Paidāish 37
yūsuf ke ḵẖwāb
1yāqūb mulk-e-kan’ān meṅ rahatā thā jahāṅ pahale us kā bāp bhī pardesī thā. 2yah yāqūb ke ḵẖāndān kā bayān hai.
us vaqt yāqūb kā beṭā yūsuf 17 sāl kā thā. vah apne bhāiyoṅ yānī bilhāh aur zilfā ke beṭoṅ ke sāth bheṛ-bakriyoṅ kī dekh-bhāl kartā thā. yūsuf apne bāp ko apne bhāiyoṅ kī burī harkatoṅ kī ittilā diyā kartā thā.
3yāqūb yūsuf ko apne tamām beṭoṅ kī nisbat ziyādā piyār kartā thā. vajah yah thī ki vah tab paidā huā jab bāp būṛhā thā. is liye yāqūb ne us ke liye ek ḵẖās raṅgdār libās banvāyā. 4jab us ke bhāiyoṅ ne dekhā ki hamārā bāp yūsuf ko ham se ziyādā piyār kartā hai to vah us se nafrat karne lage aur adab se us se bāt nahīṅ karte the.
5ek rāt yūsuf ne ḵẖwāb dekhā. jab us ne apne bhāiyoṅ ko ḵẖwāb sunāyā to vah us se aur bhī nafrat karne lage. 6us ne kahā, “suno, maiṅ ne ḵẖwāb dekhā. 7ham sab khet meṅ pūle bāṅdh rahe the ki merā pūlā khaṛā ho gayā. āp ke pūle mere pūle ke ird-gird jamā ho kar us ke sāmne jhuk gae.” 8us ke bhāiyoṅ ne kahā, “acchhā, tū bādshāh ban kar ham par hukūmat karegā?” us ke ḵẖwāboṅ aur us kī bātoṅ ke sabab se un kī us se nafrat mazīd baṛh gaī.
9kuchh der ke bād yūsuf ne ek aur ḵẖwāb dekhā. us ne apne bhāiyoṅ se kahā, “maiṅ ne ek aur ḵẖwāb dekhā hai. us meṅ sūraj, chāṅd aur gyārah sitāre mere sāmne jhuk gae.” 10us ne yah ḵẖwāb apne bāp ko bhī sunāyā to us ne use ḍāṅṭā. us ne kahā, “yah kaisā ḵẖwāb hai jo tū ne dekhā! yah kaisī bāt hai ki maiṅ, terī māṅ aur tere bhāī ā kar tere sāmne zamīn tak jhuk jāeṅ?” 11natīje meṅ us ke bhāī us se bahut hasad karne lage. lekin us ke bāp ne dil meṅ yah bāt mahfūz rakhī.
yūsuf ko bechā jātā hai
12ek din jab yūsuf ke bhāī apne bāp ke revaṛ charāne ke liye sikam tak pahuṅch gae the 13to yāqūb ne yūsuf se kahā, “tere bhāī sikam meṅ revṛoṅ ko charā rahe haiṅ. ā, maiṅ tujhe un ke pās bhej detā hūṅ.” yūsuf ne javāb diyā, “ṭhīk hai.” 14yāqūb ne kahā, “jā kar mālūm kar ki tere bhāī aur un ke sāth ke revaṛ ḵẖairiyat se haiṅ ki nahīṅ. phir vāpas ā kar mujhe batā denā.” chunāṅche us ke bāp ne use vādī-e-habrūn se bhej diyā, aur yūsuf sikam pahuṅch gayā.
15vahāṅ vah idhar udhar phirtā rahā. āḵẖirkār ek ādmī us se milā aur pūchhā, “āp kyā ḍhūṅḍ rahe haiṅ?” 16yūsuf ne javāb diyā, “maiṅ apne bhāiyoṅ ko talāsh kar rahā hūṅ. mujhe batāeṅ ki vah apne jānvaroṅ ko kahāṅ charā rahe haiṅ.” 17ādmī ne kahā, “vah yahāṅ se chale gae haiṅ. maiṅ ne unheṅ yah kahate sunā ki āo, ham dūtain jāeṅ.” yah sun kar yūsuf apne bhāiyoṅ ke pīchhe dūtain chalā gayā. vahāṅ use vah mil gae.
18jab yūsuf abhī dūr se nazar āyā to us ke bhāiyoṅ ne us ke pahuṅchne se pahale use qatl karne kā mansūbā banāyā. 19unhoṅ ne kahā, “dekho, ḵẖwāb dekhne vālā ā rahā hai. 20āo, ham use mār ḍāleṅ aur us kī lāsh kisī gaṛhe meṅ phaiṅk deṅ. ham kaheṅge ki kisī vahashī jānvar ne use phāṛ khāyā hai. phir patā chalegā ki us ke ḵẖwāboṅ kī kyā haqīqat hai.”
21jab rūbin ne un kī bāteṅ sunīṅ to us ne yūsuf ko bachāne kī koshish kī. us ne kahā, “nahīṅ, ham use qatl na kareṅ. 22us kā ḵẖūn na karnā. beshak use is gaṛhe meṅ phaiṅk deṅ jo registān meṅ hai, lekin use hāth na lagāeṅ.” us ne yah is liye kahā ki vah use bachā kar bāp ke pās vāpas pahuṅchānā chāhatā thā.
23jūṅ hī yūsuf apne bhāiyoṅ ke pās pahuṅchā unhoṅ ne us kā raṅgdār libās utār kar 24yūsuf ko gaṛhe meṅ phaiṅk diyā. gaṛhā ḵẖālī thā, us meṅ pānī nahīṅ thā. 25phir vah roṭī khāne ke liye baiṭh gae. achānak ismāīliyoṅ kā ek qāfilā nazar āyā. vah jiliād se misr jā rahe the, aur un ke ūṅṭ qīmtī masāloṅ yānī lādan, balsān aur mur se lade hue the. 26tab yahūdāh ne apne bhāiyoṅ se kahā, “hameṅ kyā fāidā hai agar apne bhāī ko qatl karke us ke ḵẖūn ko chhupā deṅ? 27āo, ham use in ismāīliyoṅ ke hāth faroḵẖt kar deṅ. phir koī zarūrat nahīṅ hogī ki ham use hāth lagāeṅ. āḵẖir vah hamārā bhāī hai.”
us ke bhāī rāzī hue. 28chunāṅche jab midiyānī tājir vahāṅ se guzre to bhāiyoṅ ne yūsuf ko khaiṅch kar gaṛhe se nikālā aur chāṅdī ke 20 sikkoṅ ke ivz bech ḍālā. ismāīlī use le kar misr chale gae.
29us vaqt rūbin maujūd nahīṅ thā. jab vah gaṛhe ke pās vāpas āyā to yūsuf us meṅ nahīṅ thā. yah dekh kar us ne pareshānī meṅ apne kapṛe phāṛ ḍāle. 30vah apne bhāiyoṅ ke pās vāpas gayā aur kahā, “laṛkā nahīṅ hai. ab maiṅ kis tarah abbū ke pās jāūṅ?” 31tab unhoṅ ne bakrā zabah karke yūsuf kā libās us ke ḵẖūn meṅ ḍuboyā, 32phir raṅgdār libās is ḵẖabar ke sāth apne bāp ko bhijvā diyā ki “hameṅ yah milā hai. ise ġaur se dekheṅ. yah āp ke beṭe kā libās to nahīṅ?”
33yāqūb ne use pahachān liyā aur kahā, “beshak usī kā hai. kisī vahashī jānvar ne use phāṛ khāyā hai. yaqīnan yūsuf ko phāṛ diyā gayā hai.” 34yāqūb ne ġam ke māre apne kapṛe phāṛe aur apnī kamar se ṭāṭ oṛh kar baṛī der tak apne beṭe ke liye mātam kartā rahā. 35us ke tamām beṭe-beṭiyāṅ use tasallī dene āe, lekin us ne tasallī pāne se inkār kiyā aur kahā, “maiṅ pātāl meṅ utarte hue bhī apne beṭe ke liye mātam karūṅgā.” is hālat meṅ vah apne beṭe ke liye rotā rahā.
36itne meṅ midiyānī misr pahuṅch kar yūsuf ko bech chuke the. misr ke bādshāh firaaun ke ek ālā afsar fūtīfār ne use ḵẖarīd liyā. fūtīfār bādshāh ke muhāfizoṅ par muqarrar thā.