Paidāish 14

abrām lūt ko chhuṛātā hai

¹kan’ān meṅ jaṅg huī. bairūn-e-mulk ke chār bādshāhoṅ ne kan’ān ke pāṅch bādshāhoṅ se jaṅg kī. bairūn-e-mulk ke bādshāh yah the : sin’ār se amrāfil, illāsar se aryūk, ailām se kidarlāumar aur joim se tid’āl. ²kan’ān ke bādshāh yah the : sadūm se birā, amūrā se birshā, admā se sinyāb, zaboīm se shimebar aur bālā yānī zuġar kā bādshāh.

³kan’ān ke in pāṅch bādshāhoṅ kā ittihād huā thā aur vah siddīm meṅ jamā hue the. (ab siddīm nahīṅ hai, kyūṅki us kī jagah bahīrā-e-murdār ā gayā hai). ⁴kidarlāumar ne bārah sāl tak un par hukūmat kī thī, lekin terahaveṅ sāl vah bāġī ho gae the.

⁵ab ek sāl ke bād kidarlāumar aur us ke ittihādī apnī faujoṅ ke sāth āe. pahale unhoṅ ne astārāt-qarnaim meṅ rafāiyoṅ ko, hām meṅ zūziyoṅ ko, savī-qiryatāim meṅ aimiyoṅ ko ⁶aur horiyoṅ ko un ke pahāṛī ilāqe saīr meṅ shikast dī. yūṅ vah el-fārān tak pahuṅch gae jo registān ke kināre par hai. ⁷phir vah vāpas āe aur ain-misfāt yānī qādis pahuṅche. unhoṅ ne amālīqiyoṅ ke pūre ilāqe ko tabāh kar diyā aur hassūn-tamar meṅ ābād amoriyoṅ ko bhī shikast dī.

⁸us vaqt sadūm, amūrā, admā, zaboīm aur bālā yānī zuġar ke bādshāh un se laṛne ke liye siddīm kī vādī meṅ jamā hue. ⁹in pāṅch bādshāhoṅ ne ailām ke bādshāh kidarlāumar, joim ke bādshāh tid’āl, sin’ār ke bādshāh amrāfil aur illāsar ke bādshāh aryūk kā muqāblā kiyā. ¹⁰is vādī meṅ tārkol ke mut’addid gaṛhe the. jab bāġī bādshāh shikast khā kar bhāgne lage to sadūm aur amūrā ke bādshāh in gaṛhoṅ meṅ gir gae jabki bāqī tīn bādshāh bach kar pahāṛī ilāqe meṅ farār hue. ¹¹fatahmand bādshāh sadūm aur amūrā kā tamām māl tamām khāne vālī chīzoṅ samet lūṭ kar vāpas chal die. ¹²abrām kā bhatījā lūt sadūm meṅ rahatā thā, is liye vah use bhī us kī milkiyat samet chhīn kar sāth le gae.

¹³lekin ek ādmī ne jo bach niklā thā ibrānī mard abrām ke pās ā kar use sab kuchh batā diyā. us vaqt vah mamre ke daraḵẖtoṅ ke pās ābād thā. mamre amorī thā. vah aur us ke bhāī iskāl aur āner abrām ke ittihādī the. ¹⁴jab abrām ko patā chalā ki bhatīje ko giriftār kar liyā gayā hai to us ne apne ghar meṅ paidā hue tamām jaṅg’āzmūdā ġulāmoṅ ko jamā karke dān tak dushman kā tāqqub kiyā. us ke sāth 318 afrād the. ¹⁵vahāṅ us ne apne bandoṅ ko gurohoṅ meṅ taqsīm karke rāt ke vaqt dushman par hamlā kiyā. dushman shikast khā kar bhāg gayā aur abrām ne damishq ke shimāl meṅ vāqe ḵẖūbā tak us kā tāqqub kiyā. ¹⁶vah un se lūṭā huā tamām māl vāpas le āyā. lūt, us kī jāydād, aurteṅ aur bāqī qaidī bhī dushman ke qabze se bach nikle.

malik-e-sidq, sālim kā bādshāh

¹⁷jab abrām kidarlāumar aur us ke ittihādiyoṅ par fatah pāne ke bād vāpas pahuṅchā to sadūm kā bādshāh us se milne ke liye vādī-e-savī meṅ āyā. (ise ājkal bādshāh kī vādī kahā jātā hai.) ¹⁸sālim kā bādshāh malik-e-sidq bhī vahāṅ pahuṅchā. vah apne sāth roṭī aur mai le āyā. malik-e-sidq allāh t’ālā kā imām thā. ¹⁹us ne abrām ko barkat de kar kahā, “abrām par allāh t’ālā kī barkat ho, jo āsmān-o-zamīn kā ḵẖāliq hai. ²⁰allāh t’ālā mubārak ho jis ne tere dushmanoṅ ko tere hāth meṅ kar diyā hai.” abrām ne use tamām māl kā dasvāṅ hissā diyā.

²¹sadūm ke bādshāh ne abrām se kahā, “mujhe mere log vāpas kar deṅ aur bāqī chīzeṅ apne pās rakh leṅ.” ²²lekin abrām ne us se kahā, “maiṅ ne rabb se qasam khāī hai, allāh t’ālā se jo āsmān-o-zamīn kā ḵẖāliq hai ²³ki maiṅ us meṅ se kuchh nahīṅ lūṅgā jo āp kā hai, chāhe vah dhāgā yā jūtī kā tasmā hī kyūṅ na ho. aisā na ho ki āp kaheṅ, ‘maiṅ ne abrām ko daulatmand banā diyā hai.’ ²⁴sivā-e-us khāne ke jo mere ādmiyoṅ ne rāste meṅ khāyā hai maiṅ kuchh qabūl nahīṅ karūṅgā. lekin mere ittihādī āner, iskāl aur mamre zarūr apnā apnā hissā leṅ.”