Galātiyoṅ 4

¹dekheṅ, jo beṭā apne bāp kī milkiyat kā vāris hai vah us vaqt tak ġulāmoṅ se farq nahīṅ jab tak vah bāliġ na ho, hālāṅki vah pūrī milkiyat kā mālik hai. ²bāp kī taraf se muqarrar kī huī umr tak dūsre us kī dekh-bhāl karte aur us kī milkiyat saṁbhālte haiṅ. ³isī tarah ham bhī jab bacche the duniyā kī kuvvatoṅ ke ġulām the. ⁴lekin jab muqarrarā vaqt ā gayā to allāh ne apne farzand ko bhej diyā. ek aurat se paidā ho kar vah sharīat ke tābe huā ⁵tāki fidyā de kar hameṅ jo sharīat ke tābe the āzād kar de. yūṅ hameṅ allāh ke farzand hone kā martabā milā hai.

⁶ab chūṅki āp us ke farzand haiṅ is liye allāh ne apne farzand ke rūh ko hamāre diloṅ meṅ bhej diyā, vah rūh jo “abbā” yānī “ai bāp” kah kar pukārtā rahatā hai. ⁷ġaraz ab āp ġulām na rahe balki beṭe kī haisiyat rakhte haiṅ. aur beṭā hone kā yah matlab hai ki allāh ne āp ko vāris bhī banā diyā hai.

paulus kī galtiyoṅ ke liye fikr

⁸māzī meṅ jab āp allāh ko nahīṅ jānte the to āp un ke ġulām the jo haqīqat meṅ ḵẖudā nahīṅ haiṅ. ⁹lekin ab āp allāh ko jānte haiṅ, balki ab allāh ne āp ko jān liyā hai. to phir āp muṛ kar in kamzor aur ghaṭiyā usūloṅ kī taraf kyūṅ vāpas jāne lage haiṅ? kyā āp dubārā in kī ġulāmī meṅ ānā chāhate haiṅ? ¹⁰āp baṛī fikrmandī se ḵẖās din, māh, mausam aur sāl manāte haiṅ. ¹¹mujhe āp ke bāre meṅ ḍar hai, kahīṅ merī āp par mehanat-mashaqqat zāe na jāe.

¹²bhāiyo, maiṅ āp se iltijā kartā hūṅ ki merī mānind ban jāeṅ, kyūṅki maiṅ to āp kī mānind ban gayā hūṅ. āp ne mere sāth koī ġalat sulūk nahīṅ kiyā. ¹³āp ko mālūm hai ki jab maiṅ ne pahalī dafā āp ko allāh kī ḵẖushḵẖabarī sunāī to is kī vajah mere jism kī kamzor hālat thī. ¹⁴lekin agarchi merī yah hālat āp ke liye āzmāish kā bāis thī to bhī āp ne mujhe haqīr na jānā, na mujhe nīch samjhā, balki āp ne mujhe yūṅ ḵẖush’āmadīd kahā jaisā ki maiṅ allāh kā koī farishtā yā masīh īsā ḵẖud hūṅ. ¹⁵us vaqt āp itne ḵẖush the! ab kyā huā hai? maiṅ gavāh hūṅ, us vaqt agar āp ko mauqā miltā to āp apnī āṅkheṅ nikāl kar mujhe de dete. ¹⁶to kyā ab maiṅ āp ko haqīqat batāne kī vajah se āp kā dushman ban gayā hūṅ?

¹⁷vah dūsre log āp kī dostī pāne kī pūrī jidd-o-jahd kar rahe haiṅ, lekin un kī nīyat sāf nahīṅ hai. bas vah āp ko mujh se judā karnā chāhate haiṅ tāki āp un hī ke haq meṅ jidd-o-jahd karte raheṅ. ¹⁸jab log āp kī dostī pāne kī jidd-o-jahd karte haiṅ to yah hai to ṭhīk, lekin is kā maqsad acchhā honā chāhie. hāṅ, sahīh jidd-o-jahd har vaqt acchhī hotī hai, na sirf is vaqt jab maiṅ āp ke darmiyān hūṅ. ¹⁹mere piyāre baccho! ab maiṅ dubārā āp ko janm dene kā sā dard mahsūs kar rahā hūṅ aur us vaqt tak kartā rahūṅgā jab tak masīh āp meṅ sūrat na pakṛe. ²⁰kāsh maiṅ us vaqt āp ke pās hotā tāki farq andāz meṅ āp se bāt kar saktā, kyūṅki maiṅ āp ke sabab se baṛī uljhan meṅ hūṅ!

hājirā aur sārā kī misāl

²¹āp jo sharīat ke tābe rahanā chāhate haiṅ mujhe ek bāt batāeṅ, kyā āp vah bāt nahīṅ sunte jo sharīat kahatī hai? ²²vah kahatī hai ki ibrāhīm ke do beṭe the. ek lauṅḍī kā beṭā thā, ek āzād aurat kā. ²³lauṅḍī ke beṭe kī paidāish hasab-e-māmūl thī, lekin āzād aurat ke beṭe kī paidāish ġairmāmūlī thī, kyūṅki us meṅ allāh kā vādā pūrā huā. ²⁴jab yah kināyatan samjhā jāe to yah do ḵẖavātīn allāh ke do ahdoṅ kī numāindagī kartī haiṅ. pahalī ḵẖātūn hājirā sīnā pahāṛ par baṅdhe hue ahd kī numāindagī kartī hai, aur jo bacche us se paidā hote haiṅ vah ġulāmī ke liye muqarrar haiṅ. ²⁵hājirā jo arab meṅ vāqe pahāṛ sīnā kī alāmat hai maujūdā shahar yarūshalam se mutābiqat rakhtī hai. vah aur us ke tamām bacche ġulāmī meṅ zindagī guzārte haiṅ. ²⁶lekin āsmānī yarūshalam āzād hai aur vahī hamārī māṅ hai. ²⁷kyūṅki kalām-e-muqaddas meṅ likhā hai,

“ḵẖush ho jā, tū jo beaulād hai,

jo bacche ko janm hī nahīṅ de saktī.

buland āvāz se shādiyānā bajā,

tū jise paidāish kā dard na huā.

kyūṅki ab tark kī huī aurat ke bacche

shādīshudā aurat ke bacchoṅ se ziyādā haiṅ.”

²⁸bhāiyo, āp ishāq kī tarah allāh ke vāde ke farzand haiṅ. ²⁹us vaqt ismāīl ne jo hasab-e-māmūl paidā huā thā ishāq ko satāyā jo rūh-ul-quds kī qudrat se paidā huā thā. āj bhī aisā hī hai. ³⁰lekin kalām-e-muqaddas meṅ kyā farmāyā gayā hai? “is lauṅḍī aur is ke beṭe ko ghar se nikāl deṅ, kyūṅki vah āzād aurat ke beṭe ke sāth virsā nahīṅ pāegā.” ³¹ġaraz bhāiyo, ham lauṅḍī ke farzand nahīṅ haiṅ balki āzād aurat ke.