Ibrāniyoṅ 1
allāh kā apne farzand ke zarīe kalām
1māzī meṅ allāh muḵẖtalif mauqoṅ par aur kaī tarīqoṅ se hamāre bāpdādā se hamkalām huā. us vaqt us ne yah nabiyoṅ ke vasīle se kiyā 2lekin in āḵẖirī dinoṅ meṅ vah apne farzand ke vasīle se ham se hamkalām huā, usī ke vasīle se jise us ne sab chīzoṅ kā vāris banā diyā aur jis ke vasīle se us ne kāināt ko bhī ḵẖalaq kiyā. 3farzand allāh kā shāndār jalāl mun’akis kartā aur us kī zāt kī ain shabīh [a] yā naqsh. hai. vah apne qavī kalām se sab kuchh saṁbhāle rakhtā hai. jab vah duniyā meṅ thā to us ne hamāre liye gunāhoṅ se pāk-sāf ho jāne kā intizām qāim kiyā. is ke bād vah āsmān par qādir-e-mutlaq ke dahane hāth jā baiṭhā.
allāh ke farzand kī azmat
4farzand farishtoṅ se kahīṅ azīm hai, itnā jitnā us kā mīrās meṅ pāyā huā nām un ke nāmoṅ se azīm hai. 5kyūṅki allāh ne kis farishte se kabhī kahā,
“tū merā farzand hai,
āj maiṅ terā bāp ban gayā hūṅ.”
yah bhī us ne kisī farishte ke bāre meṅ kabhī nahīṅ kahā,
“maiṅ us kā bāp hūṅgā
aur vah merā farzand hogā.”
6aur jab allāh apne pahalauṭhe farzand ko āsmānī duniyā meṅ lātā hai to vah farmātā hai,
“allāh ke tamām farishte us kī parastish kareṅ.”
7farishtoṅ ke bāre meṅ vah farmātā hai,
“vah apne farishtoṅ ko havāeṅ
aur apne ḵẖādimoṅ ko āg ke shole banā detā hai.”
8lekin farzand ke bāre meṅ vah kahatā hai,
“ai ḵẖudā, terā taḵẖt azal se abad tak qāim-o-dāim rahegā,
aur insāf kā shāhī asā terī bādshāhī par hukūmat karegā.
9tū ne rāstbāzī se muhabbat
aur bedīnī se nafrat kī,
is liye allāh tere ḵẖudā ne tujhe ḵẖushī ke tel se masah karke
tujhe tere sāthiyoṅ se kahīṅ ziyādā sarfarāz kar diyā.”
10vah yah bhī farmātā hai,
“ai rabb, tū ne ibtidā meṅ duniyā kī bunyād rakhī,
aur tere hī hāthoṅ ne āsmānoṅ ko banāyā.
11yah to tabāh ho jāeṅge,
lekin tū qāim rahegā.
yah sab libās kī tarah ghis phaṭ jāeṅge
12aur tū inheṅ chādar kī tarah lapeṭegā,
purāne kapṛe kī tarah yah badle jāeṅge.
lekin tū vahī kā vahī rahatā hai,
aur terī zindagī kabhī ḵẖatm nahīṅ hotī.”
13allāh ne kabhī bhī apne kisī farishte se yah bāt na kahī,
“mere dahane hāth baiṭh,
jab tak maiṅ tere dushmanoṅ ko
tere pāoṅ kī chaukī na banā dūṅ.”
14phir farishte kyā haiṅ? vah to sab ḵẖidmatguzār rūheṅ haiṅ jinheṅ allāh un kī ḵẖidmat karne ke liye bhej detā hai jinheṅ mīrās meṅ najāt pānī hai.