Paidāish 9
allāh kā nūh ke sāth ahd
1phir allāh ne nūh aur us ke beṭoṅ ko barkat de kar kahā, “phalo phūlo aur tādād meṅ baṛhte jāo. duniyā tum se bhar jāe 2zamīn par phirne aur reṅgne vāle jānvar, parinde aur machhliyāṅ sab tum se ḍareṅge. unheṅ tumhāre iḵẖtiyār meṅ kar diyā gayā hai. 3jis tarah maiṅ ne tumhāre khāne ke liye paudoṅ kī paidāvār muqarrar kī hai isī tarah ab se tumheṅ har qism ke jānvar khāne kī ijāzat bhī hai. 4lekin ḵẖabardār! aisā gosht na khānā jis meṅ ḵẖūn hai, kyūṅki ḵẖūn meṅ us kī jān hai.
5kisī kī jān lenā manā hai. jo aisā karegā use apnī jān denī paṛegī, ḵẖwāh vah insān ho yā haivān. maiṅ ḵẖud is kā mutālbā karūṅgā. 6jo bhī kisī kā ḵẖūn bahāe us kā ḵẖūn bhī bahāyā jāegā. kyūṅki allāh ne insān ko apnī sūrat par banāyā hai.
7ab phalo phūlo aur tādād meṅ baṛhte jāo. duniyā meṅ phail jāo.”
8tab allāh ne nūh aur us ke beṭoṅ se kahā, 9“ab maiṅ tumhāre aur tumhārī aulād ke sāth ahd qāim kartā hūṅ. 10yah ahd un tamām jānvaroṅ ke sāth bhī hogā jo kashtī meṅ se nikle haiṅ yānī parindoṅ, maveshiyoṅ aur zamīn par ke tamām jānvaroṅ ke sāth. 11maiṅ tumhāre sāth ahd bāṅdh kar vādā kartā hūṅ ki ab se aisā kabhī nahīṅ hogā ki zamīn kī tamām zindagī sailāb se ḵẖatm kar dī jāegī. ab se aisā sailāb kabhī nahīṅ āegā jo pūrī zamīn ko tabāh kar de. 12is abdī ahd kā nishān jo maiṅ tumhāre aur tamām jāndāroṅ ke sāth qāim kar rahā hūṅ yah hai ki 13maiṅ apnī kamān bādloṅ meṅ rakhtā hūṅ. vah mere duniyā ke sāth ahd kā nishān hogā. 14jab kabhī mere kahane par āsmān par bādal chhā jāeṅge aur qaus-e-quzah un meṅ se nazar āegī 15to maiṅ yah ahd yād karūṅgā jo tumhāre aur tamām jāndāroṅ ke sāth kiyā gayā hai. ab kabhī bhī aisā sailāb nahīṅ āegā jo tamām zindagī ko halāk kar de. 16qaus-e-quzah nazar āegī to maiṅ use dekh kar us dāimī ahd ko yād karūṅgā jo mere aur duniyā kī tamām jāndār maḵẖlūqāt ke darmiyān hai. 17yah us ahd kā nishān hai jo maiṅ ne duniyā ke tamām jāndāroṅ ke sāth kiyā hai.”
nūh ke beṭe
18nūh ke jo beṭe us ke sāth kashtī se nikle sim, hām aur yāfat the. hām kan’ān kā bāp thā. 19duniyā bhar ke tamām log in tīnoṅ kī aulād haiṅ.
20nūh kisān thā. shurū meṅ us ne aṅgūr kā bāġ lagāyā. 21aṅgūr se mai banā kar us ne itnī pī lī ki vah nashe meṅ dhut apne ḍere meṅ naṅgā paṛā rahā. 22kan’ān ke bāp hām ne use yūṅ paṛā huā dekhā to bāhar jā kar apne donoṅ bhāiyoṅ ko us ke bāre meṅ batāyā. 23yah sun kar sim aur yāfat ne apne kaṅdhoṅ par kapṛā rakhā. phir vah ulṭe chalte hue ḍere meṅ dāḵẖil hue aur kapṛā apne bāp par ḍāl diyā. un ke muṅh dūsrī taraf muṛe rahe tāki bāp kī barahanagī nazar na āe.
24jab nūh hosh meṅ āyā to us ko patā chalā ki sab se chhoṭe beṭe ne kyā kiyā hai. 25us ne kahā, “kan’ān par lānat! vah apne bhāiyoṅ kā zalīltarīn ġulām hogā.
26mubārak ho rabb jo sim kā ḵẖudā hai. kan’ān sim kā ġulām ho. 27allāh kare ki yāfat kī hudūd baṛh jāeṅ. yāfat sim ke ḍeroṅ meṅ rahe aur kan’ān us kā ġulām ho.”
28sailāb ke bād nūh mazīd 350 sāl zindā rahā. 29vah 950 sāl kī umr meṅ faut huā.