Yashāyāh 12
bache huoṅ kī hamd-o-sanā
1us din tum gīt gāoge,
“ai rabb, maiṅ terī sitāish karūṅgā! yaqīnan tū mujh se nārāz thā, lekin ab terā ġazab mujh par se dūr ho jāe aur tū mujhe tasallī de.
2allāh merī najāt hai. us par bharosā rakh kar maiṅ dahshat nahīṅ khāūṅgā. kyūṅki rabb ḵẖudā merī quvvat aur merā gīt hai, vah merī najāt ban gayā hai.”
3tum shādmānī se najāt ke chashmoṅ se pānī bharoge.
4us din tum kahoge, “rabb kī sitāish karo! us kā nām le kar use pukāro! jo kuchh us ne kiyā hai duniyā ko batāo, us ke nām kī azmat kā elān karo.
5rabb kī tamjīd kā gīt gāo, kyūṅki us ne zabardast kām kiyā hai, aur is kā ilm pūrī duniyā tak pahuṅche.
6ai yarūshalam kī rahane vālī, shādiyānā bajā kar ḵẖushī ke nāre lagā! kyūṅki isrāīl kā quddūs azīm hai, aur vah tere darmiyān hī sukūnat kartā hai.