Paidāish 38

yahūdāh aur tamar

¹un dinoṅ meṅ yahūdāh apne bhāiyoṅ ko chhoṛ kar ek ādmī ke pās rahane lagā jis kā nām hīrā thā aur jo adullām shahar se thā. ²vahāṅ yahūdāh kī mulāqāt ek kan’ānī aurat se huī jis ke bāp kā nām sūa thā. us ne us se shādī kī. ³beṭā paidā huā jis kā nām yahūdāh ne er rakhā. ⁴ek aur beṭā paidā huā jis kā nām bīvī ne onān rakhā. ⁵us ke tīsrā beṭā bhī paidā huā. us ne us kā nām selā rakhā. yahūdāh qazīb meṅ thā jab vah paidā huā.

⁶yahūdāh ne apne baṛe beṭe er kī shādī ek laṛkī se karāī jis kā nām tamar thā. ⁷rabb ke nazdīk er sharīr thā, is liye us ne use halāk kar diyā. ⁸is par yahūdāh ne er ke chhoṭe bhāī onān se kahā, “apne baṛe bhāī kī bevā ke pās jāo aur us se shādī karo tāki tumhāre bhāī kī nasal qāim rahe.” ⁹onān ne aisā kiyā, lekin vah jāntā thā ki jo bhī bacche paidā hoṅge vah qānūn ke mutābiq mere baṛe bhāī ke hoṅge. is liye jab bhī vah tamar se hambistar hotā to nutfā ko zamīn par girā detā, kyūṅki vah nahīṅ chāhatā thā ki merī mārifat mere bhāī ke bacche paidā hoṅ. ¹⁰yah bāt rabb ko burī lagī, aur us ne use bhī sazā-e-maut dī. ¹¹tab yahūdāh ne apnī bahū tamar se kahā, “apne bāp ke ghar vāpas chalī jāo aur us vaqt tak bevā raho jab tak merā beṭā selā baṛā na ho jāe.” us ne yah is liye kahā ki use ḍar thā ki kahīṅ selā bhī apne bhāiyoṅ kī tarah mar na jāe chunāṅche tamar apne maike chalī gaī.

¹²kāfī dinoṅ ke bād yahūdāh kī bīvī jo sūa kī beṭī thī mar gaī. mātam kā vaqt guzar gayā to yahūdāh apne adullāmī dost hīrā ke sāth timnat gayā jahāṅ yahūdāh kī bheṛoṅ kī pashm katrī jā rahī thī. ¹³tamar ko batāyā gayā, “āp kā susar apnī bheṛoṅ kī pashm katarne ke liye timnat jā rahā hai.” ¹⁴yah sun kar tamar ne bevā ke kapṛe utār kar ām kapṛe pahan liye. phir vah apnā muṅh chādar se lapeṭ kar ainīm shahar ke darvāze par baiṭh gaī jo timnat ke rāste meṅ thā. tamar ne yah harkat is liye kī ki yahūdāh kā beṭā selā ab bāliġ ho chukā thā to bhī us kī us ke sāth shādī nahīṅ kī gaī thī.

¹⁵jab yahūdāh vahāṅ se guzrā to us ne use dekh kar sochā ki yah kasbī hai, kyūṅki us ne apnā muṅh chhupāyā huā thā. ¹⁶vah rāste se haṭ kar us ke pās gayā aur kahā, “zarā mujhe apne hāṅ āne deṅ.” (us ne nahīṅ pahachānā ki yah merī bahū hai). tamar ne kahā, “āp mujhe kyā deṅge?” ¹⁷us ne javāb diyā, “maiṅ āp ko bakrī kā bacchā bhej dūṅgā.” tamar ne kahā, “ṭhīk hai, lekin use bhejne tak mujhe zamānat deṅ.” ¹⁸us ne pūchhā, “maiṅ āp ko kyā dūṅ?” tamar ne kahā, “apnī muhar aur use gale meṅ laṭkāne kī ḍorī. vah lāṭhī bhī deṅ jo āp pakṛe hue haiṅ.” chunāṅche yahūdāh use yah chīzeṅ de kar us ke sāth hambistar huā. natīje meṅ tamar ummīd se huī. ¹⁹phir tamar uṭh kar apne ghar vāpas chalī gaī. us ne apnī chādar utār kar dubārā bevā ke kapṛe pahan liye.

²⁰yahūdāh ne apne dost hīrā adullāmī ke hāth bakrī kā bacchā bhej diyā tāki vah chīzeṅ vāpas mil jāeṅ jo us ne zamānat ke taur par dī thīṅ. lekin hīrā ko patā na chalā ki aurat kahāṅ hai. ²¹us ne ainīm ke bāshindoṅ se pūchhā, “vah kasbī kahāṅ hai jo yahāṅ saṛak par baiṭhī thī?” unhoṅ ne javāb diyā, “yahāṅ aisī koī kasbī nahīṅ thī.”

²²us ne yahūdāh ke pās vāpas jā kar kahā, “vah mujhe nahīṅ milī balki vahāṅ ke rahane vāloṅ ne kahā ki yahāṅ koī aisī kasbī thī nahīṅ.” ²³yahūdāh ne kahā, “phir vah zamānat kī chīzeṅ apne pās hī rakhe. use chhoṛ do varnā log hamārā mazāq uṛāeṅge. ham ne to pūrī koshish kī ki use bakrī kā bacchā mil jāe, lekin āp ko khoj lagāne ke bāvujūd patā na chalā ki vah kahāṅ hai.”

²⁴tīn māh ke bād yahūdāh ko ittilā dī gaī, “āp kī bahū tamar ne zinā kiyā hai, aur ab vah hāmilā hai.” yahūdāh ne hukm diyā, “use bāhar lā kar jalā do.” ²⁵tamar ko jalāne ke liye bāhar lāyā gayā to us ne apne susar ko ḵẖabar bhej dī, “yah chīzeṅ dekheṅ. yah us ādmī kī haiṅ jis kī mārifat maiṅ ummīd se hūṅ. patā kareṅ ki yah muhar, us kī ḍorī aur yah lāṭhī kis kī haiṅ.” ²⁶yahūdāh ne unheṅ pahachān liyā. us ne kahā, “maiṅ nahīṅ balki yah aurat haq par hai, kyūṅki maiṅ ne us kī apne beṭe selā se shādī nahīṅ karāī.” lekin bād meṅ yahūdāh kabhī bhī tamar se hambistar na huā.

²⁷jab janm dene kā vaqt āyā to mālūm huā ki juṛvāṅ bacche haiṅ. ²⁸ek bacche kā hāth niklā to dāī ne use pakaṛ kar us meṅ surḵẖ dhāgā bāṅdh diyā aur kahā, “yah pahale paidā huā.” ²⁹lekin us ne apnā hāth vāpas khaiṅch liyā, aur us kā bhāī pahale paidā huā. yah dekh kar dāī bol uṭhī, “tū kis tarah phūṭ niklā hai!” us ne us kā nām fāras yānī phūṭ rakhā. ³⁰phir us kā bhāī paidā huā jis ke hāth meṅ surḵẖ dhāgā baṅdhā huā thā. us kā nām zārah yānī chamak rakhā gayā.