Paidāish 16

hājirā aur ismāīl

¹ab tak abrām kī bīvī sāray ke koī bacchā nahīṅ huā thā. lekin unhoṅ ne ek misrī lauṅḍī rakhī thī jis kā nām hājirā thā, ²aur ek din sāray ne abrām se kahā, “rabb ne mujhe bacche paidā karne se maharūm rakhā hai, is liye merī lauṅḍī ke sāth hambistar hoṅ. shāyad mujhe us kī mārifat bacchā mil jāe.”

abrām ne sāray kī bāt mān lī. ³chunāṅche sāray ne apnī misrī lauṅḍī hājirā ko apne shauhar abrām ko de diyā tāki vah us kī bīvī ban jāe us vaqt abrām ko kan’ān meṅ baste hue das sāl ho gae the. ⁴abrām hājirā se hambistar huā to vah ummīd se ho gaī. jab hājirā ko yah mālūm huā to vah apnī mālikan ko haqīr jānne lagī. ⁵tab sāray ne abrām se kahā, “jo zulm mujh par kiyā jā rahā hai vah āp hī par āe. maiṅ ne ḵẖud ise āp ke bāzūoṅ meṅ de diyā thā. ab jab ise mālūm huā hai ki ummīd se hai to mujhe haqīr jānne lagī hai. rabb mere aur āp ke darmiyān faislā kare.” ⁶abrām ne javāb diyā, “dekho, yah tumhārī lauṅḍī hai aur tumhāre iḵẖtiyār meṅ hai. jo tumhārā jī chāhe us ke sāth karo.”

is par sāray us se itnā burā sulūk karne lagī ki hājirā farār ho gaī. ⁷rabb ke farishte ko hājirā registān ke us chashme ke qarīb milī jo shūr ke rāste par hai. ⁸us ne kahā, “sāray kī lauṅḍī hājirā, tū kahāṅ se ā rahī hai aur kahāṅ jā rahī hai?” hājirā ne javāb diyā, “maiṅ apnī mālikan sāray se farār ho rahī hūṅ.” ⁹rabb ke farishte ne us se kahā, “apnī mālikan ke pās vāpas chalī jā aur us ke tābe rah. ¹⁰maiṅ terī aulād itnī baṛhāūṅgā ki use ginā nahīṅ jā sakegā.” ¹¹rabb ke farishte ne mazīd kahā, “tū ummīd se hai. ek beṭā paidā hogā. us kā nām ismāīl yānī ‘allāh suntā hai’ rakh, kyūṅki rabb ne musībat meṅ terī āvāz sunī. ¹²vah jaṅglī gadhe kī mānind hogā. us kā hāth har ek ke ḵẖilāf aur har ek kā hāth us ke ḵẖilāf hogā. to bhī vah apne tamām bhāiyoṅ ke sāmne ābād rahegā.”

¹³rabb ke us ke sāth bāt karne ke bād hājirā ne us kā nām attā-el-roī yānī ‘tū ek mābūd hai jo mujhe dekhtā hai’ rakhā. us ne kahā, “kyā maiṅ ne vāqaī us ke pīchhe dekhā hai jis ne mujhe dekhā hai?” ¹⁴is liye us jagah ke kueṅ kā nām ‘bair-lahī-roī’ yānī ‘us zindā hastī kā kuāṅ jo mujhe dekhtā hai’ paṛ gayā. vah qādis aur barad ke darmiyān vāqe hai.

¹⁵hājirā vāpas gaī, aur us ke beṭā paidā huā. abrām ne us kā nām ismāīl rakhā. ¹⁶us vaqt abrām 86 sāl kā thā.