Hizqīel 26

sūr kā satyānās

¹yahūyākīn bādshāh kī jilāvatanī ke 11veṅ sāl meṅ rabb mujh se hamkalām huā. mahīne kā pahalā din thā. ²“ai ādamzād, sūr beṭī yarūshalam kī tabāhī dekh kar ḵẖush huī hai. vah kahatī hai, ‘lo, aqvām kā darvāzā ṭūṭ gayā hai! ab maiṅ hī is kī zimmādāriyāṅ nibhāūṅgī. ab jab yarūshalam vīrān hai to maiṅ hī faroġ pāūṅgī.’

³javāb meṅ rabb qādir-e-mutlaq farmātā hai ki ai sūr, maiṅ tujh se nipaṭ lūṅgā! maiṅ mut’addid qaumoṅ ko tere ḵẖilāf bhejūṅgā. samundar kī zabardast maujoṅ kī tarah vah tujh par ṭūṭ paṛeṅgī. ⁴vah sūr shahar kī fasīl ko ḍhā kar us ke burjoṅ ko ḵẖāk meṅ milā deṅgī. tab maiṅ use itne zor se jhāṛ dūṅgā ki miṭṭī tak nahīṅ rahegī. ḵẖālī chaṭān hī nazar āegī. ⁵rabb qādir-e-mutlaq farmātā hai ki vah samundar ke darmiyān aisī jagah rahegī jahāṅ machhere apne jāloṅ ko sukhāne ke liye bichhā deṅge. dīgar aqvām use lūṭ leṅgī, ⁶aur ḵẖushkī par us kī ābādiyāṅ talvār kī zad meṅ ā jāeṅgī. tab vah jān leṅge ki maiṅ hī rabb hūṅ.

⁷kyūṅki rabb qādir-e-mutlaq farmātā hai ki maiṅ bābal ke bādshāh nabūkadnazzar ko tere ḵẖilāf bhejūṅgā jo ghoṛe, rath, ghuṛsavār aur baṛī fauj le kar shimāl se tujh par hamlā karegā. ⁸ḵẖushkī par terī ābādiyoṅ ko vah talvār se tabāh karegā, phir pushte aur burjoṅ se tujhe gher legā. us ke faujī apnī ḍhāleṅ uṭhā kar tujh par hamlā kareṅge. ⁹bādshāh apnī qil’āshikan mashīnoṅ se terī fasīl ko ḍhā degā aur apne ālāt se tere burjoṅ ko girā degā. ¹⁰jab us ke beshumār ghoṛe chal paṛeṅge to itnī gard uṛ jāegī ki tū us meṅ ḍūb jāegī. jab bādshāh terī fasīl ko toṛ toṛ kar tere darvāzoṅ meṅ dāḵẖil hogā to terī dīvāreṅ ghoṛoṅ aur rathoṅ ke shor se laraz uṭheṅgī. ¹¹us ke ghoṛoṅ ke khur terī tamām galiyoṅ ko kuchal deṅge, aur tere bāshinde talvār se mar jāeṅge, tere mazbūt satūn zamīnabos ho jāeṅge. ¹²dushman terī daulat chhīn leṅge aur terī tijārat kā māl lūṭ leṅge. vah terī dīvāroṅ ko girā kar terī shāndār imāratoṅ ko mismār kareṅge, phir tere patthar, lakṛī aur malbā samundar meṅ phaiṅk deṅge. ¹³maiṅ tere gītoṅ kā shor band karūṅgā. āindā tere sarodoṅ kī āvāz sunāī nahīṅ degī. ¹⁴maiṅ tujhe naṅgī chaṭān meṅ tabdīl karūṅgā, aur machhere tujhe apne jāl bichhā kar sukhāne ke liye istemāl kareṅge. āindā tujhe kabhī dubārā tāmīr nahīṅ kiyā jāegā. yah rabb qādir-e-mutlaq kā farmān hai.

¹⁵rabb qādir-e-mutlaq farmātā hai ki ai sūr beṭī, sāhilī ilāqe kāṁp uṭheṅge jab tū dhaṛām se gir jāegī, jab har taraf zaḵẖmī logoṅ kī karāhatī āvāzeṅ sunāī deṅgī, har galī meṅ qatl-o-ġārat kā shor machegā. ¹⁶tab sāhilī ilāqoṅ ke tamām hukmarān apne taḵẖtoṅ se utar kar apne choġe aur shāndār libās utāreṅge. vah mātmī kapṛe pahan kar zamīn par baiṭh jāeṅge aur bār bār laraz uṭheṅge, yahāṅ tak vah tere anjām par pareshān hoṅge. ¹⁷tab vah tujh par mātam karke gīt gāeṅge,

‘hāy, tū kitne dhaṛām se gir kar tabāh huī hai! ai sāhilī shahar, ai sūr beṭī, pahale tū apne bāshindoṅ samet samundar ke darmiyān rah kar kitnī mashhūr aur tāqatvar thī. gird-o-navāh ke tamām bāshinde tujh se dahshat khāte the. ¹⁸ab sāhilī ilāqe tere anjām ko dekh kar tharathrā rahe haiṅ. samundar ke jazīre tere ḵẖātme kī ḵẖabar sun kar dahshatzadā ho gae haiṅ.’

¹⁹rabb qādir-e-mutlaq farmātā hai ki ai sūr beṭī, maiṅ tujhe vīrān-o-sunsān karūṅgā. tū un dīgar shaharoṅ kī mānind ban jāegī jo nest-o-nābūd ho gae haiṅ. maiṅ tujh par sailāb lāūṅgā, aur gaharā pānī tujhe ḍhāṁp degā. ²⁰maiṅ tujhe pātāl meṅ utarne dūṅgā, aur tū us qaum ke pās pahuṅchegī jo qadīm zamāne se hī vahāṅ bastī hai. tab tujhe zamīn kī gaharāiyoṅ meṅ rahanā paṛegā, vahāṅ jahāṅ qadīm zamānoṅ ke khaṅḍarāt haiṅ. tū murdoṅ ke mulk meṅ rahegī aur kabhī zindagī ke mulk meṅ vāpas nahīṅ āegī, na vahāṅ apnā maqām dubārā hāsil karegī. ²¹maiṅ hone dūṅgā ki terā anjām dahshatanāk hogā, aur tū sarāsar tabāh ho jāegī. log terā khoj lagāeṅge lekin tujhe kabhī nahīṅ pāeṅge. yah rabb qādir-e-mutlaq kā farmān hai.”