Paidāish 29

yāqūb lāban ke ghar pahuṅchtā hai

¹yāqūb ne apnā safar jārī rakhā aur chalte chalte mashriqī qaumoṅ ke mulk meṅ pahuṅch gayā. ²vahāṅ us ne khet meṅ kuāṅ dekhā jis ke ird-gird bheṛ-bakriyoṅ ke tīn revaṛ jamā the. revṛoṅ ko kueṅ kā pānī pilāyā jānā thā, lekin us ke muṅh par baṛā patthar paṛā thā. ³vahāṅ pānī pilāne kā yah tarīqā thā ki pahale charvāhe tamām revṛoṅ kā intizār karte aur phir patthar ko luṛhkā kar muṅh se haṭā dete the. pānī pilāne ke bād vah patthar ko dubārā muṅh par rakh dete the.

⁴yāqūb ne charvāhoṅ se pūchhā, “mere bhāiyo, āp kahāṅ ke haiṅ?” unhoṅ ne javāb diyā, “hārān ke.” ⁵us ne pūchhā, “kyā āp nahūr ke pote lāban ko jānte haiṅ?” unhoṅ ne kahā, “jī hāṅ.” ⁶us ne pūchhā, “kyā vah ḵẖairiyat se hai?” unhoṅ ne kahā, “jī, vah ḵẖairiyat se hai. dekho, udhar us kī beṭī rāḵẖil revaṛ le kar ā rahī hai.” ⁷yāqūb ne kahā, “abhī to shām tak bahut vaqt bāqī hai. revṛoṅ ko jamā karne kā vaqt to nahīṅ hai. āp kyūṅ unheṅ pānī pilā kar dubārā charne nahīṅ dete?” ⁸unhoṅ ne javāb diyā, “pahale zarūrī hai ki tamām revaṛ yahāṅ pahuṅcheṅ. tab hī patthar ko luṛhkā kar ek taraf haṭāyā jāegā aur ham revṛoṅ ko pānī pilāeṅge.”

⁹yāqūb abhī un se bāt kar hī rahā thā ki rāḵẖil apne bāp kā revaṛ le kar ā pahuṅchī, kyūṅki bheṛ-bakriyoṅ ko charānā us kā kām thā. ¹⁰jab yāqūb ne rāḵẖil ko māmūṅ lāban ke revaṛ ke sāth āte dekhā to us ne kueṅ ke pās jā kar patthar ko luṛhkā kar muṅh se haṭā diyā aur bheṛ-bakriyoṅ ko pānī pilāyā. ¹¹phir us ne use bosā diyā aur ḵẖūb rone lagā. ¹²us ne kahā, “maiṅ āp ke abbū kī bahan ribqā kā beṭā hūṅ.” yah sun kar rāḵẖil ne bhāg kar apne abbū ko ittilā dī.

¹³jab lāban ne sunā ki merā bhānjā yāqūb āyā hai to vah dauṛ kar us se milne gayā aur use gale lagā kar apne ghar le āyā. yāqūb ne use sab kuchh batā diyā jo huā thā. ¹⁴lāban ne kahā, “āp vāqaī mere rishtedār haiṅ.” yāqūb ne vahāṅ ek pūrā mahīnā guzārā.

apnī bīviyoṅ ke liye yāqūb kī mehanat-mashaqqat

¹⁵phir lāban yāqūb se kahane lagā, “beshak āp mere rishtedār haiṅ, lekin āp ko mere liye kām karne ke badle meṅ kuchh milnā chāhie. maiṅ āp ko kitne paise dūṅ?” ¹⁶lāban kī do beṭiyāṅ thīṅ. baṛī kā nām liyāh thā aur chhoṭī kā rāḵẖil. ¹⁷liyāh kī āṅkheṅ chundhī thīṅ jabki rāḵẖil har tarah se ḵẖūbsūrat thī. ¹⁸yāqūb ko rāḵẖil se muhabbat thī, is liye us ne kahā, “agar mujhe āp kī chhoṭī beṭī rāḵẖil mil jāe to āp ke liye sāt sāl kām karūṅgā.” ¹⁹lāban ne kahā, “kisī aur ādmī kī nisbat mujhe yah ziyādā pasand hai ki āp hī se us kī shādī karāūṅ.”

²⁰pas yāqūb ne rāḵẖil ko pāne ke liye sāt sāl tak kām kiyā. lekin use aisā lagā jaisā do ek din hī guzre hoṅ kyūṅki vah rāḵẖil ko shiddat se piyār kartā thā. ²¹is ke bād us ne lāban se kahā, “muddat pūrī ho gaī hai. ab mujhe apnī beṭī se shādī karne deṅ.” ²²lāban ne us maqām ke tamām logoṅ ko dāvat de kar shādī kī ziyāfat kī. ²³lekin us rāt vah rāḵẖil kī bajāy liyāh ko yāqūb ke pās le āyā, aur yāqūb usī se hambistar huā. ²⁴(lāban ne liyāh ko apnī lauṅḍī zilfā de dī thī tāki vah us kī ḵẖidmat kare.)

²⁵jab subah huī to yāqūb ne dekhā ki liyāh hī mere pās hai. us ne lāban ke pās jā kar kahā, “yah āp ne mere sāth kyā kiyā hai? kyā maiṅ ne rāḵẖil ke liye kām nahīṅ kiyā? āp ne mujhe dhokā kyūṅ diyā?” ²⁶lāban ne javāb diyā, “yahāṅ dastūr nahīṅ hai ki chhoṭī beṭī kī shādī baṛī se pahale kar dī jāe ²⁷ek hafte ke bād shādī kī rusūmāt pūrī ho jāeṅgī. us vaqt tak sabr kareṅ. phir maiṅ āp ko rāḵẖil bhī de dūṅgā. shart yah hai ki āp mazīd sāt sāl mere liye kām kareṅ.”

²⁸yāqūb mān gayā. chunāṅche jab ek hafte ke bād shādī kī rusūmāt pūrī huīṅ to lāban ne apnī beṭī rāḵẖil kī shādī bhī us ke sāth kar dī. ²⁹(lāban ne rāḵẖil ko apnī lauṅḍī bilhāh de dī tāki vah us kī ḵẖidmat kare.) ³⁰yāqūb rāḵẖil se bhī hambistar huā. vah liyāh kī nisbat use ziyādā piyār kartā thā. phir us ne rāḵẖil ke ivz sāt sāl aur lāban kī ḵẖidmat kī.

yāqūb ke bacche

³¹jab rabb ne dekhā ki liyāh se nafrat kī jātī hai to us ne use aulād dī jabki rāḵẖil ke hāṅ bacche paidā na hue.

³²liyāh hāmilā huī aur us ke beṭā paidā huā. us ne kahā, “rabb ne merī musībat dekhī hai aur ab merā shauhar mujhe piyār karegā.” us ne us kā nām rūbin yānī ‘dekho ek beṭā’ rakhā.

³³vah dubārā hāmilā huī. ek aur beṭā paidā huā. us ne kahā, “rabb ne sunā ki mujh se nafrat kī jātī hai, is liye us ne mujhe yah bhī diyā hai.” us ne us kā nām shamāūn yānī ‘rabb ne sunā hai’ rakhā.

³⁴vah ek aur dafā hāmilā huī. tīsrā beṭā paidā huā. us ne kahā, “ab āḵẖirkār shauhar ke sāth merā baṅdhan mazbūt ho jāegā, kyūṅki maiṅ ne us ke liye tīn beṭoṅ ko janm diyā hai.” us ne us kā nām lāvī yānī baṅdhan rakhā.

³⁵vah ek bār phir hāmilā huī. chauthā beṭā paidā huā. us ne kahā, “is dafā maiṅ rabb kī tamjīd karūṅgī.” us ne us kā nām yahūdāh yānī tamjīd rakhā. is ke bād us se aur bacche paidā na hue.