Hizqīel 2

hizqīel kī bulāhaṭ, tūmār kī royā

¹vah bolā, “ai ādamzād, khaṛā ho jā! maiṅ tujh se bāt karnā chāhatā hūṅ.” ²jūṅ hī vah mujh se hamkalām huā to rūh ne mujh meṅ ā kar mujhe khaṛā kar diyā. phir maiṅ ne āvāz ko yah kahate hue sunā,

³“ai ādamzād, maiṅ tujhe isrāīliyoṅ ke pās bhej rahā hūṅ, ek aisī sarkash qaum ke pās jis ne mujh se baġāvat kī hai. shurū se le kar āj tak vah apne bāpdādā samet mujh se bevafā rahe haiṅ. ⁴jin logoṅ ke pās maiṅ tujhe bhej rahā hūṅ vah besharm aur ziddī haiṅ. unheṅ vah kuchh sunā de jo rabb qādir-e-mutlaq farmātā hai. ⁵ḵẖwāh yah bāġī suneṅ yā na suneṅ, vah zarūr jān leṅge ki hamāre darmiyān nabī barpā huā hai. ⁶ai ādamzād, un se yā un kī bātoṅ se mat ḍarnā. go tū kāṅṭedār jhāṛiyoṅ se ghirā rahegā aur tujhe bicchhūoṅ ke darmiyān basnā paṛegā to bhī ḵẖaufzadā na ho. na un kī bātoṅ se ḵẖauf khānā, na un ke ravayye se dahshat khānā. kyūṅki yah qaum sarkash hai. ⁷ḵẖwāh yah suneṅ yā na suneṅ lāzim hai ki tū mere paiġāmāt unheṅ sunāe. kyūṅki vah bāġī hī haiṅ. ⁸ai ādamzād, jab maiṅ tujh se hamkalām hūṅgā to dhyān de aur is sarkash qaum kī tarah baġāvat mat karnā. apne muṅh ko khol kar vah kuchh khā jo maiṅ tujhe khilātā hūṅ.”

⁹tab ek hāth merī taraf baṛhā huā nazar āyā jis meṅ tūmār thā. ¹⁰tūmār ko kholā gayā to maiṅ ne dekhā ki us meṅ āge bhī aur pīchhe bhī mātam aur āh-o-zārī qalamband huī hai.