Paidāish 17

ahd kā nishān : ḵẖatnā

¹jab abrām 99 sāl kā thā to rabb us par zāhir huā. us ne kahā, “maiṅ allāh qādir-e-mutlaq hūṅ. mere huzūr chaltā rah aur beilzām ho. ²maiṅ tere sāth apnā ahd bāṅdhūṅgā aur terī aulād bahut hī ziyādā baṛhā dūṅgā.”

³abrām muṅh ke bal gir gayā, aur allāh ne us se kahā, ⁴“merā tere sāth ahd hai ki tū bahut qaumoṅ kā bāp hogā. ⁵ab se tū abrām yānī ‘azīm bāp’ nahīṅ kahalāegā balki terā nām ibrāhīm yānī ‘bahut qaumoṅ kā bāp’ hogā. kyūṅki maiṅ ne tujhe bahut qaumoṅ kā bāp banā diyā hai. ⁶maiṅ tujhe bahut hī ziyādā aulād baḵẖsh dūṅgā, itnī ki qaumeṅ baneṅgī. tujh se bādshāh bhī nikaleṅge. ⁷maiṅ apnā ahd tere aur terī aulād ke sāth nasal-dar-nasal qāim karūṅgā, ek abdī ahd jis ke mutābiq maiṅ terā aur terī aulād kā ḵẖudā hūṅgā. ⁸tū is vaqt mulq-e-kan’ān meṅ pardesī hai, lekin maiṅ is pūre mulk ko tujhe aur terī aulād ko detā hūṅ. yah hameshā tak un kā hī rahegā, aur maiṅ un kā ḵẖudā hūṅgā.”

⁹allāh ne ibrāhīm se yah bhī kahā, “tujhe aur terī aulād ko nasal-dar-nasal mere ahd kī sharāit pūrī karnī haiṅ. ¹⁰is kī ek shart yah hai ki har ek mard kā ḵẖatnā kiyā jāe ¹¹apnā ḵẖatnā karāo. yah hamāre āpas ke ahd kā zāhirī nishān hogā. ¹²lāzim hai ki tū aur terī aulād nasal-dar-nasal apne har ek beṭe kā āṭhveṅ din ḵẖatnā karvāeṅ. yah usūl us par bhī lāgū hai jo tere ghar meṅ rahatā hai lekin tujh se rishtā nahīṅ rakhtā, chāhe vah ghar meṅ paidā huā ho yā kisī ajnabī se ḵẖarīdā gayā ho. ¹³ghar ke har ek mard kā ḵẖatnā karnā lāzim hai, ḵẖwāh vah ghar meṅ paidā huā ho yā kisī ajnabī se ḵẖarīdā gayā ho. yah is bāt kā nishān hogā ki merā tere sāth ahd hameshā tak qāim rahegā. ¹⁴jis mard kā ḵẖatnā na kiyā gayā use us kī qaum meṅ se miṭāyā jāegā, kyūṅki us ne mere ahd kī sharāit pūrī na kīṅ.”

¹⁵allāh ne ibrāhīm se yah bhī kahā, “apnī bīvī sāray kā nām bhī badal denā. ab se us kā nām sāray nahīṅ balki sārā yānī shahzādī hogā. ¹⁶maiṅ use barkat baḵẖshūṅgā aur tujhe us kī mārifat beṭā dūṅgā. maiṅ use yahāṅ tak barkat dūṅgā ki us se qaumeṅ balki qaumoṅ ke bādshāh nikaleṅge.”

¹⁷ibrāhīm muṅh ke bal gir gayā. lekin dil hī dil meṅ vah haṅs paṛā aur sochā, “yah kis tarah ho saktā hai? maiṅ to 100 sāl kā hūṅ. aise ādmī ke hāṅ bacchā kis tarah paidā ho saktā hai? aur sārā jaisī umrrasīdā aurat ke bacchā kis tarah paidā ho saktā hai? us kī umr to 90 sāl hai.” ¹⁸us ne allāh se kahā, “hāṅ, ismāīl hī tere sāmne jītā rahe.”

¹⁹allāh ne kahā, “nahīṅ, terī bīvī sārā ke hāṅ beṭā paidā hogā. tū us kā nām ishāq yānī ‘vah haṅstā hai’ rakhnā. maiṅ us ke aur us kī aulād ke sāth abdī ahd bāṅdhūṅgā. ²⁰maiṅ ismāīl ke silsile meṅ bhī terī daraḵẖwāst pūrī karūṅgā. maiṅ use bhī barkat de kar phalne phūlne dūṅgā aur us kī aulād bahut hī ziyādā baṛhā dūṅgā. vah bārah raīsoṅ kā bāp hogā, aur maiṅ us kī mārifat ek baṛī qaum banāūṅgā. ²¹lekin merā ahd ishāq ke sāth hogā, jo ain ek sāl ke bād sārā ke hāṅ paidā hogā.”

²²allāh kī ibrāhīm ke sāth bāt ḵẖatm huī, aur vah us ke pās se āsmān par chalā gayā.

²³usī din ibrāhīm ne allāh kā hukm pūrā kiyā. us ne ghar ke har ek mard kā ḵẖatnā karvāyā, apne beṭe ismāīl kā bhī aur un kā bhī jo us ke ghar meṅ rahate lekin us se rishtā nahīṅ rakhte the, chāhe vah us ke ghar meṅ paidā hue the yā ḵẖarīde gae the. ²⁴ibrāhīm 99 sāl kā thā jab us kā ḵẖatnā huā, ²⁵jabki us kā beṭā ismāīl 13 sāl kā thā. ²⁶donoṅ kā ḵẖatnā usī din huā. ²⁷sāth sāth gharāne ke tamām bāqī mardoṅ kā ḵẖatnā bhī huā, bashmūl un ke jin kā ibrāhīm ke sāth rishtā nahīṅ thā, chāhe vah ghar meṅ paidā hue yā kisī ajnabī se ḵẖarīde gae the.