Hizqīel 19

isrāīlī buzurgoṅ par mātmī gīt

¹ai nabī, isrāīl ke raīsoṅ par mātmī gīt gā,

²‘terī māṅ kitnī zabardast shernī thī. javān sherbabroṅ ke darmiyān hī apnā ghar banā kar us ne apne bacchoṅ ko pāl liyā.

³ek bacche ko us ne ḵẖās tarbiyat dī. jab baṛā huā to jānvaroṅ ko phāṛnā sīkh liyā, balki insān bhī us kī ḵẖurāk ban gae.

⁴is kī ḵẖabar dīgar aqvām tak pahuṅchī to unhoṅ ne use apne gaṛhe meṅ pakaṛ liyā. vah us kī nāk meṅ kāṅṭe ḍāl kar use misr meṅ ghasīṭ le gae.

⁵jab shernī ke is bacche par se ummīd jātī rahī to us ne dīgar bacchoṅ meṅ se ek ko chun kar use ḵẖās tarbiyat dī.

⁶yah bhī tāqatvar ho kar dīgar sheroṅ meṅ ghūmne phirne lagā. us ne jānvaroṅ ko phāṛnā sīkh liyā, balki insān bhī us kī ḵẖurāk ban gae.

⁷un ke qilaoṅ ko girā kar us ne un ke shaharoṅ ko ḵẖāk meṅ milā diyā. us kī dahāṛatī āvāz se mulk bāshindoṅ samet ḵẖaufzadā ho gayā.

⁸tab ird-gird ke sūboṅ meṅ basne vālī aqvām us se laṛne āīṅ. unhoṅ ne apnā jāl us par ḍāl diyā, use apne gaṛhe meṅ pakaṛ liyā.

⁹vah us kī gardan meṅ paṭṭā aur nāk meṅ kāṅṭe ḍāl kar use shāh-e-bābal ke pās ghasīṭ le gae. vahāṅ use qaid meṅ ḍālā gayā tāki āindā isrāīl ke pahāṛoṅ par us kī garajtī āvāz sunāī na de.

¹⁰terī māṅ pānī ke kināre lagāī gaī aṅgūr kī sī bel thī. bel kasrat ke pānī ke bāis phaldār aur shāḵẖdār thī.

¹¹us kī shāḵẖeṅ itnī mazbūt thīṅ ki un se shāhī asā ban sakte the. vah bāqī paudoṅ se kahīṅ ziyādā ūṅchī thī balki us kī shāḵẖeṅ dūr dūr tak nazar ātī thīṅ.

¹²lekin āḵẖirkār logoṅ ne taish meṅ ā kar use ukhāṛ kar phaiṅk diyā. mashriqī lū ne us kā phal murjhāne diyā. sab kuchh utārā gayā, lihāzā vah sūkh gayā aur us kā mazbūt tanā nazar-e-ātish huā.

¹³ab bel ko registān meṅ lagāyā gayā hai, vahāṅ jahāṅ ḵẖushk aur piyāsī zamīn hotī hai.

¹⁴us ke tane kī ek ṭahanī se āg ne nikal kar us kā phal bhasm kar diyā. ab koī mazbūt shāḵẖ nahīṅ rahī jis se shāhī asā ban sake’.”

darj-e-bālā gīt mātmī hai aur āh-o-zārī karne ke liye istemāl huā hai.