Paidāish 11
bābal kā burj
1us vaqt tak pūrī duniyā ke log ek hī zabān bolte the. 2mashriq kī taraf baṛhte baṛhte vah sin’ār ke ek maidān meṅ pahuṅch kar vahāṅ ābād hue. 3tab vah ek dūsre se kahane lage, “āo, ham miṭṭī se īṅṭeṅ banā kar unheṅ āg meṅ ḵẖūb pakāeṅ.” unhoṅ ne tāmīrī kām ke liye patthar kī jagah īṅṭeṅ aur masāle kī jagah tārkol istemāl kiyā. 4phir vah kahane lage, “āo, ham apne liye shahar banā leṅ jis meṅ aisā burj ho jo āsmān tak pahuṅch jāe phir hamārā nām qāim rahegā aur ham rū-e-zamīn par bikhar jāne se bach jāeṅge.”
5lekin rabb us shahar aur burj ko dekhne ke liye utar āyā jise log banā rahe the. 6rabb ne kahā, “yah log ek hī qaum haiṅ aur ek hī zabān bolte haiṅ. aur yah sirf us kā āġāz hai jo vah karnā chāhate haiṅ. ab se jo bhī vah mil kar karnā chāheṅge us se unheṅ rokā nahīṅ jā sakegā. 7is liye āo, ham duniyā meṅ utar kar un kī zabān ko darham-barham kar deṅ tāki vah ek dūsre kī bāt samajh na pāeṅ.”
8is tarīqe se rabb ne unheṅ tamām rū-e-zamīn par muntashir kar diyā, aur shahar kī tāmīr ruk gaī. 9is liye shahar kā nām bābal yānī abtarī ṭhaharā, kyūṅki rabb ne vahāṅ tamām logoṅ kī zabān ko darham-barham karke unheṅ tamām rū-e-zamīn par muntashir kar diyā.
sim se abrām tak kā nasabnāmā
10yah sim kā nasabnāmā hai :
sim 100 sāl kā thā jab us kā beṭā arfaksad paidā huā. yah sailāb ke do sāl bād huā. 11is ke bād vah mazīd 500 sāl zindā rahā. us ke aur beṭe-beṭiyāṅ bhī paidā hue.
12arfaksad 35 sāl kā thā jab silah paidā huā. 13is ke bād vah mazīd 403 sāl zindā rahā. us ke aur beṭe-beṭiyāṅ bhī paidā hue.
14silah 30 sāl kā thā jab ibar paidā huā. 15is ke bād vah mazīd 403 sāl zindā rahā. us ke aur beṭe-beṭiyāṅ bhī paidā hue.
16ibar 34 sāl kā thā jab falaj paidā huā. 17is ke bād vah mazīd 430 sāl zindā rahā. us ke aur beṭe-beṭiyāṅ bhī paidā hue.
18falaj 30 sāl kā thā jab raū paidā huā. 19is ke bād vah mazīd 209 sāl zindā rahā. us ke aur beṭe-beṭiyāṅ bhī paidā hue.
20raū 32 sāl kā thā jab sarūj paidā huā. 21is ke bād vah mazīd 207 sāl zindā rahā. us ke aur beṭe-beṭiyāṅ bhī paidā hue.
22sarūj 30 sāl kā thā jab nahūr paidā huā. 23is ke bād vah mazīd 200 sāl zindā rahā. us ke aur beṭe-beṭiyāṅ bhī paidā hue.
24nahūr 29 sāl kā thā jab tārah paidā huā. 25is ke bād vah mazīd 119 sāl zindā rahā. us ke aur beṭe-beṭiyāṅ bhī paidā hue.
26tārah 70 sāl kā thā jab us ke beṭe abrām, nahūr aur hārān paidā hue.
27yah tārah kā nasabnāmā hai : abrām, nahūr aur hārān tārah ke beṭe the. lūt hārān kā beṭā thā. 28apne bāp tārah kī zindagī meṅ hī hārān kasdiyoṅ ke ūr meṅ intiqāl kar gayā jahāṅ vah paidā bhī huā thā.
29bāqī donoṅ beṭoṅ kī shādī huī. abrām kī bīvī kā nām sāray thā aur nahūr kī bīvī kā nām milkāh. milkāh hārān kī beṭī thī, aur us kī ek bahan banām iskā thī. 30sāray bāṅjh thī, is liye us ke bacche nahīṅ the.
31tārah kasdiyoṅ ke ūr se ravānā ho kar mulk-e-kan’ān kī taraf safar karne lagā. us ke sāth us kā beṭā abrām, us kā potā lūt yānī hārān kā beṭā aur us kī bahū sāray the. jab vah hārān pahuṅche to vahāṅ ābād ho gae. 32tārah 205 sāl kā thā jab us ne hārān meṅ vafāt pāī.