Paidāish 13

abrām aur lūt alag ho jāte haiṅ

¹abrām apnī bīvī, lūt aur tamām jāydād ko sāth le kar misr se niklā aur kan’ān ke junūbī ilāqe dasht-e-najab meṅ vāpas āyā.

²abrām nihāyat daulatmand ho gayā thā. us ke pās bahut se maveshī aur sonā-chāṅdī thī. ³vahāṅ se jagah-ba-jagah chalte hue vah āḵẖirkār bait-el se ho kar us maqām tak pahuṅch gayā jahāṅ us ne shurū meṅ apnā ḍerā lagāyā thā aur jo bait-el aur aī ke darmiyān thā. ⁴vahāṅ jahāṅ us ne qurbāngāh banāī thī us ne rabb kā nām le kar us kī ibādat kī.

⁵lūt ke pās bhī bahut sī bheṛ-bakriyāṅ, gāy-bail aur ḵẖaime the. ⁶natījā yah niklā ki āḵẖirkār vah mil kar na rah sake, kyūṅki itnī jagah nahīṅ thī ki donoṅ ke revaṛ ek hī jagah par char sakeṅ. ⁷abrām aur lūt ke charvāhe āpas meṅ jhagaṛne lage. (us zamāne meṅ kan’ānī aur farizzī bhī mulk meṅ ābād the.) ⁸tab abrām ne lūt se bāt kī, “aisā nahīṅ honā chāhie ki tere aur mere darmiyān jhagṛā ho yā tere charvāhoṅ aur mere charvāhoṅ ke darmiyān. ham to bhāī haiṅ. ⁹kyā zarūrat hai ki ham mil kar raheṅ jabki tū āsānī se is mulk kī kisī aur jagah rah saktā hai. behatar hai ki tū mujh se alag ho kar kahīṅ aur rahe. agar tū bāeṅ hāth jāe to maiṅ dāeṅ hāth jāūṅgā, aur agar tū dāeṅ hāth jāe to maiṅ bāeṅ hāth jāūṅgā.”

¹⁰lūt ne apnī nazar uṭhā kar dekhā ki daryā-e-yardan ke pūre ilāqe meṅ zuġar tak pānī kī kasrat hai. vah rabb ke bāġ yā mulk-e-misr kī mānind thā, kyūṅki us vaqt rabb ne sadūm aur amūrā ko tabāh nahīṅ kiyā thā. ¹¹chunāṅche lūt ne daryā-e-yardan ke pūre ilāqe ko chun liyā aur mashriq kī taraf jā basā. yūṅ donoṅ rishtedār ek dūsre se judā ho gae. ¹²abrām mulk-e-kan’ān meṅ rahā jabki lūt yardan ke ilāqe ke shaharoṅ ke darmiyān ābād ho gayā. vahāṅ us ne apne ḵẖaime sadūm ke qarīb lagā die. ¹³lekin sadūm ke bāshinde nihāyat sharīr the, aur un ke rabb ke ḵẖilāf gunāh nihāyat makrūh the.

rabb kā abrām ke sāth dubārā vādā

¹⁴lūt abrām se judā huā to rabb ne abrām se kahā, “apnī nazar uṭhā kar chāroṅ taraf yānī shimāl, junūb, mashriq aur maġrib kī taraf dekh. ¹⁵jo bhī zamīn tujhe nazar āe use maiṅ tujhe aur terī aulād ko hameshā ke liye detā hūṅ. ¹⁶maiṅ terī aulād ko ḵẖāk kī tarah beshumār hone dūṅgā. jis tarah ḵẖāk ke zarre gine nahīṅ jā sakte usī tarah terī aulād bhī ginī nahīṅ jā sakegī. ¹⁷chunāṅche uṭh kar is mulk kī har jagah chal phir, kyūṅki maiṅ ise tujhe detā hūṅ.”

¹⁸abrām ravānā huā. chalte chalte us ne apne ḍere habrūn ke qarīb mamre ke daraḵẖtoṅ ke pās lagāe. vahāṅ us ne rabb kī tāzīm meṅ qurbāngāh banāī.