Hizqīel 9
yarūshalam tabāh ho jāegā
1phir maiṅ ne allāh kī buland āvāz sunī, “yarūshalam kī adālat qarīb ā gaī hai! āo, har ek apnā tabāhakun hathiyār pakaṛ kar khaṛā ho jāe!” 2tab chhah ādmī rabb ke ghar ke shimālī darvāze meṅ dāḵẖil hue. har ek apnā tabāhakun hathiyār thāme chal rahā thā. un ke sāth ek aur ādmī thā jis kā libās katān se banā huā thā. us ke paṭke se kātib kā sāmān laṭkā huā thā. yah ādmī qarīb ā kar pītal kī qurbāngāh ke pās khaṛe ho gae.
3isrāīl ke ḵẖudā kā jalāl ab tak karūbī farishtoṅ ke ūpar ṭhaharā huā thā. ab vah vahāṅ se uṛ kar rabb ke ghar kī dahalīz ke pās ruk gayā. phir rabb katān se mulabbas us mard se hamkalām huā jis ke paṭke se kātib kā sāmān laṭkā huā thā. 4us ne farmāyā, “jā, yarūshalam shahar meṅ se guzar kar har ek ke māthe par nishān lagā de jo bāshindoṅ kī tamām makrūh harkatoṅ ko dekh kar āh-o-zārī kartā hai.” 5mere sunte sunte rabb ne dīgar ādmiyoṅ se kahā, “pahale ādmī ke pīchhe pīchhe chal kar logoṅ ko mār ḍālo! na kisī par taras khāo, na raham karo 6balki buzurgoṅ ko kuṅvāre-kuṅvāriyoṅ aur bāl-bacchoṅ samet maut ke ghāṭ utāro. sirf unheṅ chhoṛnā jin ke māthe par nishān hai. mere maqdis se shurū karo!”
chunāṅche ādmiyoṅ ne un buzurgoṅ se shurū kiyā jo rabb ke ghar ke sāmne khaṛe the. 7phir rabb un se dubārā hamkalām huā, “rabb ke ghar ke sahanoṅ ko maqtūloṅ se bhar kar us kī behuramtī karo, phir vahāṅ se nikal jāo!” vah nikal gae aur shahar meṅ se guzar kar logoṅ ko mār ḍālne lage. 8rabb ke ghar ke sahan meṅ sirf mujhe hī zindā chhoṛā gayā thā.
maiṅ auṅdhe muṅh gir kar chīḵẖ uṭhā, “ai rabb qādir-e-mutlaq, kyā tū yarūshalam par apnā ġazab nāzil karke isrāīl ke tamām bache huoṅ ko maut ke ghāṭ utāregā?” 9rabb ne javāb diyā, “isrāīl aur yahūdāh ke logoṅ kā qusūr nihāyat hī saṅgīn hai. mulk meṅ qatl-o-ġārat ām hai, aur shahar nāinsāfī se bhar gayā hai. kyūṅki log kahate haiṅ, ‘rabb ne mulk ko tark kiyā hai, ham use nazar hī nahīṅ āte.’ 10is liye na maiṅ un par taras khāūṅgā, na raham karūṅgā balki un kī harkatoṅ kī munāsib sazā un ke saroṅ par lāūṅgā.”
11phir katān se mulabbas vah ādmī lauṭ āyā jis ke paṭke se kātib kā sāmān laṭkā huā thā. us ne ittilā dī, “jo kuchh tū ne farmāyā vah maiṅ ne pūrā kiyā hai.”