Ibrāniyoṅ 4
1dekheṅ, ab tak allāh kā yah vādā qāim hai, aur ab tak ham sukūn ke mulk meṅ dāḵẖil ho sakte haiṅ. is liye āeṅ, ham ḵẖabardār raheṅ. aisā na ho ki āp meṅ se koī pīchhe rah kar us meṅ dāḵẖil na hone pāe. 2kyūṅki hameṅ bhī un kī tarah ek ḵẖushḵẖabarī sunāī gaī. lekin yah paiġām un ke liye befāidā thā, kyūṅki vah use sun kar īmān na lāe. 3un kī nisbat ham jo īmān lāe haiṅ sukūn ke is mulk meṅ dāḵẖil ho sakte haiṅ.
ġaraz, yah aisā hī hai jis tarah allāh ne farmāyā,
“apne ġazab meṅ maiṅ ne qasam khāī,
‘yah kabhī us mulk meṅ dāḵẖil nahīṅ hoṅge
jahāṅ maiṅ unheṅ sukūn detā’.”
ab ġaur kareṅ ki us ne yah kahā agarchi us kā kām duniyā kī taḵẖlīq par iḵẖtitām tak pahuṅch gayā thā. 4kyūṅki kalām-e-muqaddas meṅ sātveṅ din ke bāre meṅ likhā hai, “sātveṅ din allāh kā sārā kām takmīl tak pahuṅch gayā. is se fāriġ ho kar us ne ārām kiyā.” 5ab is kā muqāblā mazkūrā āyat se kareṅ,
“yah kabhī us mulk meṅ dāḵẖil nahīṅ hoṅge
jahāṅ maiṅ unheṅ sukūn detā.”
6jinhoṅ ne pahale allāh kī ḵẖushḵẖabarī sunī unheṅ nāframān hone kī vajah se yah sukūn na milā. to bhī yah bāt qāim rahī ki kuchh to sukūn ke is mulk meṅ dāḵẖil ho jāeṅge. 7yah madd-e-nazar rakh kar allāh ne ek aur din muqarrar kiyā, mazkūrā “āj” kā din. kaī sāloṅ ke bād hī us ne dāūd kī mārifat vah bāt kī jis par ham ġaur kar rahe haiṅ,
“agar tum āj allāh kī āvāz suno
to apne diloṅ ko saḵẖt na karo.”
8jab yashūa unheṅ mulk-e-kan’ān meṅ lāyā tab us ne isrāīliyoṅ ko yah sukūn na diyā, varnā allāh is ke bād ke kisī aur din kā zikr na kartā. 9chunāṅche allāh kī qaum ke liye ek ḵẖās sukūn bāqī rah gayā hai, aisā sukūn jo allāh ke sātveṅ din ārām karne se mutābiqat rakhtā hai. 10kyūṅki jo bhī vah sukūn pātā hai jis kā vādā allāh ne kiyā vah allāh kī tarah apne kāmoṅ se fāriġ ho kar ārām karegā. 11is liye āeṅ, ham is sukūn meṅ dāḵẖil hone kī pūrī koshish kareṅ tāki ham meṅ se koī bhī bāpdādā ke nāframān namūne par chal kar gunāh meṅ na gir jāe.
12kyūṅki allāh kā kalām zindā, muassir aur har dodhārī talvār se ziyādā tez hai. vah insān meṅ se guzar kar us kī jān rūh se aur us ke joṛoṅ ko gūde se alag kar letā hai. vahī dil ke ḵẖayālāt aur soch ko jāṅch kar un par faislā karne ke qābil hai. 13koī maḵẖlūq bhī allāh kī nazar se nahīṅ chhup saktī. us kī āṅkhoṅ ke sāmne jis ke javābdih ham hote haiṅ sab kuchh ayāṅ aur beniqāb hai.
īsā hamārā imām-e-āzam hai
14ġaraz āeṅ, ham us īmān se lipṭe raheṅ jis kā iqrār ham karte haiṅ. kyūṅki hamārā aisā azīm imām-e-āzam hai jo āsmānoṅ meṅ se guzar gayā yānī īsā allāh kā farzand. 15aur vah aisā imām-e-āzam nahīṅ hai jo hamārī kamzoriyoṅ ko dekh kar hamdardī na dikhāe balki agarchi vah begunāh rahā to bhī hamārī tarah use har qism kī āzmāish kā sāmnā karnā paṛā. 16ab āeṅ, ham pūre etimād ke sāth allāh ke taḵẖt ke sāmne hāzir ho jāeṅ jahāṅ fazl pāyā jātā hai. kyūṅki vahīṅ ham vah raham aur fazl pāeṅge jo zarūrat ke vaqt hamārī madad kar saktā hai.