Paidāish 26

ishāq aur ribqā jirār meṅ

¹us mulk meṅ dubārā kāl paṛā, jis tarah ibrāhīm ke dinoṅ meṅ bhī paṛ gayā thā. ishāq jirār shahar gayā jis par filistiyoṅ ke bādshāh abīmlik kī hukūmat thī. ²rabb ne ishāq par zāhir ho kar kahā, “misr na jā balki us mulk meṅ bas jo maiṅ tujhe dikhātā hūṅ. ³us mulk meṅ ajnabī rah to maiṅ tere sāth hūṅgā aur tujhe barkat dūṅgā. kyūṅki maiṅ tujhe aur terī aulād ko yah tamām ilāqā dūṅgā aur vah vādā pūrā karūṅgā jo maiṅ ne qasam khā kar tere bāp ibrāhīm se kiyā thā. ⁴maiṅ tujhe itnī aulād dūṅgā jitne āsmān par sitāre haiṅ. aur maiṅ yah tamām mulk unheṅ de dūṅgā. terī aulād se duniyā kī tamām qaumeṅ barkat pāeṅgī. ⁵maiṅ tujhe is liye barkat dūṅgā ki ibrāhīm mere tābe rahā aur merī hidāyāt aur ahkām par chaltā rahā.” ⁶chunāṅche ishāq jirār meṅ ābād ho gayā.

⁷jab vahāṅ ke mardoṅ ne ribqā ke bāre meṅ pūchhā to ishāq ne kahā, “yah merī bahan hai.” vah unheṅ yah batāne se ḍartā thā ki yah merī bīvī hai, kyūṅki us ne sochā, “ribqā nihāyat ḵẖūbsūrat hai. agar unheṅ mālūm ho jāe ki ribqā merī bīvī hai to vah use hāsil karne kī ḵẖātir mujhe qatl kar deṅge.”

⁸kāfī vaqt guzar gayā. ek din filistiyoṅ ke bādshāh ne apnī khiṛkī meṅ se jhāṅk kar dekhā ki ishāq apnī bīvī ko piyār kar rahā hai. ⁹us ne ishāq ko bulā kar kahā, “vah to āp kī bīvī hai! āp ne kyūṅ kahā ki merī bahan hai?” ishāq ne javāb diyā, “maiṅ ne sochā ki agar maiṅ batāūṅ ki yah merī bīvī hai to log mujhe qatl kar deṅge.”

¹⁰abīmlik ne kahā, “āp ne hamāre sāth kaisā sulūk kar dikhāyā! kitnī āsānī se mere ādmiyoṅ meṅ se koī āp kī bīvī se hambistar ho jātā. is tarah ham āp ke sabab se ek baṛe jurm ke qusūrvār ṭhaharte.” ¹¹phir abīmlik ne tamām logoṅ ko hukm diyā, “jo bhī is mard yā us kī bīvī ko chheṛe use sazā-e-maut dī jāegī.”

ishāq kā filistiyoṅ ke sāth jhagṛā

¹²ishāq ne us ilāqe meṅ kāshtkārī kī, aur usī sāl use sau gunā phal milā. yūṅ rabb ne use barkat dī, ¹³aur vah amīr ho gayā. us kī daulat baṛhtī gaī, aur vah nihāyat daulatmand ho gayā. ¹⁴us ke pās itnī bheṛ-bakriyāṅ, gāy-bail aur ġulām the ki filistī us se hasad karne lage. ¹⁵ab aisā huā ki unhoṅ ne un tamām kuoṅ ko miṭṭī se bhar kar band kar diyā jo us ke bāp ke naukroṅ ne khode the.

¹⁶āḵẖirkār abīmlik ne ishāq se kahā, “kahīṅ aur jā kar raheṅ, kyūṅki āp ham se ziyādā zorāvar ho gae haiṅ.”

¹⁷chunāṅche ishāq ne vahāṅ se jā kar jirār kī vādī meṅ apne ḍere lagāe. ¹⁸vahāṅ filistiyoṅ ne ibrāhīm kī maut ke bād tamām kuoṅ ko miṭṭī se bhar diyā thā. ishāq ne un ko dubārā khudvāyā. us ne un ke vahī nām rakhe jo us ke bāp ne rakhe the.

¹⁹ishāq ke naukroṅ ko vādī meṅ khodte khodte tāzā pānī mil gayā. ²⁰lekin jirār ke charvāhe ā kar ishāq ke charvāhoṅ se jhagaṛne lage. unhoṅ ne kahā, “yah hamārā kuāṅ hai!” is liye us ne us kueṅ kā nām usak yānī jhagṛā rakhā. ²¹ishāq ke naukroṅ ne ek aur kuāṅ khod liyā. lekin us par bhī jhagṛā huā, is liye us ne us kā nām sitnā yānī muḵẖālafat rakhā. ²²vahāṅ se jā kar us ne ek tīsrā kuāṅ khudvāyā. is dafā koī jhagṛā na huā, is liye us ne us kā nām rahobot yānī ‘khulī jagah’ rakhā. kyūṅki us ne kahā, “rabb ne hameṅ khulī jagah dī hai, aur ab ham mulk meṅ phaleṅ phūleṅge.”

²³vahāṅ se vah bair-sabā chalā gayā. ²⁴usī rāt rabb us par zāhir huā aur kahā, “maiṅ tere bāp ibrāhīm kā ḵẖudā hūṅ. mat ḍar, kyūṅki maiṅ tere sāth hūṅ. maiṅ tujhe barkat dūṅgā aur tujhe apne ḵẖādim ibrāhīm kī ḵẖātir bahut aulād dūṅgā.”

²⁵vahāṅ ishāq ne qurbāngāh banāī aur rabb kā nām le kar ibādat kī. vahāṅ us ne apne ḵẖaime lagāe aur us ke naukroṅ ne kuāṅ khod liyā.

abīmlik ke sāth ahd

²⁶ek din abīmlik, us kā sāthī aḵẖūzat aur us kā sipahasālār fīkul jirār se us ke pās āe. ²⁷ishāq ne pūchhā, “āp kyūṅ mere pās āe haiṅ? āp to mujh se nafrat rakhte haiṅ. kyā āp ne mujhe apne darmiyān se ḵẖārij nahīṅ kiyā thā?” ²⁸unhoṅ ne javāb diyā, “ham ne jān liyā hai ki rabb āp ke sāth hai. is liye ham ne kahā ki hamārā āp ke sāth ahd honā chāhie. āie ham qasam khā kar ek dūsre se ahd bāṅdheṅ ²⁹ki āp hameṅ nuqsān nahīṅ pahuṅchāeṅge, kyūṅki ham ne bhī āp ko nahīṅ chheṛā balki āp se sirf acchhā sulūk kiyā aur āp ko salāmatī ke sāth ruḵẖsat kiyā hai. aur ab zāhir hai ki rabb ne āp ko barkat dī hai.”

³⁰ishāq ne un kī ziyāfat kī, aur unhoṅ ne khāyā aur piyā. ³¹phir subah-savere uṭh kar unhoṅ ne ek dūsre ke sāmne qasam khāī. is ke bād ishāq ne unheṅ ruḵẖsat kiyā aur vah salāmatī se ravānā hue.

³²usī din ishāq ke naukar āe aur use us kueṅ ke bāre meṅ ittilā dī jo unhoṅ ne khodā thā. unhoṅ ne kahā, “hameṅ pānī mil gayā hai.” ³³us ne kueṅ kā nām sabā yānī ‘qasam’ rakhā. āj tak sāth vāle shahar kā nām bair-sabā hai.

esau kī ajnabī bīviyāṅ

³⁴jab esau 40 sāl kā thā to us ne do hittī aurtoṅ se shādī kī, bairī kī beṭī yahūdit se aur ailon kī beṭī bāsmat se. ³⁵yah aurteṅ ishāq aur ribqā ke liye baṛe dukh kā bāis banīṅ.