Paidāish 35
bait-el meṅ yāqūb par allāh kī barkat
1allāh ne yāqūb se kahā, “uṭh, bait-el jā kar vahāṅ ābād ho. vahīṅ allāh ke liye jo tujh par zāhir huā jab tū apne bhāī esau se bhāg rahā thā qurbāngāh banā.” 2chunāṅche yāqūb ne apne ghar vāloṅ aur bāqī sāre sāthiyoṅ se kahā, “jo bhī ajnabī but āp ke pās haiṅ unheṅ phaiṅk deṅ. apne āp ko pāk-sāf karke apne kapṛe badleṅ, 3kyūṅki hameṅ yah jagah chhoṛ kar bait-el jānā hai. vahāṅ maiṅ us ḵẖudā ke liye qurbāngāh banāūṅgā jis ne musībat ke vaqt merī duā sunī. jahāṅ bhī maiṅ gayā vahāṅ vah mere sāth rahā hai.” 4yah sun kar unhoṅ ne yāqūb ko tamām but de die jo un ke pās the aur tamām bāliyāṅ jo unhoṅ ne tāvīz ke taur par kānoṅ meṅ pahan rakhī thīṅ. us ne sab kuchh sikam ke qarīb balūt ke daraḵẖt ke nīche zamīn meṅ dabā diyā. 5phir vah ravānā hue. ird-gird ke shaharoṅ par allāh kī taraf se itnā shadīd ḵẖauf chhā gayā ki unhoṅ ne yāqūb aur us ke beṭoṅ kā tāqqub na kiyā.
6chalte chalte yāqūb apne logoṅ samet lūz pahuṅch gayā jo mulk-e-kan’ān meṅ thā. āj lūz kā nām bait-el hai. 7yāqūb ne vahāṅ qurbāngāh banā kar maqām kā nām bait-el yānī ‘allāh kā ghar’ rakhā. kyūṅki vahāṅ allāh ne apne āp ko us par zāhir kiyā thā jab vah apne bhāī se farār ho rahā thā.
8vahāṅ ribqā kī dāyā daborā mar gaī. vah bait-el ke junūb meṅ balūt ke daraḵẖt ke nīche dafan huī, is liye us kā nām allon-bakūt yānī ‘rone kā balūt kā daraḵẖt’ rakhā gayā.
9allāh yāqūb par ek dafā aur zāhir huā aur use barkat dī. yah masoputāmiyā se vāpas āne par dūsrī bār huā. 10allāh ne us se kahā, “ab se terā nām yāqūb nahīṅ balki isrāīl hogā.” yūṅ us ne us kā nayā nām isrāīl rakhā. 11allāh ne yah bhī us se kahā, “maiṅ allāh qādir-e-mutlaq hūṅ. phal phūl aur tādād meṅ baṛhtā jā. ek qaum nahīṅ balki bahut sī qaumeṅ tujh se nikaleṅgī. terī aulād meṅ bādshāh bhī shāmil hoṅge. 12maiṅ tujhe vahī mulk dūṅgā jo ibrāhīm aur ishāq ko diyā hai. aur tere bād use terī aulād ko dūṅgā.”
13phir allāh vahāṅ se āsmān par chalā gayā. 14jahāṅ allāh yāqūb se hamkalām huā thā vahāṅ us ne patthar kā satūn khaṛā kiyā aur us par mai aur tel uṅḍel kar use maḵẖsūs kiyā. 15us ne jagah kā nām bait-el rakhā.
rāḵẖil kī maut
16phir yāqūb apne ghar vāloṅ ke sāth bait-el ko chhoṛ kar ifrātā kī taraf chal paṛā. rāḵẖil ummīd se thī, aur rāste meṅ bacche kī paidāish kā vaqt ā gayā. bacchā baṛī mushkil se paidā huā. 17jab dard-e-zah urūj ko pahuṅch gayā to dāī ne us se kahā, “mat ḍaro, kyūṅki ek aur beṭā hai.” 18lekin vah dam toṛne vālī thī, aur marte marte us ne us kā nām bin-ūnī yānī ‘merī musībat kā beṭā’ rakhā. lekin us ke bāp ne us kā nām binyamīn yānī ‘dahane hāth yā ḵẖushqisamtī kā beṭā’ rakhā. 19rāḵẖil faut huī, aur vah ifrātā ke rāste meṅ dafan huī. ājkal ifrātā ko bait-laham kahā jātā hai. 20yāqūb ne us kī qabr par patthar kā satūn khaṛā kiyā. vah āj tak rāḵẖil kī qabr kī nishāndihī kartā hai.
21vahāṅ se yāqūb ne apnā safar jārī rakhā aur mijdal-idar kī parlī taraf apne ḵẖaime lagāe. 22jab vah vahāṅ ṭhahare the to rūbin yāqūb kī haram bilhāh se hambistar huā. yāqūb ko mālūm ho gayā.
yāqūb ke beṭe
yāqūb ke bārah beṭe the. 23liyāh ke beṭe yah the : us kā sab se baṛā beṭā rūbin, phir shamāūn, lāvī, yahūdāh, ishkār aur zabūlūn. 24rāḵẖil ke do beṭe the, yūsuf aur binyamīn. 25rāḵẖil kī lauṅḍī bilhāh ke do beṭe the, dān aur naftālī. 26liyāh kī lauṅḍī zilfā ke do beṭe the, jad aur āshar. yāqūb ke yah beṭe masoputāmiyā meṅ paidā hue.
ishāq kī maut
27phir yāqūb apne bāp ishāq ke pās pahuṅch gayā jo habrūn ke qarīb mamre meṅ ajnabī kī haisiyat se rahatā thā (us vaqt habrūn kā nām qiryat-arbā thā). vahāṅ ishāq aur us se pahale ibrāhīm rahā karte the. 28-29 ishāq 180 sāl kā thā jab vah umrrasīdā aur zindagī se āsūdā ho kar apne bāpdādā se jā milā. us ke beṭe esau aur yāqūb ne use dafan kiyā.