Habakkūq 1

nabī kī shikāyat : har taraf nāinsāfī

¹zail meṅ vah kalām qalamband hai jo habaqqūq nabī ko royā dekh kar milā.

²ai rabb, maiṅ mazīd kab tak madad ke liye pukārūṅ? ab tak tū ne merī nahīṅ sunī. maiṅ mazīd kab tak chīḵẖeṅ mār mār kar kahūṅ ki fasād ho rahā hai? ab tak tū ne hameṅ chhuṭkārā nahīṅ diyā. ³tū kyūṅ hone detā hai ki mujhe itnī nāinsāfī dekhnī paṛe? logoṅ ko itnā nuqsān pahuṅchāyā jā rahā hai, lekin tū ḵẖāmoshī se sab kuchh dekhtā rahatā hai. jahāṅ bhī maiṅ nazar ḍālūṅ, vahāṅ zulm-o-tashaddud hī nazar ātā hai, muqaddamābāzī aur jhagṛe sar uṭhāte haiṅ. ⁴natīje meṅ sharīat beasar ho gaī hai, aur bā-insāf faisle kabhī jārī nahīṅ hote. bedīnoṅ ne rāstbāzoṅ ko gher liyā hai, is liye adālat meṅ behūdā faisle kie jāte haiṅ.

allāh kā javāb

⁵“dīgar aqvām par nigāh ḍālo, hāṅ un par dhyān do to hakkā-bakkā rah jāoge. kyūṅki maiṅ tumhāre jīte jī ek aisā kām karūṅgā jis kī jab ḵẖabar sunoge to tumheṅ yaqīn nahīṅ āegā. ⁶maiṅ bābliyoṅ ko khaṛā karūṅgā. yah zālim aur talḵẖrū qaum pūrī duniyā ko ubūr karke dūsre mamālik par qabzā karegī. ⁷log us se saḵẖt dahshat khāeṅge, har taraf usī ke qavānīn aur azmat mānnī paṛegī. ⁸un ke ghoṛe chītoṅ se tez haiṅ, aur shām ke vaqt shikār karne vāle bheṛīe bhī un jaise phurtīle nahīṅ hote. vah sarpaṭ dauṛ kar dūr dūr se āte haiṅ. jis tarah uqāb lāsh par jhapaṭṭā mārtā hai usī tarah vah apne shikār par hamlā karte haiṅ. ⁹sab isī maqsad se āte haiṅ ki zulm-o-tashaddud kareṅ. jahāṅ bhī jāeṅ vahāṅ āge baṛhte jāte haiṅ. ret jaise beshumār qaidī un ke hāth meṅ jamā hote haiṅ. ¹⁰vah dīgar bādshāhoṅ kā mazāq uṛāte haiṅ, aur dūsroṅ ke buzurg un ke tamasḵẖur kā nishānā ban jāte haiṅ. har qilae ko dekh kar vah haṅs uṭhte haiṅ. jald hī vah un kī dīvāroṅ ke sāth miṭṭī ke ḍher lagā kar un par qabzā karte haiṅ. ¹¹phir vah tez havā kī tarah vahāṅ se guzar kar āge baṛh jāte haiṅ. lekin vah qusūrvār ṭhahareṅge, kyūṅki un kī apnī tāqat un kā ḵẖudā hai.”

ai rabb, tū kyūṅ ḵẖāmosh rahatā hai?

¹²ai rabb, kyā tū qadīm zamāne se hī merā ḵẖudā, merā quddūs nahīṅ hai? ham nahīṅ mareṅge. ai rabb, tū ne unheṅ sazā dene ke liye muqarrar kiyā hai. ai chaṭān, terī marzī hai ki vah hamārī tarbiyat kareṅ. ¹³terī āṅkheṅ bilkul pāk haiṅ, is liye tū burā kām bardāsht nahīṅ kar saktā, tū ḵẖāmoshī se zulm-o-tashaddud par nazar nahīṅ ḍāl saktā. to phir tū in bevafāoṅ kī harkatoṅ ko kis tarah bardāsht kartā hai? jab bedīn use haṛap kar letā jo us se kahīṅ ziyādā rāstbāz hai to tū ḵẖāmosh kyūṅ rahatā hai? ¹⁴tū ne hone diyā hai ki insān se machhliyoṅ kā sā sulūk kiyā jāe, ki use un samundarī jānvaroṅ kī tarah pakṛā jāe, jin kā koī mālik nahīṅ. ¹⁵dushman un sab ko kāṅṭe ke zarīe pānī se nikāl letā hai, apnā jāl ḍāl kar unheṅ pakaṛ letā hai. jab un kā baṛā ḍher jamā ho jātā hai to vah ḵẖush ho kar shādiyānā bajātā hai. ¹⁶tab vah apne jāl ke sāmne baḵẖūr jalā kar use jānvar qurbān kartā hai. kyūṅki usī ke vasīle se vah aish-o-ishrat kī zindagī guzār saktā hai. ¹⁷kyā vah musalsal apnā jāl ḍāltā aur qaumoṅ ko berahamī se maut ke ghāṭ utārtā rahe