamatmā rahe hoṅge.
9dekho, rabb kā beraham din ā rahā hai jab us kā qahar aur shadīd ġazab nāzil hogā. us vaqt mulk tabāh ho jāegā aur gunāhgār ko us meṅ se miṭā diyā jāegā. 10āsmān ke sitāre aur un ke jhurmaṭ nahīṅ chamkeṅge, sūraj tulū hote vaqt tārīk hī rahegā, aur chāṅd kī raushnī ḵẖatm hogī.
11maiṅ duniyā ko us kī badkārī kā ajr aur bedīnoṅ ko un ke gunāhoṅ kī sazā dūṅgā, maiṅ shoḵẖoṅ kā ghamaṅḍ ḵẖatm kar dūṅgā aur zālimoṅ kā ġarūr ḵẖāk meṅ milā dūṅgā. 12log ḵẖālis sone se kahīṅ ziyādā nāyāb hoṅge, insān ofīr ke qīmtī sone kī nisbat kahīṅ ziyādā kamyāb hogā.
13kyūṅki āsmān rabb-ul-afwāj ke qahar ke sāmne kāṁp uṭhegā, us ke shadīd ġazab ke nāzil hone par zamīn laraz kar apnī jagah se khisak jāegī. 14bābal ke tamām bāshinde shikārī ke sāmne dauṛne vāle ġazāl aur charvāhe se maharūm bheṛ-bakriyoṅ kī tarah idhar udhar bhāg kar apne mulk aur apnī qaum meṅ vāpas āne kī koshish kareṅge. 15jo bhī dushman ke qābū meṅ āegā use chhedā jāegā, jise bhī pakṛā jāegā use talvār se mārā jāegā. 16un ke dekhte dekhte dushman un ke bacchoṅ ko zamīn par paṭaḵẖ degā aur un ke gharoṅ ko lūṭ kar un kī aurtoṅ kī ismatdarī karegā.
17maiṅ mādiyoṅ ko un par chaṛhā lāūṅgā, aise logoṅ ko jinheṅ rishvat se nahīṅ āzmāyā jā saktā, jo sone-chāṅdī kī parvā hī nahīṅ karte. 18un ke tīr naujvānoṅ ko mār deṅge. na vah shīraḵẖwāroṅ par taras khāeṅge, na bacchoṅ par raham kareṅge.
bābal jaṅglī jānvaroṅ kā ghar ban jāegā
19allāh bābal ko jo tamām mamālik kā tāj aur bābliyoṅ kā ḵẖās faḵẖar hai rū-e-zamīn par se miṭā ḍālegā. us din vah sadūm aur amūrā kī tarah tabāh ho jāegā. 20āindā use kabhī dubārā basāyā nahīṅ jāegā, nasal-dar-nasal vah vīrān hī rahegā. na badū apnā tambū vahāṅ lagāegā, aur na gallābān apne revaṛ us meṅ ṭhaharāegā. 21sirf registān ke jānvar khaṅḍarāt meṅ jā baseṅge. shahar ke ghar un kī āvāzoṅ se gūṅj uṭheṅge, uqābī ullū vahāṅ ṭhahareṅge, aur bakrānumā jin us meṅ raqs kareṅge. 22jaṅglī kutte us ke mahaloṅ meṅ roeṅge, aur gīdaṛ aish-o-ishrat ke qasroṅ meṅ apnī dard bharī āvāzeṅ nikāleṅge. bābal kā ḵẖātmā qarīb hī hai, ab der nahīṅ lagegī.