Galātiyoṅ 5
apnī āzādī mahfūz rakheṅ
1masīh ne hameṅ āzād rahane ke liye hī āzād kiyā hai. to ab qāim raheṅ aur dubārā apne gale meṅ ġulāmī kā jūā ḍālne na deṅ.
2suneṅ! maiṅ paulus āp ko batātā hūṅ ki agar āp apnā ḵẖatnā karvāeṅ to āp ko masīh kā koī fāidā nahīṅ hogā. 3maiṅ ek bār phir is bāt kī tasdīq kartā hūṅ ki jis ne bhī apnā ḵẖatnā karvāyā us kā farz hai ki vah pūrī sharīat kī pairvī kare. 4āp jo sharīat kī pairvī karne se rāstbāz bannā chāhate haiṅ āp kā masīh ke sāth koī vāstā na rahā. hāṅ, āp allāh ke fazl se dūr ho gae haiṅ. 5lekin hameṅ ek farq ummīd dilāī gaī hai. ummīd yah hai ki ḵẖudā hī hameṅ rāstbāz qarār detā hai. chunāṅche ham rūh-ul-quds ke bāis īmān rakh kar isī rāstbāzī ke liye taṛapte rahate haiṅ. 6kyūṅki jab ham masīh īsā meṅ hote haiṅ to ḵẖatnā karvāne yā na karvāne se koī farq nahīṅ paṛtā. farq sirf us īmān se paṛtā hai jo muhabbat karne se zāhir hotā hai.
7āp īmān kī dauṛ meṅ acchhī taraqqī kar rahe the! to phir kis ne āp ko sacchāī kī pairvī karne se rok liyā? 8kis ne āp ko ubhārā? allāh to nahīṅ thā jo āp ko bulātā hai. 9dekheṅ, thoṛā sā ḵẖamīr tamām guṅdhe hue āṭe ko ḵẖamīr kar detā hai. 10mujhe ḵẖudāvand meṅ āp par itnā etimād hai ki āp yahī soch rakhte haiṅ. jo bhī āp meṅ afrā-tafrī paidā kar rahā hai use sazā milegī.
11bhāiyo, jahāṅ tak merā tālluq hai, agar maiṅ yah paiġām detā ki ab tak ḵẖatnā karvāne kī zarūrat hai to merī īzārasānī kyūṅ ho rahī hotī? agar aisā hotā to log masīh ke maslūb hone ke bāre meṅ sun kar ṭhokar na khāte. 12behatar hai ki āp ko pareshān karne vāle na sirf apnā ḵẖatnā karvāeṅ balki khoje ban jāeṅ.
13bhāiyo, āp ko āzād hone ke liye bulāyā gayā hai. lekin ḵẖabardār raheṅ ki is āzādī se āp kī gunāh’ālūdā fitrat ko amal meṅ āne kā mauqā na mile. is ke bajāy muhabbat kī rūh meṅ ek dūsre kī ḵẖidmat kareṅ. 14kyūṅki pūrī sharīat ek hī hukm meṅ samāī huī hai, “apne paṛosī se vaisī muhabbat rakhnā jaisī tū apne āp se rakhtā hai.” 15agar āp ek dūsre ko kāṭte aur phāṛte haiṅ to ḵẖabardār! aisā na ho ki āp ek dūsre ko ḵẖatm karke sab ke sab tabāh ho jāeṅ.
rūh-ul-quds aur insānī fitrat
16maiṅ to yah kahatā hūṅ ki rūh-ul-quds meṅ zindagī guzāreṅ. phir āp apnī purānī fitrat kī ḵẖwāhishāt pūrī nahīṅ kareṅge. 17kyūṅki jo kuchh hamārī purānī fitrat chāhatī hai vah us ke ḵẖilāf hai jo rūh chāhatā hai, aur jo kuchh rūh chāhatā hai vah us ke ḵẖilāf hai jo hamārī purānī fitrat chāhatī hai. yah donoṅ ek dūsre ke dushman haiṅ, is liye āp vah kuchh nahīṅ kar pāte jo āp karnā chāhate haiṅ. 18lekin jab rūh-ul-quds āp kī rāhanumāī kartā hai to āp sharīat ke tābe nahīṅ hote.
19jo kām purānī fitrat kartī hai vah sāf zāhir hotā hai. maslan zinākārī, nāpākī, ayyāshī, 20butparastī, jādūgrī, dushmanī, jhagṛā, hasad, ġussā, ḵẖudġarzī, anban, pārṭībāzī, 21jalan, nashābāzī, raṅgraliyāṅ vaġairā. maiṅ pahale bhī āp ko āgāh kar chukā hūṅ, lekin ab ek bār phir kahatā hūṅ ki jo is tarah kī zindagī guzārte haiṅ vah allāh kī bādshāhī mīrās meṅ nahīṅ pāeṅge.
22rūh-ul-quds kā phal farq hai. vah muhabbat, ḵẖushī, sulah-salāmatī, sabr, meharbānī, nekī, vafādārī, 23narmī aur zabt-e-nafs paidā kartā hai. sharīat aisī chīzoṅ ke ḵẖilāf nahīṅ hotī. 24aur jo masīh īsā ke haiṅ unhoṅ ne apnī purānī fitrat ko us kī raġbatoṅ aur burī ḵẖwāhishoṅ samet maslūb kar diyā hai. 25chūṅki ham rūh meṅ zindagī guzārte haiṅ is liye āeṅ, ham qadam-ba-qadam us ke mutābiq chalte bhī raheṅ. 26na ham maġrūr hūṅ, na ek dūsre ko mushtail kareṅ yā ek dūsre se hasad kareṅ.