Ibrāniyoṅ 7

malik-e-sidq

¹yah malik-e-sidq, sālim kā bādshāh aur allāh t’ālā kā imām thā. jab ibrāhīm chār bādshāhoṅ ko shikast dene ke bād vāpas ā rahā thā to malik-e-sidq us se milā aur use barkat dī. ²is par ibrāhīm ne use tamām lūṭ ke māl kā dasvāṅ hissā de diyā. ab malik-e-sidq kā matlab “rāstbāzī kā bādshāh” hai. dūsre, “sālim kā bādshāh” kā matlab “salāmatī kā bādshāh” hai. ³na us kā bāp yā māṅ hai, na koī nasabnāmā. us kī zindagī kā na to āġāz hai, na iḵẖtitām. allāh ke farzand kī tarah vah abad tak imām rahatā hai.

⁴ġaur kareṅ ki vah kitnā azīm thā. hamāre bāpdādā ibrāhīm ne use lūṭe hue māl kā dasvāṅ hissā de diyā. ⁵ab sharīat talab kartī hai ki lāvī kī vah aulād jo imām ban jātī hai qaum yānī apne bhāiyoṅ se paidāvār kā dasvāṅ hissā le, hālāṅki un ke bhāī ibrāhīm kī aulād haiṅ. ⁶lekin malik-e-sidq lāvī kī aulād meṅ se nahīṅ thā. to bhī us ne ibrāhīm se dasvāṅ hissā le kar use barkat dī jis se allāh ne vādā kiyā thā. ⁷is meṅ koī shak nahīṅ ki kamahaisiyat shaḵẖs ko us se barkat miltī hai jo ziyādā haisiyat kā ho. ⁸jahāṅ lāvī imāmoṅ kā tālluq hai fānī insān dasvāṅ hissā lete haiṅ. lekin malik-e-sidq ke muāmale meṅ yah hissā us ko milā jis ke bāre meṅ gavāhī dī gaī hai ki vah zindā rahatā hai. ⁹yah bhī kahā jā saktā hai ki jab ibrāhīm ne māl kā dasvāṅ hissā de diyā to lāvī ne us ke zarīe bhī yah hissā diyā, hālāṅki vah ḵẖud dasvāṅ hissā letā hai. ¹⁰kyūṅki go lāvī us vaqt paidā nahīṅ huā thā to bhī vah ek tarah se ibrāhīm ke jism meṅ maujūd thā jab malik-e-sidq us se milā.

¹¹agar lāvī kī kahānat (jis par sharīat mabnī thī) kāmiliyat paidā kar saktī to phir ek aur qism ke imām kī kyā zarūrat hotī, us kī jo hārūn jaisā na ho balki malik-e-sidq jaisā? ¹²kyūṅki jab bhī kahānat badal jātī hai to lāzim hai ki sharīat meṅ bhī tabdīlī āe. ¹³aur hamārā ḵẖudāvand jis ke bāre meṅ yah bayān kiyā gayā hai vah ek farq qabīle kā fard thā. us ke qabīle ke kisī bhī fard ne imām kī ḵẖidmat adā nahīṅ kī. ¹⁴kyūṅki sāf mālūm hai ki ḵẖudāvand masīh yahūdāh qabīle kā fard thā, aur mūsā ne is qabīle ko imāmoṅ kī ḵẖidmat meṅ shāmil na kiyā.

malik-e-sidq jaisā ek aur imām

¹⁵muāmalā mazīd sāf ho jātā hai. ek farq imām zāhir huā hai jo malik-e-sidq jaisā hai. ¹⁶vah lāvī ke qabīle kā fard hone se imām na banā jis tarah sharīat taqāzā kartī thī, balki vah lāfānī zindagī kī quvvat hī se imām ban gayā. ¹⁷kyūṅki kalām-e-muqaddas farmātā hai,

“tū abad tak imām hai,

aisā imām jaisā malik-e-sidq thā.”

¹⁸yūṅ purāne hukm ko mansūḵẖ kar diyā jātā hai, kyūṅki vah kamzor aur bekār thā ¹⁹(mūsā kī sharīat to kisī chīz ko kāmil nahīṅ banā saktī thī) aur ab ek behatar ummīd muhayyā kī gaī hai jis se ham allāh ke qarīb ā jāte haiṅ.

²⁰aur yah nayā nizām allāh kī qasam se qāim huā. aisī koī qasam na khāī gaī jab dūsre imām bane. ²¹lekin īsā ek qasam ke zarīe imām ban gayā jab allāh ne farmāyā,

“rabb ne qasam khāī hai

aur is se pachhatāegā nahīṅ,

‘tū abad tak imām hai’.”

²²is qasam kī vajah se īsā ek behatar ahd kī zamānat detā hai.

²³ek aur farq, purāne nizām meṅ bahut se imām the, kyūṅki maut ne har ek kī ḵẖidmat mahdūd kie rakhī. ²⁴lekin chūṅki īsā abad tak zindā hai is liye us kī kahānat kabhī bhī ḵẖatm nahīṅ hogī. ²⁵yūṅ vah unheṅ abdī najāt de saktā hai jo us ke vasīle se allāh ke pās āte haiṅ, kyūṅki vah abad tak zindā hai aur un kī shafāat kartā rahatā hai.

²⁶hameṅ aise hī imām-e-āzam kī zarūrat thī. hāṅ, aisā imām jo muqaddas, bequsūr, bedāġ, gunāhgāroṅ se alag aur āsmānoṅ se buland huā hai. ²⁷use dūsre imāmoṅ kī tarah is kī zarūrat nahīṅ ki har roz qurbāniyāṅ pesh kare, pahale apne liye phir qaum ke liye. balki us ne apne āp ko pesh karke apnī is qurbānī se un ke gunāhoṅ ko ek bār sadā ke liye miṭā diyā. ²⁸mūsvī sharīat aise logoṅ ko imām-e-āzam muqarrar kartī hai jo kamzor haiṅ. lekin sharīat ke bād allāh kī qasam farzand ko imām-e-āzam muqarrar kartī hai, aur yah farzand abad tak kāmil hai.