Paidāish 40
qaidiyoṅ ke ḵẖwāb
1kuchh der ke bād yūṅ huā ki misr ke bādshāh ke sardār sāqī aur bekarī ke iṅchārj ne apne mālik kā gunāh kiyā. 2firaaun ko donoṅ afsaroṅ par ġussā ā gayā. 3us ne unheṅ us qaidḵẖāne meṅ ḍāl diyā jo shāhī muhāfizoṅ ke kaptān ke sapurd thā aur jis meṅ yūsuf thā. 4muhāfizoṅ ke kaptān ne unheṅ yūsuf ke havāle kiyā tāki vah un kī ḵẖidmat kare. vahāṅ vah kāfī der tak rahe.
5ek rāt bādshāh ke sardār sāqī aur bekarī ke iṅchārj ne ḵẖwāb dekhā. donoṅ kā ḵẖwāb farq farq thā, aur un kā matlab bhī farq farq thā. 6jab yūsuf subah ke vaqt un ke pās āyā to vah dabe hue nazar āe. 7us ne un se pūchhā, “āj āp kyūṅ itne pareshān haiṅ?” 8unhoṅ ne javāb diyā, “ham donoṅ ne ḵẖwāb dekhā hai, aur koī nahīṅ jo hameṅ un kā matlab batāe.” yūsuf ne kahā, “ḵẖwāboṅ kī tābīr to allāh kā kām hai. zarā mujhe apne ḵẖwāb to sunāeṅ.”
9sardār sāqī ne shurū kiyā, “maiṅ ne ḵẖwāb meṅ apne sāmne aṅgūr kī bel dekhī. 10us kī tīn shāḵẖeṅ thīṅ. us ke patte lage, koṁpleṅ phūṭ niklīṅ aur aṅgūr pak gae. 11mere hāth meṅ bādshāh kā piyālā thā, aur maiṅ ne aṅgūroṅ ko toṛ kar yūṅ bhīṅch diyā ki un kā ras bādshāh ke piyāle meṅ ā gayā. phir maiṅ ne piyālā bādshāh ko pesh kiyā.”
12yūsuf ne kahā, “tīn shāḵẖoṅ se murād tīn din haiṅ. 13tīn din ke bād firaaun āp ko bahāl kar legā. āp ko pahalī zimmādārī vāpas mil jāegī. āp pahale kī tarah sardār sāqī kī haisiyat se bādshāh kā piyālā saṁbhāleṅge. 14lekin jab āp bahāl ho jāeṅ to merā ḵẖayāl kareṅ. meharbānī karke bādshāh ke sāmne merā zikr kareṅ tāki maiṅ yahāṅ se rihā ho jāūṅ. 15kyūṅki mujhe ibrāniyoṅ ke mulk se aġvā karke yahāṅ lāyā gayā hai, aur yahāṅ bhī mujh se koī aisī ġaltī nahīṅ huī ki mujhe is gaṛhe meṅ phaiṅkā jātā.”
16jab shāhī bekarī ke iṅchārj ne dekhā ki sardār sāqī ke ḵẖwāb kā acchhā matlab niklā to us ne yūsuf se kahā, “merā ḵẖwāb bhī suneṅ. maiṅ ne sar par tīn ṭokriyāṅ uṭhā rakhī thīṅ jo bekarī kī chīzoṅ se bharī huī thīṅ. 17sab se ūpar vālī ṭokrī meṅ vah tamām chīzeṅ thīṅ jo bādshāh kī mez ke liye banāī jātī haiṅ. lekin parinde ā kar unheṅ khā rahe the.”
18yūsuf ne kahā, “tīn ṭokriyoṅ se murād tīn din haiṅ. 19tīn din ke bād hī firaaun āp ko qaidḵẖāne se nikāl kar daraḵẖt se laṭkā degā. parinde āp kī lāsh ko khā jāeṅge.”
20tīn din ke bād bādshāh kī sālagirah thī. us ne apne tamām afsaroṅ kī ziyāfat kī. is mauqe par us ne sardār sāqī aur bekarī ke iṅchārj ko jel se nikāl kar apne huzūr lāne kā hukm diyā. 21sardār sāqī ko pahale vālī zimmādārī sauṁp dī gaī, 22lekin bekarī ke iṅchārj ko sazā-e-maut de kar daraḵẖt se laṭkā diyā gayā. sab kuchh vaisā hī huā jaisā yūsuf ne kahā thā.
23lekin sardār sāqī ne yūsuf kā ḵẖayāl na kiyā balki use bhūl hī gayā.