Hizqīel 32
ajhdahe firaaun ko mārā jāegā
1yahūyākīn bādshāh ke 12veṅ sāl meṅ rabb mujh se hamkalām huā. 12veṅ mahīne kā pahalā din [a] 3 mārch. thā. mujhe yah paiġām milā, 2“ai ādamzād, misr ke bādshāh firaaun par mātmī gīt gā kar use batā,
‘go aqvām ke darmiyān tujhe javān sherbabar samjhā jātā hai, lekin darahaqīqat tū daryā-e-nīl kī shāḵẖoṅ meṅ rahane vālā ajhdahā hai jo apnī nadiyoṅ ko ubalne detā aur pāoṅ se pānī ko zor se harkat meṅ lā kar gadlā kar detā hai.
3rabb qādir-e-mutlaq farmātā hai ki maiṅ mut’addid qaumoṅ ko jamā karke tere pās bhejūṅgā tāki tujh par jāl ḍāl kar tujhe pānī se khaiṅch nikāleṅ. 4tab maiṅ tujhe zor se ḵẖushkī par paṭaḵẖ dūṅgā, khule maidān par hī tujhe phaiṅk chhoṛūṅgā. tamām parinde tujh par baiṭh jāeṅge, tamām jaṅglī jānvar tujhe khā khā kar ser ho jāeṅge. 5terā gosht maiṅ pahāṛoṅ par phaiṅk dūṅgā, terī lāsh se vādiyoṅ ko bhar dūṅgā. 6tere bahate ḵẖūn se maiṅ zamīn ko pahāṛoṅ tak serāb karūṅgā, ghāṭiyāṅ tujh se bhar jāeṅgī.
7jis vaqt maiṅ terī zindagī kī battī bujhā dūṅgā us vaqt maiṅ āsmān ko ḍhāṁp dūṅgā. sitāre tārīk ho jāeṅge, sūraj bādloṅ meṅ chhup jāegā aur chāṅd kī raushnī nazar nahīṅ āegī. 8jo kuchh bhī āsmān par chamaktā damaktā hai use maiṅ tere bāis tārīk kar dūṅgā. tere pūre mulk par tārīkī chhā jāegī. yah rabb qādir-e-mutlaq kā farmān hai.
9bahut qaumoṅ ke dil ghabrā jāeṅge jab maiṅ tere anjām kī ḵẖabar dīgar aqvām tak pahuṅchāūṅgā, aise mamālik tak jin se tū nāvāqif hai. 10mut’addid qaumoṅ ke sāmne hī maiṅ tujh par talvār chalā dūṅgā. yah dekh kar un par dahshat tārī ho jāegī, aur un ke bādshāhoṅ ke roṅgṭe khaṛe ho jāeṅge. jis din tū dhaṛām se gir jāegā us din un par marne kā itnā ḵẖauf chhā jāegā ki vah bār bār kāṁp uṭheṅge.
11kyūṅki rabb qādir-e-mutlaq farmātā hai ki shāh-e-bābal kī talvār tujh par hamlā karegī. 12terī shāndār fauj us ke sūrmāoṅ kī talvār se gir kar halāk ho jāegī. duniyā ke sab se zālim ādmī misr kā ġarūr aur us kī tamām shān-o-shaukat ḵẖāk meṅ milā deṅge. 13maiṅ vāfir pānī ke pās khaṛe us ke maveshī ko bhī barbād karūṅgā. āindā yah pānī na insān, na haivān ke pāoṅ se gadlā hogā. 14rabb qādir-e-mutlaq farmātā hai ki us vaqt maiṅ hone dūṅgā ki un kā pānī sāf-shaffāf ho jāe aur nadiyāṅ tel kī tarah bahane lageṅ. 15maiṅ misr ko vīrān-o-sunsān karke har chīz se maharūm karūṅgā, maiṅ us ke tamām bāshindoṅ ko mār ḍālūṅgā. tab vah jān leṅge ki maiṅ hī rabb hūṅ’.”
16rabb qādir-e-mutlaq farmātā hai, “lāzim hai ki darj-e-bālā mātmī gīt ko gāyā jāe. dīgar aqvām use gāeṅ, vah misr aur us kī shān-o-shaukat par mātam kā yah gīt zarūr gāeṅ.”
pātāl meṅ dīgar aqvām misr ke intizār meṅ haiṅ
17yahūyākīn bādshāh ke 12veṅ sāl meṅ rabb mujh se hamkalām huā. mahīne kā 15vāṅ din thā. us ne farmāyā, 18“ai ādamzād, misr kī shān-o-shaukat par vāvailā kar. use dīgar azīm aqvām ke sāth pātāl meṅ utār de. use un ke pās pahuṅchā de jo pahale gaṛhe meṅ pahuṅch chuke haiṅ. 19misr ko batā,
‘ab terī ḵẖūbsūrtī kahāṅ gaī? ab tū is meṅ kis kā muqāblā kar saktā hai? utar jā! pātāl meṅ nāmaḵẖtūnoṅ ke pās hī paṛā rah.’ 20kyūṅki lāzim hai ki misrī maqtūloṅ ke bīch meṅ hī gir kar halāk ho jāeṅ. talvār un par hamlā karne ke liye khaiṅchī jā chukī hai. ab misr ko us kī tamām shān-o-shaukat ke sāth ghasīṭ kar pātāl meṅ le jāo! 21tab pātāl meṅ baṛe sūrme misr aur us ke madadgāroṅ kā istiqbāl karke kaheṅge, ‘lo, ab yah bhī utar āe haiṅ, yah bhī yahāṅ paṛe nāmaḵẖtūnoṅ aur maqtūloṅ meṅ shāmil ho gae haiṅ.’
22vahāṅ asūr pahale se apnī pūrī fauj samet paṛā hai, aur us ke ird-gird talvār ke maqtūloṅ kī qabreṅ haiṅ. 23asūr ko pātāl ke sab se gahare gaṛhe meṅ qabreṅ mil gaīṅ, aur ird-gird us kī fauj dafan huī hai. pahale yah zindoṅ ke mulk meṅ chāroṅ taraf dahshat phailāte the, lekin ab ḵẖud talvār se halāk ho gae haiṅ.
24vahāṅ ailām bhī apnī tamām shān-o-shaukat samet paṛā hai. us ke ird-gird dafan hue faujī talvār kī zad meṅ ā gae the. ab sab utar kar nāmaḵẖtūnoṅ meṅ shāmil ho gae haiṅ, go zindoṅ ke mulk meṅ log un se shadīd dahshat khāte the. ab vah bhī pātāl meṅ utre hue dīgar logoṅ kī tarah apnī rusvāī bhugat rahe haiṅ. 25ailām kā bistar maqtūloṅ ke darmiyān hī bichhāyā gayā hai, aur us ke ird-gird us kī tamām shāndār fauj ko qabreṅ mil gaī haiṅ. sab nāmaḵẖtūn, sab maqtūl haiṅ, go zindoṅ ke mulk meṅ log un se saḵẖt dahshat khāte the. ab vah bhī pātāl meṅ utre hue dīgar logoṅ kī tarah apnī rusvāī bhugat rahe haiṅ. unheṅ maqtūloṅ ke darmiyān hī jagah mil gaī hai.
26vahāṅ masak-tūbal bhī apnī tamām shān-o-shaukat samet paṛā hai. us ke ird-gird dafan hue faujī talvār kī zad meṅ ā gae the. ab sab nāmaḵẖtūnoṅ meṅ shāmil ho gae haiṅ, go zindoṅ ke mulk meṅ log un se shadīd dahshat khāte the. 27aur unheṅ un sūrmāoṅ ke pās jagah nahīṅ milī jo qadīm zamāne meṅ nāmaḵẖtūnoṅ ke darmiyān faut ho kar apne hathiyāroṅ ke sāth pātāl meṅ utar āe the aur jin ke saroṅ ke nīche talvār rakhī gaī. un kā qusūr un kī haḍḍiyoṅ par paṛā rahatā hai, go zindoṅ ke mulk meṅ log in jaṅgajūoṅ se dahshat khāte the.
28ai firaaun, tū bhī pāsh pāsh ho kar nāmaḵẖtūnoṅ aur maqtūloṅ ke darmiyān paṛā rahegā. 29adom pahale se apne bādshāhoṅ aur raīsoṅ samet vahāṅ pahuṅch chukā hogā. go vah pahale itne tāqatvar the, lekin ab maqtūloṅ meṅ shāmil haiṅ, un nāmaḵẖtūnoṅ meṅ jo pātāl meṅ utar gae haiṅ. 30is tarah shimāl ke tamām hukmarān aur saidā ke tamām bāshinde bhī vahāṅ ā maujūd hoṅge. vah bhī maqtūloṅ ke sāth pātāl meṅ utar gae haiṅ. go un kī zabardast tāqat logoṅ meṅ dahshat phailātī thī, lekin ab vah sharmindā ho gae haiṅ, ab vah nāmaḵẖtūn hālat meṅ maqtūloṅ ke sāth paṛe haiṅ. vah bhī pātāl meṅ utre hue bāqī logoṅ ke sāth apnī rusvāī bhugat rahe haiṅ.
31tab firaaun in sab ko dekh kar tasallī pāegā, go us kī tamām shān-o-shaukat pātāl meṅ utar gaī hogī. rabb qādir-e-mutlaq farmātā hai ki firaaun aur us kī pūrī fauj talvār kī zad meṅ ā jāeṅge.
32pahale merī marzī thī ki firaaun zindoṅ ke mulk meṅ ḵẖauf-o-hirās phailāe, lekin ab use us kī tamām shān-o-shaukat ke sāth nāmaḵẖtūnoṅ aur maqtūloṅ ke darmiyān rakhā jāegā. yah merā rabb qādir-e-mutlaq kā farmān hai.”