Habakkūq 2

¹ab maiṅ paharā dene ke liye apnī burjī par chaṛh jāūṅgā, qilae kī ūṅchī jagah par khaṛā ho kar chāroṅ taraf dekhtā rahūṅgā. kyūṅki maiṅ jānnā chāhatā hūṅ ki allāh mujhe kyā kuchh batāegā, ki vah merī shikāyat kā kyā javāb degā.

rabb kā javāb

²rabb ne mujhe javāb diyā, “jo kuchh tū ne royā meṅ dekhā hai use taḵẖtoṅ par yūṅ likh de ki har guzarne vālā use ravānī se paṛh sake. ³kyūṅki vah fauran pūrī nahīṅ ho jāegī balki muqarrarā vaqt par āḵẖirkār zāhir hogī, vah jhūṭī sābit nahīṅ hogī. go der bhī lage to bhī sabr kar. kyūṅki āne vālā pahuṅchegā, vah der nahīṅ karegā.

⁴maġrūr ādmī phūlā huā hai aur andar se sīdhī rāh par nahīṅ chaltā. lekin rāstbāz īmān hī se jītā rahegā. ⁵yaqīnan mai ek bevafā sāthī hai. maġrūr shaḵẖs jītā nahīṅ rahegā, go vah apne muṅh ko pātāl kī tarah khulā rakhtā aur us kī bhūk maut kī tarah kabhī nahīṅ miṭtī, vah tamām aqvām aur ummateṅ apne pās jamā kartā hai.

bedīnoṅ kā anjām

⁶lekin yah sab us kā mazāq uṛā kar use lān-tān kareṅgī. vah kaheṅgī, ‘us par afsos jo dūsroṅ kī chīzeṅ chhīn kar apnī milkiyat meṅ izāfā kartā hai, jo qarzdāroṅ kī zamānat par qabzā karne se daulatmand ho gayā hai. yah kār-ravāī kab tak jārī rahegī?’ ⁷kyūṅki achānak hī aise log uṭheṅge jo tujhe kāṭeṅge, aise log jāg uṭheṅge jin ke sāmne tū thartharāne lagegā. tab tū ḵẖud un kā shikār ban jāegā. ⁸chūṅki tū ne dīgar mut’addid aqvām ko lūṭ liyā hai is liye ab bachī huī ummateṅ tujhe hī lūṭ leṅgī. kyūṅki tujh se qatl-o-ġārat sarzad huī hai, tū ne dīhāt aur shahar par un ke bāshindoṅ samet shadīd zulm kiyā hai.

⁹us par afsos jo nājāiz nafā kamā kar apne ghar par āfat lātā hai, hālāṅki vah āfat se bachne ke liye apnā ghoṅslā bulandiyoṅ par banā letā hai. ¹⁰tere mansūboṅ se mut’addid qaumeṅ tabāh huī haiṅ, lekin yah tere hī gharāne ke liye sharm kā bāis ban gayā hai. is gunāh se tū apne āp par maut kī sazā lāyā hai. ¹¹yaqīnan dīvāroṅ ke patthar chīḵẖ kar iltijā kareṅge aur lakṛī ke shahatīr javāb meṅ āh-o-zārī kareṅge.

¹²us par afsos jo shahar ko qatl-o-ġārat ke zarīe tāmīr kartā, jo ābādī ko nāinsāfī kī bunyād par qāim kartā hai. ¹³rabb-ul-afwāj ne muqarrar kiyā hai ki jo kuchh qaumoṅ ne baṛī mehanat-mashaqqat se hāsil kiyā use nazar-e-ātish honā hai, jo kuchh pāne ke liye ummateṅ thak jātī haiṅ vah bekār hī hai. ¹⁴kyūṅki jis tarah samundar pānī se bharā huā hai, usī tarah duniyā ek din rabb ke jalāl ke irfān se bhar jāegī.

¹⁵us par afsos jo apnā piyālā zaharīlī sharāb se bhar kar use apne paṛosiyoṅ ko pilā detā hai tāki unheṅ nashe meṅ lā kar un kī barahanagī se lutf’andoz ho jāe. ¹⁶lekin ab terī bārī bhī ā gaī hai! terī shān-o-shaukat ḵẖatm ho jāegī, aur terā muṅh kālā ho jāegā. ab ḵẖud pī le! nashe meṅ ā kar apne kapṛe utār le. ġazab kā jo piyālā rabb ke dahane hāth meṅ hai vah tere pās bhī pahuṅchegā. tab terī itnī rusvāī ho jāegī ki terī shān kā nām-o-nishān tak nahīṅ rahegā.

¹⁷jo zulm tū ne lubnān par kiyā vah tujh par hī ġālib āegā, jin jānvaroṅ ko tū ne vahāṅ tabāh kiyā un kī dahshat tujh hī par tārī ho jāegī. kyūṅki tujh se qatl-o-ġārat sarzad huī hai, tū ne dīhāt aur shaharoṅ par un ke bāshindoṅ samet shadīd zulm kiyā hai.

¹⁸but kā kyā fāidā? āḵẖir kisī māhir kārīgar ne use tarāshā yā ḍhāl liyā hai, aur vah jhūṭ hī jhūṭ kī hidāyāt detā hai. kārīgar apne hāthoṅ ke but par bharosā rakhtā hai, hālāṅki vah bol bhī nahīṅ saktā!

¹⁹us par afsos jo lakṛī se kahatā hai, ‘jāg uṭh!’ aur ḵẖāmosh patthar se, ‘khaṛā ho jā!’ kyā yah chīzeṅ hidāyat de saktī haiṅ? hargiz nahīṅ! un meṅ jān hī nahīṅ, ḵẖwāh un par sonā yā chāṅdī kyūṅ na chaṛhāī gaī ho. ²⁰lekin rabb apne muqaddas ghar meṅ maujūd hai. us ke huzūr pūrī duniyā ḵẖāmosh rahe.”