Paidāish 12

abrām kī bulāhaṭ

¹rabb ne abrām se kahā, “apne vatan, apne rishtedāroṅ aur apne bāp ke ghar ko chhoṛkar us mulk meṅ chalā jā jo maiṅ tujhe dikhāūṅgā. ²maiṅ tujh se ek baṛī qaum banāūṅgā, tujhe barkat dūṅgā aur tere nām ko bahut baṛhāūṅgā. tū dūsroṅ ke liye barkat kā bāis hogā. ³jo tujhe barkat deṅge unheṅ maiṅ bhī barkat dūṅgā. jo tujh par lānat karegā us par maiṅ bhī lānat karūṅgā. duniyā kī tamām qaumeṅ tujh se barkat pāeṅgī.”

⁴abrām ne rabb kī sunī aur hārān se ravānā huā. lūt us ke sāth thā. us vaqt abrām 75 sāl kā thā. ⁵us ke sāth us kī bīvī sāray aur us kā bhatījā lūt the. vah apne naukar-chākroṅ samet apnī pūrī milkiyat bhī sāth le gayā jo us ne hārān meṅ hāsil kī thī. chalte chalte vah kan’ān pahuṅche. ⁶abrām us mulk meṅ se guzar kar sikam ke maqām par ṭhahar gayā jahāṅ morih ke balūt kā daraḵẖt thā. us zamāne meṅ mulk meṅ kan’ānī qaumeṅ ābād thīṅ.

⁷vahāṅ rabb abrām par zāhir huā aur us se kahā, “maiṅ terī aulād ko yah mulk dūṅgā.” is liye us ne vahāṅ rabb kī tāzīm meṅ qurbāngāh banāī jahāṅ vah us par zāhir huā thā. ⁸vahāṅ se vah us pahāṛī ilāqe kī taraf gayā jo bait-el ke mashriq meṅ hai. vahāṅ us ne apnā ḵẖaimā lagāyā. maġrib meṅ bait-el thā aur mashriq meṅ aī. is jagah par bhī us ne rabb kī tāzīm meṅ qurbāngāh banāī aur rabb kā nām le kar ibādat kī.

⁹phir abrām dubārā ravānā ho kar junūb ke dasht-e-najab kī taraf chal paṛā.

abrām misr meṅ

¹⁰un dinoṅ meṅ mulk-e-kan’ān meṅ kāl paṛā. kāl itnā saḵẖt thā ki abrām us se bachne kī ḵẖātir kuchh der ke liye misr meṅ jā basā, lekin pardesī kī haisiyat se. ¹¹jab vah misr kī sarhadd ke qarīb āe to us ne apnī bīvī sāray se kahā, “maiṅ jāntā hūṅ ki tū kitnī ḵẖūbsūrat hai. ¹²misrī tujhe dekheṅge, phir kaheṅge, ‎‘yah is kā shauhar hai.’ natīje meṅ vah mujhe mār ḍāleṅge aur tujhe zindā chhoṛeṅge. ¹³is liye logoṅ se yah kahate rahanā ki maiṅ abrām kī bahan hūṅ. phir mere sāth acchhā sulūk kiyā jāegā aur merī jān tere sabab se bach jāegī.”

¹⁴jab abrām misr pahuṅchā to vāqaī misriyoṅ ne dekhā ki sāray nihāyat hī ḵẖūbsūrat hai. ¹⁵aur jab firaaun ke afsarān ne use dekhā to unhoṅ ne firaaun ke sāmne sāray kī tārīf kī. āḵẖirkār use mahal meṅ pahuṅchāyā gayā. ¹⁶firaaun ne sāray kī ḵẖātir abrām par ehsān karke use bheṛ-bakriyāṅ, gāy-bail, gadhe-gadhiyāṅ, naukar-chākar aur ūṅṭ die.

¹⁷lekin rabb ne sāray ke sabab se firaaun aur us ke gharāne meṅ saḵẖt qism ke amrāz phailāe. ¹⁸āḵẖirkār firaaun ne abrām ko bulā kar kahā, “tū ne mere sāth kyā kiyā? tū ne mujhe kyūṅ nahīṅ batāyā ki sāray terī bīvī hai? ¹⁹tū ne kyūṅ kahā ki vah merī bahan hai? is dhoke kī binā par maiṅ ne use ghar meṅ rakh liyā tāki us se shādī karūṅ. dekh, terī bīvī hāzir hai. ise le kar yahāṅ se nikal jā!” ²⁰phir firaaun ne apne sipāhiyoṅ ko hukm diyā, aur unhoṅ ne abrām, us kī bīvī aur pūrī milkiyat ko ruḵẖsat karke mulk se ravānā kar diyā.