Paidāish 34

dīnā kī ismatdarī

¹ek din yāqūb aur liyāh kī beṭī dīnā kan’ānī aurtoṅ se milne ke liye ghar se niklī. ²shahar meṅ ek ādmī banām sikam rahatā thā. us kā vālid hamor us ilāqe kā hukmarān thā aur hivvī qaum se tālluq rakhtā thā. jab sikam ne dīnā ko dekhā to us ne use pakaṛ kar us kī ismatdarī kī. ³lekin us kā dil dīnā se lag gayā. vah us se muhabbat karne lagā aur piyār se us se bāteṅ kartā rahā. ⁴us ne apne bāp se kahā, “is laṛkī ke sāth merī shādī karā deṅ.”

⁵jab yāqūb ne apnī beṭī kī ismatdarī kī ḵẖabar sunī to us ke beṭe maveshiyoṅ ke sāth khule maidān meṅ the. is liye vah un ke vāpas āne tak ḵẖāmosh rahā.

⁶sikam kā bāp hamor shahar se nikal kar yāqūb se bāt karne ke liye āyā. ⁷jab yāqūb ke beṭoṅ ko dīnā kī ismatdarī kī ḵẖabar milī to un ke dil raṅjish aur ġusse se bhar gae ki sikam ne yāqūb kī beṭī kī ismatdarī se isrāīl kī itnī beizzatī kī hai. vah sīdhe khule maidān se vāpas āe. ⁸hamor ne yāqūb se kahā, “mere beṭe kā dil āp kī beṭī se lag gayā hai. meharbānī karke us kī shādī mere beṭe ke sāth kar deṅ. ⁹hamāre sāth rishtā bāṅdheṅ, hamāre beṭe-beṭiyoṅ ke sāth shādiyāṅ karāeṅ. ¹⁰phir āp hamāre sāth is mulk meṅ rah sakeṅge aur pūrā mulk āp ke liye khulā hogā. āp jahāṅ bhī chāheṅ ābād ho sakeṅge, tijārat kar sakeṅge aur zamīn ḵẖarīd sakeṅge.” ¹¹sikam ne ḵẖud bhī dīnā ke bāp aur bhāiyoṅ se minnat kī, “agar merī yah daraḵẖwāst manzūr ho to maiṅ jo kuchh āp kaheṅge adā kar dūṅgā. ¹²jitnā bhī mahar aur tuhfe āp muqarrar kareṅ maiṅ de dūṅgā. sirf merī yah ḵẖwāhish pūrī kareṅ ki yah laṛkī mere aqad meṅ ā jāe.”

¹³lekin dīnā kī ismatdarī ke sabab se yāqūb ke beṭoṅ ne sikam aur us ke bāp hamor se chālākī karke ¹⁴kahā, “ham aisā nahīṅ kar sakte. ham apnī bahan kī shādī kisī aise ādmī se nahīṅ karā sakte jis kā ḵẖatnā nahīṅ huā. is se hamārī beizzatī hotī hai. ¹⁵ham sirf is shart par rāzī hoṅge ki āp apne tamām laṛkoṅ aur mardoṅ kā ḵẖatnā karvāne se hamārī mānind ho jāeṅ. ¹⁶phir āp ke beṭe-beṭiyoṅ ke sāth hamārī shādiyāṅ ho sakeṅgī aur ham āp ke sāth ek qaum ban jāeṅge. ¹⁷lekin agar āp ḵẖatnā karāne ke liye tayyār nahīṅ haiṅ to ham apnī bahan ko le kar chale jāeṅge.”

¹⁸yah bāteṅ hamor aur us ke beṭe sikam ko acchhī lagīṅ. ¹⁹naujavān sikam ne fauran un par amal kiyā, kyūṅki vah dīnā ko bahut pasand kartā thā. sikam apne ḵẖāndān meṅ sab se muazzaz thā. ²⁰hamor apne beṭe sikam ke sāth shahar ke darvāze par gayā jahāṅ shahar ke faisle kie jāte the. vahāṅ unhoṅ ne bāqī shahariyoṅ se bāt kī. ²¹“yah ādmī ham se jhagaṛne vāle nahīṅ haiṅ, is liye kyūṅ na vah is mulk meṅ hamāre sāth raheṅ aur hamāre darmiyān tijārat kareṅ? hamāre mulk meṅ un ke liye bhī kāfī jagah hai. āo, ham un kī beṭiyoṅ aur beṭoṅ se shādiyāṅ kareṅ. ²²lekin yah ādmī sirf is shart par hamāre darmiyān rahane aur ek hī qaum banne ke liye tayyār haiṅ ki ham un kī tarah apne tamām laṛkoṅ aur mardoṅ kā ḵẖatnā karāeṅ. ²³agar ham aisā kareṅ to un ke tamām maveshī aur sārā māl hamārā hī hogā. chunāṅche āo, ham muttafiq ho kar faislā kar leṅ tāki vah hamāre darmiyān raheṅ.”

²⁴sikam ke shaharī hamor aur sikam ke mashvre par rāzī hue. tamām laṛkoṅ aur mardoṅ kā ḵẖatnā karāyā gayā. ²⁵tīn din ke bād jab ḵẖatne ke sabab se logoṅ kī hālat burī thī to dīnā ke do bhāī shamāūn aur lāvī apnī talvāreṅ le kar shahar meṅ dāḵẖil hue. kisī ko shak tak nahīṅ thā ki kyā kuchh hogā. andar jā kar unhoṅ ne bacchoṅ se le kar būṛhoṅ tak tamām mardoṅ ko qatl kar diyā ²⁶jin meṅ hamor aur us kā beṭā sikam bhī shāmil the. phir vah dīnā ko sikam ke ghar se le kar chale gae.

²⁷is qatl-e-ām ke bād yāqūb ke bāqī beṭe shahar par ṭūṭ paṛe aur use lūṭ liyā. yūṅ unhoṅ ne apnī bahan kī ismatdarī kā badlā liyā. ²⁸vah bheṛ-bakriyāṅ, gāy-bail, gadhe aur shahar ke andar aur bāhar kā sab kuchh le kar chalte bane. ²⁹unhoṅ ne sāre māl par qabzā kiyā, aurtoṅ aur bacchoṅ ko qaidī banā liyā aur tamām gharoṅ kā sāmān bhī le gae.

³⁰phir yāqūb ne shamāūn aur lāvī se kahā, “tum ne mujhe musībat meṅ ḍāl diyā hai. ab kan’ānī, farizzī aur mulk ke bāqī bāshindoṅ meṅ merī badnāmī huī hai. mere sāth kam ādmī haiṅ. agar dūsre mil kar ham par hamlā kareṅ to hamāre pūre ḵẖāndān kā satyānās ho jāegā.” ³¹lekin unhoṅ ne kahā, “kyā yah ṭhīk thā ki us ne hamārī bahan ke sāth kasbī kā sā sulūk kiyā?”