Yashāyāh 1

¹zail meṅ vah royāeṅ darj haiṅ jo yasāyāh bin āmūs ne yahūdāh aur yarūshalam ke bāre meṅ dekhīṅ aur jo un sāloṅ meṅ munkashif huīṅ jab uzziyāh, yūtām, āḵẖaz aur hizaqiyāh yahūdāh ke bādshāh the.

isrāīlī apne āqā ko jānne se inkār karte haiṅ

²ai āsmān, merī bāt sun! ai zamīn, mere alfāz par kān dhar! kyūṅki rabb ne farmāyā hai,

“jin bacchoṅ kī parvarish maiṅ ne kī hai aur jo mere zer-e-nigrānī parvān chaṛhe haiṅ, unhoṅ ne mujh se rishtā toṛ liyā hai. ³bail apne mālik ko jāntā aur gadhā apne āqā kī charnī ko pahachānatā hai, lekin isrāīl itnā nahīṅ jāntā, merī qaum samajh se ḵẖālī hai.”

⁴ai gunāhgār qaum, tujh par afsos! ai saṅgīn qusūr meṅ phaṅsī huī ummat, tujh par afsos! sharīr nasal, badachalan bacche! unhoṅ ne rabb ko tark kar diyā hai. hāṅ, unhoṅ ne isrāīl ke quddūs ko haqīr jān kar radd kiyā, apnā muṅh us se pher liyā hai. ⁵ab tumheṅ mazīd kahāṅ pīṭā jāe? tumhārī zid to mazīd baṛhtī jā rahī hai go pūrā sar zaḵẖmī aur pūrā dil bīmār hai. ⁶chāṅd se le kar talve tak pūrā jism majrūh hai, har jagah choṭeṅ, ghāo aur tāzā tāzā zarbeṅ lagī haiṅ. aur na unheṅ sāf kiyā gayā, na un kī marham-paṭṭī kī gaī hai.

⁷tumhārā mulk vīrān-o-sunsān ho gayā hai, tumhāre shahar bhasm ho gae haiṅ. tumhāre dekhte dekhte pardesī tumhāre khetoṅ ko lūṭ rahe haiṅ, unheṅ yūṅ ujāṛ rahe haiṅ jis tarah pardesī hī kar sakte haiṅ. ⁸sirf yarūshalam hī bāqī rah gayā hai, siyyūn beṭī aṅgūr ke bāġ meṅ jhoṁpṛī kī tarah akelī rah gaī hai. ab dushman se ghirā huā yah shahar khīre ke khet meṅ lage chhappar kī mānind hai. ⁹agar rabb-ul-afwāj ham meṅ se chand ek ko zindā na chhoṛtā to ham sadūm kī tarah miṭ jāte, hamārā amūrā kī tarah satyānās ho jātā.

¹⁰ai sadūm ke sardāro, rabb kā farmān sun lo! ai amūrā ke logo, hamāre ḵẖudā kī hidāyat par dhyān do! ¹¹rabb farmātā hai, “agar tum beshumār qurbāniyāṅ pesh karo to mujhe kyā? maiṅ to bhasm hone vāle meṅḍhoṅ aur moṭe-tāze bachhṛoṅ kī charbī se uktā gayā hūṅ. bailoṅ, leloṅ aur bakroṅ kā jo ḵẖūn mujhe pesh kiyā jātā hai vah mujhe pasand nahīṅ. ¹²kis ne tum se taqāzā kiyā ki mere huzūr āte vaqt merī bārgāhoṅ ko pāoṅ tale rauṅdo? ¹³ruk jāo! apnī bemānī qurbāniyāṅ mat pesh karo! tumhāre baḵẖūr se mujhe ghin ātī hai. nae chāṅd kī īd aur sabat kā din mat manāo, logoṅ ko ibādat ke liye jamā na karo! maiṅ tumhāre bedīn ijtimā bardāsht hī nahīṅ kar saktā. ¹⁴jab tum nae chāṅd kī īd aur bāqī taqrībāt manāte ho to mere dil meṅ nafrat paidā hotī hai. yah mere liye bhārī bojh ban gaī haiṅ jin se maiṅ taṅg ā gayā hūṅ.

¹⁵beshak apne hāthoṅ ko duā ke liye uṭhāte jāo, maiṅ dhyān nahīṅ dūṅgā. go tum bahut ziyādā namāz bhī paṛho, maiṅ tumhārī nahīṅ sunūṅgā, kyūṅki tumhāre hāth ḵẖūn’ālūdā haiṅ. ¹⁶pahale nahā kar apne āp ko pāk-sāf karo. apnī sharīr harkatoṅ se bāz āo tāki vah mujhe nazar na āeṅ. apnī ġalat rāhoṅ ko chhoṛ kar ¹⁷nek kām karnā sīkh lo. insāf ke tālib raho, mazlūmoṅ kā sahārā bano, yatīmoṅ kā insāf karo aur bevāoṅ ke haq meṅ laṛo!”

allāh apnī qaum kī adālat kartā hai

¹⁸rabb farmātā hai, “āo ham adālat meṅ jā kar ek dūsre se muqaddmā laṛeṅ. agar tumhāre gunāhoṅ kā raṅg qirmizī ho jāe to kyā vah dubārā barf jaise ujle ho jāeṅge? agar un kā raṅg arġvānī ho jāe to kyā vah dubārā ūn jaise safed ho jāeṅge? ¹⁹agar tum sunne ke liye tayyār ho to mulk kī behtarīn paidāvār se lutf’andoz hoge. ²⁰lekin agar inkār karke sarkash ho jāo to talvār kī zad meṅ ā kar mar jāoge. is bāt kā yaqīn karo, kyūṅki rabb ne yah kuchh farmāyā hai.”

²¹yah kaise ho gayā hai ki jo shahar pahale itnā vafādār thā vah ab kasbī ban gayā hai? pahale yarūshalam insāf se māmūr thā, aur rāstī us meṅ sukūnat kartī thī. lekin ab har taraf qātil hī qātil haiṅ! ²²ai yarūshalam, terī ḵẖālis chāṅdī ḵẖām chāṅdī meṅ badal gaī hai, terī behtarīn mai meṅ pānī milāyā gayā hai. ²³tere buzurg haṭdharm aur choroṅ ke yār haiṅ. yah rishvatkhor sab logoṅ ke pīchhe paṛe rahate haiṅ tāki chāy-pānī mil jāe. na vah parvā karte haiṅ ki yatīmoṅ ko insāf mile, na bevāoṅ kī faryād un tak pahuṅchtī hai.

²⁴is liye qādir-e-mutlaq rabb-ul-afwāj jo isrāīl kā zabardast sūrmā hai farmātā hai, “āo, maiṅ apne muḵẖālifoṅ aur dushmanoṅ se intiqām le kar sukūn pāūṅ. ²⁵maiṅ tere ḵẖilāf hāth uṭhāūṅgā aur ḵẖām chāṅdī kī tarah tujhe poṭāsh ke sāth pighlā kar tamām mail se pāk-sāf kar dūṅgā. ²⁶maiṅ tujhe dubārā qadīm zamāne ke se qāzī aur ibtidā ke se mushīr atā karūṅgā. phir yarūshalam dubārā dār-ul-insāf aur vafādār shahar kahalāegā.”

²⁷allāh siyyūn kī adālat karke us kā fidyā degā, jo us meṅ taubā kareṅge un kā vah insāf karke unheṅ chhuṛāegā. ²⁸lekin bāġī aur gunāhgār sab ke sab pāsh pāsh ho jāeṅge, rabb ko tark karne vāle halāk ho jāeṅge.

²⁹balūt ke jin daraḵẖtoṅ kī pūjā se tum lutf’andoz hote ho un ke bāis tum sharmasār hoge, aur jin bāġoṅ ko tum ne apnī butparastī ke liye chun liyā hai un ke bāis tumheṅ sharm āegī. ³⁰tum us balūt ke daraḵẖt kī mānind hoge jis ke patte murjhā gae hoṅ, tumhārī hālat us bāġ kī sī hogī jis meṅ pānī nāyāb ho. ³¹zabardast ādmī phūs aur us kī ġalat harkateṅ chiṅgārī jaisī hoṅgī. donoṅ mil kar yūṅ bhaṛak uṭheṅge ki koī bhī bujhā nahīṅ sakegā.