Ibrāniyoṅ 9

duniyāvī aur āsmānī ibādat

¹jab pahalā ahd bāṅdhā gayā to ibādat karne ke liye hidāyāt dī gaīṅ. zamīn par ek maqdis bhī banāyā gayā, ²ek ḵẖaimā jis ke pahale kamre meṅ shamādān, mez aur us par paṛī maḵẖsūs kī gaī roṭiyāṅ thīṅ. us kā nām “muqaddas kamrā” thā. ³us ke pīchhe ek aur kamrā thā jis kā nām “muqaddastarīn kamrā” thā. pahale aur dūsre kamre ke darmiyān vāqe darvāze par pardā lagā thā. ⁴is pichhle kamre meṅ baḵẖūr jalāne ke liye sone kī qurbāngāh aur ahd kā sandūq thā. ahd ke sandūq par sonā maṅḍhā huā thā aur us meṅ tīn chīzeṅ thīṅ : sone kā martabān jis meṅ mann bharā thā, hārūn kā vah asā jis se koṁpleṅ phūṭ niklī thīṅ aur patthar kī vah do taḵẖtiyāṅ jin par ahd ke ahkām likhe the. ⁵sandūq par ilāhī jalāl ke do karūbī farishte lage the jo sandūq ke ḍhakne ko sāyā dete the jis kā nām “kaffārā kā ḍhaknā” thā. lekin is jagah par ham sab kuchh mazīd tafsīl se bayān nahīṅ karnā chāhate.

⁶yah chīzeṅ isī tartīb se rakhī jātī haiṅ. jab imām apnī ḵẖidmat ke farāiz adā karte haiṅ to bāqāidagī se pahale kamre meṅ jāte haiṅ. ⁷lekin sirf imām-e-āzam hī dūsre kamre meṅ dāḵẖil hotā hai, aur vah bhī sāl meṅ sirf ek dafā. jab bhī vah jātā hai vah apne sāth ḵẖūn le kar jātā hai jise vah apne aur qaum ke liye pesh kartā hai tāki vah gunāh miṭ jāeṅ jo logoṅ ne ġairirādī taur par kie hote haiṅ. ⁸is se rūh-ul-quds dikhātā hai ki muqaddastarīn kamre tak rasāī us vaqt tak zāhir nahīṅ kī gaī thī jab tak pahalā kamrā istemāl meṅ thā. ⁹yah majāzan maujūdā zamāne kī taraf ishārā hai. is kā matlab yah hai ki jo nazrāne aur qurbāniyāṅ pesh kī jā rahī haiṅ vah parastār ke zamīr ko pāk-sāf karke kāmil nahīṅ banā saktīṅ. ¹⁰kyūṅki in kā tālluq sirf khāne-pīne vālī chīzoṅ aur ġusal kī muḵẖtalif rasmoṅ se hotā hai, aisī zāhirī hidāyāt jo sirf nae nizām ke āne tak lāgū haiṅ.

¹¹lekin ab masīh ā chukā hai, un acchhī chīzoṅ kā imām-e-āzam jo ab hāsil huī haiṅ. jis ḵẖaime meṅ vah ḵẖidmat kartā hai vah kahīṅ ziyādā azīm aur kāmil hai. yah ḵẖaimā insānī hāthoṅ se nahīṅ banāyā gayā yānī yah is kāināt kā hissā nahīṅ hai. ¹²jab masīh ek bār sadā ke liye ḵẖaime ke muqaddastarīn kamre meṅ dāḵẖil huā to us ne qurbāniyāṅ pesh karne ke liye bakroṅ aur bachhṛoṅ kā ḵẖūn istemāl na kiyā. is ke bajāy us ne apnā hī ḵẖūn pesh kiyā aur yūṅ hamāre liye abdī najāt hāsil kī. ¹³purāne nizām meṅ bail-bakroṅ kā ḵẖūn aur javān gāy kī rākh nāpāk logoṅ par chhiṛke jāte the tāki un ke jism pāk-sāf ho jāeṅ. ¹⁴agar in chīzoṅ kā yah asar thā to phir masīh ke ḵẖūn kā kyā zabardast asar hogā! azlī rūh ke zarīe us ne apne āp ko bedāġ qurbānī ke taur par pesh kiyā. yūṅ us kā ḵẖūn hamāre zamīr ko maut tak pahuṅchāne vāle kāmoṅ se pāk-sāf kartā hai tāki ham zindā ḵẖudā kī ḵẖidmat kar sakeṅ.

¹⁵yahī vajah hai ki masīh ek nae ahd kā darmiyānī hai. maqsad yah thā ki jitne logoṅ ko allāh ne bulāyā hai unheṅ allāh kī mauūdā aur abdī mīrās mile. aur yah sirf is liye mumkin huā hai ki masīh ne mar kar fidyā diyā tāki log un gunāhoṅ se chhuṭkārā pāeṅ jo un se us vaqt sarzad hue jab vah pahale ahd ke tahat the.

¹⁶jahāṅ vasiyat hai vahāṅ zarūrī hai ki vasiyat karne vāle kī maut kī tasdīq kī jāe. ¹⁷kyūṅki jab tak vasiyat karne vālā zindā ho vasiyat beasar hotī hai. is kā asar vasiyat karne vāle kī maut hī se shurū hotā hai. ¹⁸yahī vajah hai ki pahalā ahd bāṅdhte vaqt bhī ḵẖūn istemāl huā. ¹⁹kyūṅki pūrī qaum ko sharīat kā har hukm sunāne ke bād mūsā ne bachhṛoṅ kā ḵẖūn pānī se milā kar use zūfe ke gucchhe aur qirmizī raṅg ke dhāge ke zarīe sharīat kī kitāb aur pūrī qaum par chhiṛkā. ²⁰us ne kahā, “yah ḵẖūn us ahd kī tasdīq kartā hai jis kī pairvī karne kā hukm allāh ne tumheṅ diyā hai.” ²¹isī tarah mūsā ne yah ḵẖūn mulāqāt ke ḵẖaime aur ibādat ke tamām sāmān par chhiṛkā. ²²na sirf yah balki sharīat taqāzā kartī hai ki taqrīban har chīz ko ḵẖūn hī se pāk-sāf kiyā jāe balki allāh ke huzūr ḵẖūn pesh kie baġair muāfī mil hī nahīṅ saktī.

masīh kī qurbānī gunāhoṅ ko miṭā detī hai

²³ġaraz, lāzim thā ki yah chīzeṅ jo āsmān kī aslī chīzoṅ kī naqlī sūrteṅ haiṅ pāk-sāf kī jāeṅ. lekin āsmānī chīzeṅ ḵẖud aisī qurbāniyoṅ kā mutālbā kartī haiṅ jo in se kahīṅ behatar hoṅ. ²⁴kyūṅki masīh sirf insānī hāthoṅ se bane maqdis meṅ dāḵẖil nahīṅ huā jo aslī maqdis kī sirf naqlī sūrat thī balki vah āsmān meṅ hī dāḵẖil huā tāki ab se hamārī ḵẖātir allāh ke sāmne hāzir ho. ²⁵duniyā kā imām-e-āzam to sālānā kisī aur (yānī jānvar) kā ḵẖūn le kar muqaddastarīn kamre meṅ dāḵẖil hotā hai. lekin masīh is liye āsmān meṅ dāḵẖil na huā ki vah apne āp ko bār bār qurbānī ke taur par pesh kare. ²⁶agar aisā hotā to use duniyā kī taḵẖlīq se le kar āj tak bahut dafā dukh sahanā paṛtā. lekin aisā nahīṅ hai balki ab vah zamānoṅ ke iḵẖtitām par ek hī bār sadā ke liye zāhir huā tāki apne āp ko qurbān karne se gunāh ko dūr kare. ²⁷ek bār marnā aur allāh kī adālat meṅ hāzir honā har insān ke liye muqarrar hai. ²⁸isī tarah masīh ko bhī ek hī bār bahutoṅ ke gunāhoṅ ko uṭhā kar le jāne ke liye qurbān kiyā gayā. dūsrī bār jab vah zāhir hogā to gunāhoṅ ko dūr karne ke liye zāhir nahīṅ hogā balki unheṅ najāt dene ke liye jo shiddat se us kā intizār kar rahe haiṅ.