Paidāish 50
yāqūb ko dafan kiyā jātā hai
1yūsuf apne bāp ke chihare se lipaṭ gayā. us ne rote hue use bosā diyā. 2us ke mulāzimoṅ meṅ se kuchh ḍākṭar the. us ne unheṅ hidāyat dī ki mere bāp isrāīl kī lāsh ko hanūt kareṅ tāki vah gal na jāe. unhoṅ ne aisā hī kiyā. 3is meṅ 40 din lag gae. ām taur par hanūt karne ke liye itne hī din lagte haiṅ. misriyoṅ ne 70 din tak yāqūb kā mātam kiyā.
4jab mātam kā vaqt ḵẖatm huā to yūsuf ne bādshāh ke darbāriyoṅ se kahā, “meharbānī karke yah ḵẖabar bādshāh tak pahuṅchā deṅ 5ki mere bāp ne mujhe qasam dilā kar kahā thā, ‘maiṅ marne vālā hūṅ. mujhe us qabr meṅ dafan karnā jo maiṅ ne mulk-e-kan’ān meṅ apne liye banvāī.’ ab mujhe ijāzat deṅ ki maiṅ vahāṅ jāūṅ aur apne bāp ko dafan karke vāpas āūṅ.” 6firaaun ne javāb diyā, “jā, apne bāp ko dafan kar jis tarah us ne tujhe qasam dilāī thī.”
7chunāṅche yūsuf apne bāp ko dafnāne ke liye kan’ān ravānā huā. bādshāh ke tamām mulāzim, mahal ke buzurg aur pūre misr ke buzurg us ke sāth the. 8yūsuf ke gharāne ke afrād, us ke bhāī aur us ke bāp ke gharāne ke log bhī sāth gae. sirf un ke bacche, un kī bheṛ-bakriyāṅ aur gāy-bail jushan meṅ rahe. 9rath aur ghuṛsavār bhī sāth gae. sab mil kar baṛā lashkar ban gae.
10jab vah yardan ke qarīb atad ke khaliyān par pahuṅche to unhoṅ ne nihāyat dilsoz nohā kiyā. vahāṅ yūsuf ne sāt din tak apne bāp kā mātam kiyā. 11jab maqāmī kan’āniyoṅ ne atad ke khaliyān par mātam kā yah nazārā dekhā to unhoṅ ne kahā, “yah to mātam kā bahut baṛā intizām hai jo misrī karvā rahe haiṅ.” is liye us jagah kā nām abīl-misrīm yānī ‘misriyoṅ kā mātam’ paṛ gayā. 12yūṅ yāqūb ke beṭoṅ ne apne bāp kā hukm pūrā kiyā. 13unhoṅ ne use mulk-e-kan’ān meṅ le jā kar makfīlā ke khet ke ġār meṅ dafan kiyā jo mamre ke mashriq meṅ hai. yah vahī khet hai jo ibrāhīm ne ifron hittī se apne logoṅ ko dafnāne ke liye ḵẖarīdā thā.
14is ke bād yūsuf, us ke bhāī aur bāqī tamām log jo janāze ke liye sāth gae the misr ko lauṭ āe.
yūsuf apne bhāiyoṅ ko tasallī detā hai
15jab yāqūb intiqāl kar gayā to yūsuf ke bhāī ḍar gae. unhoṅ ne kahā, “ḵẖatrā hai ki ab yūsuf hamārā tāqqub karke us ġalat kām kā badlā le jo ham ne us ke sāth kiyā thā. phir kyā hogā?” 16yah soch kar unhoṅ ne yūsuf ko ḵẖabar bhejī, “āp ke bāp ne marne se peshtar hidāyat dī 17ki yūsuf ko batānā, ‘apne bhāiyoṅ ke us ġalat kām ko muāf kar denā jo unhoṅ ne tumhāre sāth kiyā.’ ab hameṅ jo āp ke bāp ke ḵẖudā ke pairokār haiṅ muāf kar deṅ.”
yah ḵẖabar sun kar yūsuf ro paṛā. 18phir us ke bhāī ḵẖud āe aur us ke sāmne gir gae. unhoṅ ne kahā, “ham āp ke ḵẖādim haiṅ.” 19lekin yūsuf ne kahā, “mat ḍaro. kyā maiṅ allāh kī jagah hūṅ? hargiz nahīṅ! 20tum ne mujhe nuqsān pahuṅchāne kā irādā kiyā thā, lekin allāh ne us se bhalāī paidā kī. aur ab is kā maqsad pūrā ho rahā hai. bahut se log maut se bach rahe haiṅ. 21chunāṅche ab ḍarne kī zarūrat nahīṅ hai. maiṅ tumheṅ aur tumhāre bacchoṅ ko ḵẖurāk muhayyā kartā rahūṅgā.”
yūṅ yūsuf ne unheṅ tasallī dī aur un se narmī se bāt kī.
yūsuf kā intiqāl
22yūsuf apne bāp ke ḵẖāndān samet misr meṅ rahā. vah 110 sāl zindā rahā. 23maut se pahale us ne na sirf ifrāīm ke bacchoṅ ko balki us ke potoṅ ko bhī dekhā. manassī ke beṭe makīr ke bacche bhī us kī maujūdgī meṅ paidā ho kar us kī god meṅ rakhe gae. [a] ġāliban is kā matlab yah hai ki us ne unheṅ lepālak banāyā.
24phir ek vaqt āyā ki yūsuf ne apne bhāiyoṅ se kahā, “maiṅ marne vālā hūṅ. lekin allāh zarūr āp kī dekh-bhāl karke āp ko is mulk se us mulk meṅ le jāegā jis kā us ne ibrāhīm, ishāq aur yāqūb se qasam khā kar vādā kiyā hai.” 25phir yūsuf ne isrāīliyoṅ ko qasam dilā kar kahā, “allāh yaqīnan tumhārī dekh-bhāl karke vahāṅ le jāegā. us vaqt merī haḍḍiyoṅ ko bhī uṭhā kar sāth le jānā.”
26phir yūsuf faut ho gayā. vah 110 sāl kā thā. use hanūt karke misr meṅ ek tābūt meṅ rakhā gayā.