Hizqīel 4
yarūshalam kā muhāsarā
1ai ādamzād, ab ek kacchī īṅṭ le aur use apne sāmne rakh kar us par yarūshalam shahar kā naqshā kandā kar. 2phir yah naqshā shahar kā muhāsarā dikhāne ke liye istemāl kar. burj aur pushte banā kar gherā ḍāl. yarūshalam ke bāhar lashkargāh lagā kar shahar ke ird-gird qil’āshikan mashīneṅ tayyār rakh. 3phir lohe kī pleṭ le kar apne aur shahar ke darmiyān rakh. is se murād lohe kī dīvār hai. shahar ko ghūr ghūr kar zāhir kar ki tū us kā muhāsarā kar rahā hai. is nishān se tū dikhāegā ki isrāīliyoṅ ke sāth kyā kuchh hone vālā hai.
4-5 is ke bād apne bāeṅ pahalū par leṭ kar alāmtī taur par mulk-e-isrāīl kī sazā pā. jitne bhī sāl vah gunāh karte āe haiṅ utne hī din tujhe isī hālat meṅ leṭe rahanā hai. vah 390 sāl gunāh karte rahe haiṅ, is liye tū 390 din un ke gunāhoṅ kī sazā pāegā. 6is ke bād apne dāeṅ pahalū par leṭ jā aur mulk-e-yahūdāh kī sazā pā. maiṅ ne muqarrar kiyā hai ki tū 40 din yah kare, kyūṅki yahūdāh 40 sāl gunāh kartā rahā hai. 7ghere hue shahar yarūshalam ko ghūr ghūr kar apne naṅge bāzū se use dhamkī de aur us ke ḵẖilāf peshgoī kar. 8sāth sāth maiṅ tujhe rassiyoṅ meṅ jakaṛ lūṅgā tāki tū utne din karvaṭeṅ badal na sake jitne din terā muhāsarā kiyā jāegā.
9ab kuchh gandum, jau, lobiyā, masūr, bājrā aur yahāṅ mustāmal ghaṭiyā qism kā gandum jamā karke ek hī bartan meṅ ḍāl. bāeṅ pahalū par leṭte vaqt yānī pūre 390 din in hī se roṭī banā kar khā. 10-11 fī din tujhe roṭī kā ek pāo khāne aur pānī kā paunā liṭar pīne kī ijāzat hai. yah chīzeṅ ehatiyāt se tol kar muqarrarā auqāt par khā aur pī. 12roṭī ko jau kī roṭī kī tarah tayyār karke khā. īṅdhan ke liye insān kā fuzlā istemāl kar. dhyān de ki sab is ke gavāh hoṅ.” 13rabb ne farmāyā, “jab maiṅ isrāīliyoṅ ko dīgar aqvām meṅ muntashir karūṅgā to unheṅ nāpāk roṭī khānī paṛegī.”
14yah sun kar maiṅ bol uṭhā, “hāy, hāy! ai rabb qādir-e-mutlaq, maiṅ kabhī bhī nāpāk nahīṅ huā. javānī se le kar āj tak maiṅ ne kabhī bhī aise jānvar kā gosht nahīṅ khāyā jise zabah nahīṅ kiyā gayā thā yā jise jaṅglī jānvaroṅ ne phāṛā thā. nāpāk gosht kabhī mere muṅh meṅ nahīṅ āyā.”
15tab rabb ne javāb diyā, “ṭhīk hai, roṭī ko banāne ke liye tū insān ke fuzle ke bajāy gobar istemāl kar saktā hai. maiṅ tujhe is kī ijāzat detā hūṅ.”
16us ne mazīd farmāyā, “ai ādamzād, maiṅ yarūshalam meṅ roṭī kā band-o-bast ḵẖatm ho jāne dūṅgā. tab log apnā khānā baṛī ehatiyāt se aur pareshānī meṅ tol tol kar khāeṅge. vah pānī kā qatrā qatrā gin kar use larazte hue pieṅge. 17kyūṅki khāne aur pānī kī qillat hogī. sab mil kar tabāh ho jāeṅge, sab apne gunāhoṅ ke sabab se saṛ jāeṅge.